Hapot

◼ Preparado daw kamo para sa sarong emerhensia?

Ngonyan, “an panahon asin pagkanorongod” sa parate nagbubunga nin medikal na emerhensia. (Ecl. 9:11) Tanganing makapag-andam kita sa siring na kaaabtan, si Jehova nagtao nin tabang paagi sa saiyang organisasyon, alagad naglalaom sia na gigibohon ta an satong kabtang. Yaon sa ibaba an sarong listahan tanganing tumabang sa saindo.

• Perming darahon an pinakabagong Advance Medical Directive/Release card.

• Siertohon na dara kan saindong mga aki an pinakabagong Identity Card.

• Repasohon an suplemento kan Enero 1993 na An Satong Ministeryo sa Kahadean, na ineensayo kun paano mangangatanosan sa mga doktor mapadapit sa pagbolong kan saindong aki.

• Repasohon an mga artikulo manongod sa mga elemento nin dugo asin mga pansalida sa dugo. (Irinerekomendar: An Torrengbantayan, Oktubre 1, 1994, pahina 31; The Watchtower, Hunyo 1, 1990, pahina 30-1; Marso 1, 1989, pahina 30-1; Awake!, Disyembre 8, 1994, pahina 23-7; Agosto 8, 1993, pahina 22-5; Nobyembre 22, 1991, pahina 10; asin an mga suplemento kan An Satong Ministeryo sa Kahadean, Enero 1993 asin Pebrero 1991. Ilaag sa sarong polder tanganing madaling kuanon.)

• Magdesisyon sono sa konsensia kun puede nindong itogot an paggamit nin mga aparato na pinaluluwas an dugo sa hawak dangan ibinabalik liwat o kun puede nindong akoon an mga produkto na igwa nin mga elemento nin dugo.

• Bago dumuman sa ospital, sagkod sa mapupuede, paisihon an kamagurangan tanganing matabangan ninda kamo asin makikomunikar sa Hospital Liaison Committee (HLC) kun kinakaipuhan.

Linawon an Saindong Pagsayuma sa Dugo: An mga report nagpapaheling na may mga tugang na naghahalat pa sagkod sa ultimong minuto tanganing sabihan an doktor na dai sinda maako nin dugo. Bako ining makatanosan para sa medikal na personahe asin ilinalaag kamo sa peligro na maineksionan nin dugo. Kun aram kan mga doktor an saindong kombiksion asin an saindong kahagadan suportado nin pirmadong mga dokumento na nagsasabi kan saindong espesipikong mga instruksion, nakatatabang iyan sa sainda na dai mag-atraso asin sa parate nagtatao sa sainda nin dugang pang mga opsion para sa medikal na pagbolong na daing dugo.

Huli ta an medikal na emerhensia puedeng mangyari sa ano man na oras, na sa parate sa pinakadai mo linalaoman, gumibo na ngonyan nin mga lakdang tanganing protehiran an saindong sadiri asin an saindong mga aki sa pag-ineksion nin dugo.​​—Tal. 16:​20; 22:3.