Ano an Sasabihon Nindo sa Sarong Budista?
1 Sa nagkapirang nasyon labing kabanga kan mga nagpapabautismo hale sa Budista. Ano an nakaaatraer sa mga ini sa katotoohan? Huling sa Pilipinas dakol an Intsik na pinadadakula bilang Budista, paano niato ikaaatubang an maogmang bareta sa sainda?
2 Magpaheling nin Tunay na Interes: Dakol na dating Budista an nagsabi na bakong an hararom na pangangatanosan an nakaatraer sa sainda sa katotoohan. Imbes, sinda napahiro kan tunay na personal na interes na ipinaheling sa sainda. An sarong babaeng taga Asia na nag-iistar sa Estados Unidos naghangang marhay sa pagigin makikatood kan tugang na babae na nagsongko sa saiya kaya sia uminoyon na mag-adal. Dai sia nakatataram na marhay nin Ingles, alagad mapasensia an tugang na babae. Kun pagal o dai makapag-adal an babae, an tugang na babae makikatood sanang minadalaw asin iinaareglo an masunod na pag-orolay. Pag-abot nin panahon an babae, an saiyang duwang aking lalaki, asin an saiyang gurang nang ina nagpabautismo. Sia nagbuelta sa nasyon na namundagan sa saiya asin tinabangan an dakol na iba pa na makanood kan katotoohan. An saro sa mga aki niang lalaki naglilingkod ngonyan sa sangang opisina. Kanigoan na bendisyon an ibinunga kan pagpabanaag kan “kabootan asin pagkamoot [ni Jehova] sa tawo”!—Tito 3:4.
3 Ideya nin mga Budista: An mga Budista sa pankagabsan mapagpabaya sa ibang mga ideya, alagad para sa sainda dai kaipuhan an pagsusog sa espesipikong doktrina. Kaya nagkakalaenlaen an saindang indibiduwal na mga paniniwala. An sarong komun na tema sa sarong sanga kan katokdoan nin Budista iyo na an buhay pano nin pagdusa, alagad paagi sa kaliwanagan, puedeng mapapondo nin saro an dagos-dagos na siklo nin pagkamundag liwat sa dai nakakokontentong buhay. Sinasabi na tangani na makatalingkas sa siklong ini, an saro kaipuhan na makaabot sa Nirvana, sarong kamugtakan na dai ikalaladawan huli ta iyan bakong sarong lugar o pangyayari kundi, imbes, sarong mayong laog na kamugtakan na dian an kolog asin karatan dai nag-eeksister. (Helingon an Ano an Nangyayari sa Sato kun Kita Magadan?, pahina 9-10.) Ano an sinasabi kaini sa sato? Na dai magigin mabunga an pakikidebate sa mga tawo manongod sa pilosopiyang Budista. Imbes, ipakipag-olay an komun na mga problema na ikinapupurisaw kan gabos.
4 Idoon an Komun na Interes: Huling sa pankagabsan ipinapareho kan mga Budista sa pagdusa an buhay sa daga, an ideyang buhay na daing katapusan sa daga tibaad pagngisihan ninda. Sa ibong kaiyan, kita gabos pararehong nagmamawot na magkamit nin maogmang buhay pampamilya, na maheling na haleon an pagdusa, asin maaraman an kahulogan nin buhay. Mangnoha kun paano ikatatampok an siring na komun na mga pangangaipo.
5 Puede nindong probaran an introduksion na ini:
5◼“Ngonyan kita nabubuhay sa kinaban na dakol na inosente an nagdudusa. Ano sa paniniwala nindo an kaipuhan tangani na matapos an kolog asin kasakitan para sa gabos? [Pasimbagon.] Igwa nin suanoy na panuga na nakararangang marhay sa sako. [Basahon an Kapahayagan 21:4.] Siempre, dai pa nag-abot an panahon na iyan, alagad kun iyan umabot na, gusto niatong maheling iyan, bako daw?” Dangan mag-alok nin sarong publikasyon na nagpapaliwanag kun paano matatapos an pagdusa.
6 Sa sarong gurang, puede nindong sabihon:
6◼ “Posibleng nahahadit man kamo kapareho ko dapit sa pagdakol sa presente nin hababaon na klaseng mga ideya asin sa epekto kaini sa satong mga aki. Taano daw ta grabe an pagdakol nin inmoralidad sa tahaw nin mga hoben? [Pasimbagon.] Aram daw nindo na ini ihinula sa sarong libro na pinonan na isurat haloy pa bago ipundar an mga relihion na Muslim, Kristiano, asin Hindu? [Basahon an 2 Timoteo 3:1-3.] Mangnohon na an mga kamugtakan na ini nangyayari sa ibong kan dagos-dagos na pakanood. [Basahon an bersikulo 7.] Nakatabang sa sako an publikasyon na ini na masabotan an katotoohan na dai noarin man nanonodan kan kadaklan na tawo. Gusto daw nindong basahon iyan?” Ialok an angay na libro o brosyur.
7 Sa pankagabsan iginagalang kan mga Budista an Biblia bilang sarong sagradong kasuratan. Kaya magbasa dian nin direkta. (Heb. 4:12) Kun ikinahahandal kan tawong iyan an impluwensia kan kultura nin Solnopan, sambiton sa saiya na an gabos na kagsurat sa Biblia taga Asia.
8 Arin na mga Publikasyon an Pinakaepektibo? Apuera sa satong mga pulyeto, na makukua sa Intsik, dakol na parahayag an mapangganang naggamit kan minasunod na babasahon: an mga librong Mankind’s Search for God, An Sekreto sa Kaogmahan nin Pamilya, asin Questions Young People Ask—Answers That Work; an mga brosyur na “Uya! Ginigibo Kong Bago an Gabos na Bagay,” asin What is the Purpose of Life—How Can You Find It?; asin, kun igwa pa, an Kingdom News Num. 35, na Magkakaminorootmootan Pa daw an Gabos na Tawo?An kadaklan na Budista na ngonyan nakanonood kan katotoohan pinag-aadalan nguna an brosyur na Kahagadan dangan an librong Kaaraman.
9 Dawa ngani sinasabi na an mga misyonerong Budista nag-abot sa Atenas haros 400 na taon bago si Pablo naghulit duman, dai masierto kun baga nakanupar sia nin tawo na naimpluwensiahan kan ideya nin mga Budista. Minsan siring, talagang aram niato kun ano an saboot ni Pablo dapit sa pagpapatotoo sa gabos na klase nin tawo. Ginibo nia an saiyang sadiri na ‘oripon sa gabos’ tanganing sia ‘sa gabos na paagi makapagligtas nin nagkapira.’ (1 Corinto 9:19-23) Magigibo man niato iyan paagi sa pagpaheling nin personal na interes sa mga tawo asin paagi sa pagdodoon kan komun na paglaom niato mantang kita nagpapatotoo sa gabos na nanonompongan niato.