Pag-asikaso sa mga Rogaring kan Kagurangnan

¹ Kan mga panahon kan Biblia, dakulang katongdan an ipinagkatiwala sa sarong mayordomo. Tinawan ni Abraham an saiyang mayordomo kan trabaho na ihanap nin agom na babae an saiyang aki, si Isaac. (Gen. 24:​1-4) Sa katunayan, paninimbagan kan mayordomo na seguradohon an pagpapadagos kan linahe ni Abraham. Kanigoan kadakulang responsibilidad! Bakong makangangalas na si apostol Pablo nagsabi: “An hinahanap sa mga mayordomo iyo na an tawo makuang fiel”!​—1 Cor. 4:2.

Kristianong Pagkamayordomo

² An nagkapirang aspekto kan Kristianong ministeryo ilinaladawan sa Biblia bilang pagkamayordomo. Halimbawa, si apostol Pablo nagtaram sa mga taga-Efeso manongod sa “pagkamayordomo kan dai na kutana maninigong kabootan nin Dios na itinao sa sako para sa saindo.” (Efe. 3:​2; Col. 1:25) Minansay nia an sugo sa saiya na darahon an maogmang bareta sa mga nasyon bilang pagkamayordomo na kaipuhan niang fiel na asikasohon. (Gibo 9:​15; 22:21) Si apostol Pedro nagsurat sa saiyang linahidan na mga tugang: “Magin mapag-istimar sa lambang saro na daing paggumodgumod. Kaoyon sa sokol nin balaog na naako kan lambang saro, gamiton iyan sa paglingkod sa lambang saro bilang marahay na mga mayordomo kan dai na kutana maninigong kabootan nin Dios na ipinahahayag sa manlaenlaen na paagi.” (1 Ped. 4:​9, 10; Heb. 13:16) An ano man na materyal na rogaring kan mga Kristianong idto kan enot na siglo bunga kan dai na kutana maninigong kabootan ni Jehova. Kun siring, sinda mga mayordomo kan mga bagay na idto asin kinaipuhan na gamiton iyan sa Kristianong paagi.

³ Ngonyan, kapareho kaiyan an pagmansay kan Mga Saksi ni Jehova sa mga bagay na iyan. Sinda nagdusay ki Jehova Dios asin minamansay an gabos na yaon sa sainda​—an saindang buhay, saindang pisikal na kosog, saindang materyal na mga rogaring—​bilang mga bunga kan “dai na kutana maninigong kabootan nin Dios na ipinahahayag sa manlaenlaen na paagi.” Bilang marahay na mga mayordomo, namamatean ninda na maninimbag sinda ki Jehova Dios sa kun paano ninda ginagamit an mga bagay na ini. Dugang pa, tinawan sinda nin kaaraman dapit sa maogmang bareta. Ini man sarong ipinagkatiwala na mawot nindang gamiton sa pinakamarahay na paaging mapupuede: pamurawayon an ngaran ni Jehova asin tabangan an iba na makaaram kan katotoohan.​—Mat. 28:​19, 20; 1 Tim. 2:​3, 4; 2 Tim. 1:​13, 14.

⁴ Paano ginigibo kan Mga Saksi ni Jehova an saindang mga responsibilidad bilang mga mayordomo? Ipinaheheling kan taonan na report na kan nakaaging taon sana, sa bilog na kinaban naggamit sinda nin labing sarong bilyon na oras sa paghuhulit kan ‘maogmang bareta kan kahadean’ asin nagkondukta nin labing 4,500,000 na pag-adal sa Biblia sa harong sa mga interesado. (Mat. 24:14) An saindang pagigin fiel bilang mga mayordomo ni Jehova ipinaheling man paagi sa saindang buka an palad na mga donasyon para sa pambilog na kinaban na gibohon asin sa pagsuportar sa lokal na mga Kingdom Hall, paagi sa saindang pagkamapag-istimar sa nagbibiaheng mga paraataman asin sa iba, patin paagi sa saindang ekstraordinaryong kabootan sa mga dakula an pangangaipo​—siring baga kan mga biktima nin armadong mga ralaban. Bilang sarong grupo, an tunay na mga Kristiano inaasikasong marhay an mga rogaring kan Kagurangnan.

