Kamo daw Naglilingkod na May Katuyohan?
1 Si Jehova Dios nin katuyohan. (Isa. 55:10, 11) Sinasadol kita na arogon sia. (Efe. 5:1) Tunay nanggad na dapat ining ipaheling sa paagi nin pag-otob niato sa satong ministeryo. Kaya angay an hapot na: “Kamo daw naglilingkod na may katuyohan?”
2 An saindong paghuhulit sa harong-harong, impormal na pagpapatotoo, asin pagdistribwir nin babasahon gabos kabtang nin may katuyohan na ministeryo. Alagad girumdomon na an kalabot sa sugo sa sato bako sanang paghuhulit kundi patin paggibo nin mga disipulo. (Mat. 28:19, 20) Pakatapos na magsabwag kan banhi kan katotoohan nin Kahadean, kaipuhan kitang bumalik tanganing baribion sinda asin itao an regular na pag-ataman mantang naghahalat kita ki Jehova na papangyarihon an pag-oswag. (1 Cor. 3:6) Kaipuhan niatong magin sadiosan sa paggibo nin pagdalaw liwat asin pagpopoon nin pag-adal sa Biblia.
3 Pahiwason an Saindong Ministeryo: Pirmeng yaon an pakamate nin kaogmahan kun nagigirumdoman nindo an saindong nagibo sa paglilingkod asin masabi sa sadiri nindo: “Nahaman ko an pinonan kong gibohon.” Siring kan nasusurat sa 2 Timoteo 4:5, si Pablo nagsadol: “Lubos na otobon an saimong ministeryo.” Kaiba dian an pagpahiwas kan saindong mga paghihingoa na kultibaron an gabos na nanonompongan na interes. Sa saindong semanal na iskedyul sa paglilingkod, magplano nin depinidong oras sa paggibo nin mga pagdalaw liwat. Hingoahon na maabot an pasohan na makapoon nin mga pag-adal sa Biblia sa mga may matanos na boot. Ini an maninigo nindong magin katuyohan kun naglilingkod sa ministeryo.
4 Hapoton an mga parahayag kun ano an namatean ninda kan maheling ninda an saindang inaadalan sa Biblia na nabautismohan sa sarong asamblea. Sinda naggayagaya, na posibleng siring sa namatean kan mga nabautismohan. Naotob ninda an sarong marahayon na katuyohan! Arog kaini an pagkapaliwanag dian nin sarong paragibo nin disipulo: “An paggibo nin mga disipulo nangangahulogan nin paggibo nin dakol pang paraomaw ki Jehova. Iyan nangangahulogan nin buhay para sa mga nag-aako kan katotoohan. Gustohon kong marhay an pagtotokdo kan katotoohan sa iba—iyan pambihira nanggad! . . . Dakol sa mga namoot ki Jehova nagin sakong mahal na mga katood.”
5 Imahinaron na nakatabang kamo sa sarong tawo na magin nagdusay na lingkod ni Jehova! Abaang dahelan nin kagayagayahan! An siring na mga bunga resulta nin paglilingkod na igwa nin katuyohan sa ministeryo.—Col. 4:17.