“An Fiel na Mayordomo, an Sarong Madonong”

⁵ An pagkamayordomo bako sanang sa indibiduwal kundi patin sa organisasyonal. Inapod ni Jesus an linahidan na Kristianong kongregasyon digdi sa daga na “an fiel na mayordomo, an sarong madonong.” (Luc. 12:42) An responsibilidad kan “fiel na mayordomong” ini iyo na magtao nin “kakanon” asin mangenot sa paghuhulit kan maogmang bareta sa gabos na nasyon. (Kap. 12:17) Konektado digdi, an fiel na grupong mayordomo, na irinerepresentar kan Namamahalang Grupo, may tao nin Dios na paninimbagan na kapotan nin tama an materyal asin espirituwal na mga “talento” kaiyan. (Mat. 25:15) Kaoyon sa halimbawa kan ‘fiel na mga mayordomo,’ an indibiduwal na korporasyon kan mga sangang opisina ginigibo an bilog na paghihingoa na gamiton an gabos na pinansial na donasyon sa responsableng paagi, tanganing palakopon an intereses kan Kahadean. An gabos na donasyon na iyan ipinagkakatiwala, asin paninimbagan kan “fiel na mayordomo, an sarong madonong” na seguradohon na iyan ginagamit sa talagang katuyohan para dian asin na iyan ginagasto sa madonong, nakaeekonomiya, asin epektibong paagi.

⁶ An sarong halimbawa kan madonong na paggamit kan idinonar na mga pondo maheheling sa pag-oswag kan pag-imprenta kan Mga Saksi ni Jehova durante kan ika-20 siglo. An pagdistribwir nin mga Biblia saka literatura sa Biblia​—mga magasin, libro, brosyur, pulyeto, tract, asin Kingdom News—​nagkaigwa nin dakulang kabtang sa pagpalakop kan “maogmang bareta” durante kan “huring mga aldaw” na ini. (Mar. 13:​10; 2 Tim. 3:1) Asin an magasin na Torrengbantayan haloy nang mayor na instrumento sa pagsuplay nin “kakanon sa igong panahon” sa “pamilya nin Dios” asin sa saindang kairiba, an “dakulang kadaklan” nin “ibang karnero.”​—Mat. 24:​45; Efe. 2:​19; Kap. 7:​9; Juan 10:16.

⁷ Kan enot, an gabos na literatura kan Mga Saksi ni Jehova prinodusir paagi sa komersial na mga imprentahan. Alagad durante kan mga taon nin 1920, napagdesisyonan na orog na magigin episiente asin kapakipakinabang sa espirituwal kun an mga lingkod ni Jehova an mag-iimprenta mismo. Sa sadit na pagpopoon kan 1920, luway-luway na nag-oswag an pag-imprenta sa Brooklyn, Nueva York, sagkod na iyan magin dakula nang marhay. Pag-abot kan 1967 nasakop kan mga pasilidad na iyan an apat na bloke kan siudad. Pinonan man an pag-imprenta sa iba pang mga nasyon, alagad an kadaklan kaiyan, napondo kan Guerra Mundial II.

⁸ Gurano man kadakula kan pag-oswag kan pag-imprenta sa Estados Unidos, iyan nungkang nagin dakula tanganing masuplayan an bilog na kinaban. Kun siring, kan mga taon pakatapos kan guerra, inandam an mga pag-imprenta o naponan na sa dakol na iba pang nasyon, kabale an Aprika del Sur, Canada, Denmark, Grecia, Inglaterra, Solnopan na Alemania, asin Switzerland. Kan pagpopoon kan mga taon nin 1970, idinugang sa lista an Australia, Brazil, Finlandia, Ghana, Hapon, Nigeria, asin Pilipinas. An nagkapira sa mga nasyon na ini nagpoprodusir man nin mga libro. Siring man kan pagpopoon kan mga taon nin 1970, an mga misyonero sa Gilead sinanay sa pag-imprenta asin ipinadara sa nagkapira sa mga nasyon na ini tanganing tabangan an lokal na mga tugang sa pag-imprenta.

⁹ Durante kan mga taon nin 1980, an bilang nin mga nasyon na dian iniimprenta an mga magasin nakaabot sa pinakahalangkaw na bilang na 51.a An gabos na ini nagin nanggad marahayon na paggamit kan mga rogaring kan Kagurangnan! Abaa kakosog na ebidensia kan pag-oswag kan gibohon na pan-Kahadean! Asin kanigoan kapuersang patotoo sa buka an palad na pagsuportar kan minilyon na indibiduwal na Saksi ni Jehova na ‘nagtatao nin onra ki Jehova paagi sa saindang mahahalagang bagay’! (Tal. 3:9) Sa siring, pinatunayan ninda na sinda marahay na mga mayordomo sa itinaong bendisyon sa sainda ni Jehova sa manlaenlaen na paagi.

Pagliwat nin Atension

¹⁰ Durante kan mga taon nin 1970 asin sa pagpopoon kan mga taon nin 1980, nagkaigwa nin dakulang mga pag-oswag sa teknolohiya nin pag-imprenta, asin ginamit kan Mga Saksi ni Jehova an mas bagong mga pamamaagi sa pag-imprenta. Kan nakaagi, ginamit ninda an tradisyonal na estilo sa pag-imprenta na letterpress. Ini luway-luway na nagbago mantang pinoponan nindang gamiton an mas modernong pag-imprenta na offset. Bilang resulta, nakapoprodusir nin magayon na mga publikasyon na may kompleto sa kolor na mga ilustrasyon, imbes na kan duwa an kolor na mga retrato (itom asin saro pang kolor) na posible sa daan na mga letterpress. Dugang pa, naliwat an enterong preparasyon bago mag-imprenta huli sa teknolohiya sa komputer. Guminibo an Mga Saksi ni Jehova nin Multilanguage Electronic Phototypesetting System (MEPS), sarong komputer na ngonyan nagsusuportar sa pag-imprenta sa labing 370 laen-laen na lenguahe. Mayo nin komersial na programang makakokomparar sa MEPS sa kapasidad kaiyan na magpunsionar sa kadakol na lenguahe.

¹¹ Sa tabang kan teknolohiya sa komputer na MEPS asin paggamit kan iba pang bagong mga ideya na siring baga kan electronic mail, nagkaigwa nin saro pang dakulang pag-oswag sa pagprodusir nin kakanon sa igong panahon. Kan nakaagi, na ginagamit an mas daan na teknolohiya, an impormasyon sa mga magasin na bakong Ingles nahuhuri nin pirang bulan o sarong taon pa ngani kisa sa Ingles. Ngonyan, An Torrengbantayan durungan na nagluluwas sa 115 laen-laen na lenguahe, asin an Awake! sa 62. Ini nangangahulogan na sa bilog na kinaban labing 95 porsiento kan mga nag-aatender sa semanal na Pag-adal sa Torrengbantayan kan Mga Saksi ni Jehova an durungan na nag-aadal kan iyo man sanang materyal. Kanigoan kadakulang bendisyon ini! Sierto nanggad na sarong marahay na paggamit kan mga rogaring kan Kagurangnan an paggamit nin kuarta sa gabos na bagong teknolohiyang iyan!

Laen-Laen na Organisasyonal na Pangangaipo

¹² Naliwat an organisasyonal na mga pangangaipo kan pambilog na kinaban na mga pag-imprenta kan Mga Saksi ni Jehova huli sa bagong mga sistemang ini. An web offset na mga imprentahan mas marikas na gayo kisa sa daan na mga letterpress, alagad iyan mas magastos man na marhay. Mas magastos man an mga komputer na nagsusuportar sa konektadong trabaho, siring baga kan pagsurat, pagtradusir, arte, asin mga ilustrasyon, minsan ngani nagtatao nin mas dakol na potensial kisa sa daan na mga komputer. Dai nahaloy nagin malinaw na dai na makaeekonomiya an pag-imprenta nin mga magasin sa 51 laen-laen na nasyon. Huli kaini, kan mga taon nin 1990, siniyasat giraray kan “fiel na mayordomo” an situwasyon na iyan. Ano an nagin konklusyon?

¹³ Ipinaheling nin mga pag-adal na an “mahahalagang bagay” na idinonar kan Mga Saksi ni Jehova asin kan saindang mga katood mas epektibong magagamit kun pagsasararoon an pag-imprenta. Kaya luway-luway na ininaan an bilang nin nag-iimprentang mga sangang opisina. An Alemania na an nag-iimprenta nin mga magasin asin literatura para sa dakol na nasyon sa Sirangan asin Solnopan na Europa, kabale an dakol na kan nakaagi sinda mismo an nag-iimprenta. Sinusuplayan kan Italia nin mga magasin asin literatura an mga parte kan Aprika asin timog-sirangan na Europa, kaiba an Grecia asin Albania. Sa Aprika, an pag-imprenta nin magasin limitado sana sa Nigeria asin Aprika del Sur. An kaagid na pagsararo ginibo man sa bilog na kinaban.

Mga Bagay na Dapat Pagturotimbangon

¹⁴ Pag-abot kan Hulyo 1998, popondohon na an pag-imprenta nin mga magasin sa nagkapirang nasyon sa Europa kabale an Austria, Denmark, Grecia, Netherlands, Pransia, asin Switzerland. An pag-imprenta sa Europa gigibohon kan Alemania, Britania, España, Finlandia, Italia, asin Sweden. Paagi kaini, malilikayan an dai kinakaipuhan na mga gastos asin magagamit an mga donasyon sa mas marahay na paagi para sa pambilog na kinaban na gibohon. Paano dinesisyonan kun arin na mga nasyon an magpapadagos bilang lugar nin pag-imprenta asin kun arin an mapondo sa pag-imprenta? Sa pagsunod sa pagboot dian na madonong na asikasohon an mga rogaring kan Kagurangnan, “an fiel na mayordomo” maingat na siniyasat an pagigin praktikal kan pag-imprenta sa kada lugar.

¹⁵ An dakulaon na dahelan kun taano an pag-imprenta ta ipinondo sa nagkapirang nasyon asin pinagsararo sa iba iyo an pagigin praktikal. Mas kombenyente asin magagamit sa mas marahay na paagi an mahal na kasangkapan kun saro sanang nasyon an mag-iimprenta nin literatura para sa nagkapirang ibang kadagaan. Ginigibo na ngonyan an pag-imprenta kun saen mas hababa an gastos, may makukuang materyales, asin marahay an mga pasilidad sa pagpaktora. Sa siring, tamang nagagamit an mga rogaring kan Kagurangnan. Siempre, an pagpondo nin pag-imprenta sa sarong nasyon dai nangangahulogan na mapondo na an paghuhulit dian. May makukua pa man giraray na abundang suplay nin inimprentang materyal, asin an ginatos na ribong Saksi ni Jehova sa mga nasyon na idto padagos na maigot na magtataram sa saindang mga kataed kan “maogmang bareta nin katoninongan.” (Efe. 2:17) Dugang pa, an pagreorganisar na ini nagbunga nin iba pang mga pakinabang.

¹⁶ Sa pagsitar nin sarong pakinabang, ipinadara sa Nigeria asin Pilipinas an kadaklan sa modernong mga imprentahan hale sa Denmark, Grecia, Netherlands, asin Switzerland. Inako kan ekspertong mga paraimprenta hale sa mga nasyon sa Europa an imbitasyon na magduman sa padadarahan kan mga imprentahan asin sanayon an lokal na mga paraimprenta sa paggamit kaiyan. Huli kaini, an mga nasyon na iyan nag-aako na ngonyan kan iyo man sanang halangkaw an kualidad na mga magasin na yaon sa ibang kadagaan.

¹⁷ Konsiderara an saro pang pakinabang: An gastos sa pag-imprenta kan mga magasin inaasumir na ngonyan kan pira na sanang nasyon kun saen nagpapadagos an pag-imprenta. Bilang resulta, sa mga nasyon na ipinondo an pag-imprenta, an mga pondo magagamit na ngonyan para sa ibang mga katuyohan, siring baga kan pagtogdok nin mga Kingdom Hall asin pagtabang na asikasohon an mga pangangaipo kan satong mga tugang sa mas dukhang mga nasyon. Sa siring, an maingat na paggamit kan mga rogaring kan Kagurangnan nangangahulogan na an mga tataramon ni Pablo sa mga taga-Corinto puedeng iaplikar nin mas epektibo sa internasyonal na sokol: “Bako kong katuyohan na magin madali iyan para sa iba, alagad masakit para sa saindo; kundi na paagi sa pagpantaypantay an sobra nindo ngonyan tibaad makahipno sa saindang kakulangan . . . tangani na magkaigwa nin pagpantaypantay.”​—2 Cor. 8:​13, 14.

¹⁸ Bilang resulta kan pagsararong ini, an Mga Saksi ni Jehova sa bilog na kinaban orog na nagkakaborogkos kisa kasuarin pa man. Bakong problema para sa mga Saksi sa Denmark na imprentahon an saindang mga magasin sa Alemania, dawa ngani kan dati sinda mismo an nag-iimprenta. Sinda nagpapasalamat sa paglilingkod kan saindang mga tugang na Aleman. Naghihinanakit daw an Mga Saksi ni Jehova sa Alemania sa bagay na an saindang mga donasyon ginagamit sa pagtao nin literatura sa Biblia para sa Denmark​—o para sa Rusya, Ukraine, asin iba pang mga nasyon? Siempre dai! Naoogma sindang maaraman na an mga donasyon kan saindang mga tugang sa mga nasyon na iyan magagamit na ngonyan para sa iba pang mahalagang mga katuyohan.

Pag-asikaso sa mga Rogaring

¹⁹ Sa lambang Kingdom Hall kan Mga Saksi ni Jehova sa bilog na kinaban, igwa nin kahon sa kontribusyon na may markang “Contributions for the Society’s Worldwide Work​—Matthew 24:14” (sa Bicol, “Mga Donasyon Para sa Pankinaban na Gibohon kan Sosyedad​—Mateo 24:14”). An boluntad na mga donasyon na ilinalaag sa mga kahon na iyan magagamit kun saen igwa nin pangangaipo. “An fiel na mayordomo” asin an indibiduwal na korporasyon kan mga sangang opisina an nagdedesisyon kun paano ginagamit an mga donasyon. Huli kaini, kun itinotogot nin ley, an kuartang ilinalaag sa kahon sa kontribusyon sa sarong nasyon puedeng makasuportar sa mga aktibidad kan Mga Saksi ni Jehova sa ibang nasyon na rinibong kilometro an rayo. Ginagamit an mga donasyon sa nagkapirang nasyon sa pagtao nin pan-emerhensiang ayuda para sa mga kapagtubod na nagsasakit huli sa mga bagyo, buwawi, linog, asin guerra sibil. Asin an siring na mga donasyon ginagamit tanganing suportaran an mga misyonero sa labing 200 na nasyon.

²⁰ Sa mga kongregasyon kan Mga Saksi ni Jehova, bilang pankagabsan na susundon, sinasambit an pinansial na mga bagay nin sarong beses sana kada bulan​—asin pira sanang minuto. Mayong ilinilibot na mga lalagan nin koleksion sa mga Kingdom Hall o sa mga asamblea. Dai nagpapadara sa mga indibiduwal nin mga kahagadan para sa mga pondo. Mayo nin binabayadan na mga paratipon nin pondo. Sa parate, An Torrengbantayan igwa sana nin sarong artikulo kada taon na nagpapaliwanag kun paano an mga nagmamawot puedeng magdonar sa Watch Tower Bible and Tract Society tanganing suportaran an gibohon sa bilog na kinaban. Mayo nin regular na pagsambit sa Awake! manongod sa mga kuarta kan Sosyedad. Paano, kun siring, nagibo an dakulaon na gibohon sa bilog na kinaban na paghuhulit kan maogmang bareta, pagtogdok nin kinakaipuhan na mga Kingdom Hall, pag-asikaso sa mga nasa bilog na panahon na espesyal na paglilingkod, asin pag-ayuda sa mga Kristianong nangangaipo? Binendisyonan ni Jehova sa makangangalas na paagi an saiyang banwaan nin espiritu nin pagigin buka an palad. (2 Cor. 8:2) Inaaprobetsaran niamo an oportunidad na ini na pasalamatan an gabos na nakikabtang sa ‘pagtao nin onra ki Jehova paagi sa saindang mahahalagang bagay.’ Makasisierto sinda na “an fiel na mayordomo” padagos na magbabantay sa mga rogaring kan Kagurangnan. Asin ipinamimibi niamo na logod na padagos na bendisyonan ni Jehova an gabos na areglong ginibo para sa pagpahiwas kan gibohon sa bilog na kinaban.

[Nota sa ibaba]