An Tunay na Pagsamba Naghihiwas sa Sirangan na Europa
1 An mga Kristiano kan enot na siglo maigot na mga parahulit kan Kahadean. Sinda naggayagaya kan an mga kongregasyon ‘nagdakol an bilang aroaldaw.’ (Gibo 16:5) Huli sa mapuso nindang paghuhulit an tunay na pagsamba nakaabot sa Asia, Aprika, asin Europa, na nagresulta sa nagsosopay na ani nin nagturubod.
2 Sa panahon na ini kan katapusan, an tunay na pagsamba nagpapadagos na humiwas, partikularmente sa kadagaan kan Sirangan na Europa. Sa mga nasyon na kun saen prohibido kita kan gobyerno sagkod kaidtong pagpopoon kan mga taon nin 1990, naeeksperyensiahan na niato ngonyan an pambihirang mga pag-oswag. An 1999 Yearbook naghahayag na an duwa kan siring na mga nasyon, an Rusya asin Ukraine, pareho nagreport nin labing 100,000 na parahayag na nakikikabtang sa ministeryo sa publiko. Sa 15 teritoryo kan dating Unyon Sobyet, poon kan 1991 labi sa 220,000 katawo an nagdusay kan saindang sadiri ki Jehova asin nabautismohan! Huli sa marikas na pag-oswag na ini kinaipuhan na magtogdok nin dakol na bagong Kingdom Hall asin Assembly Hall patin pahiwason an dakol na pasilidad nin mga sangang opisina.
3 An sarong kabtang kan Pondo sa Kingdom Hall kan Sosyedad ginagamit na ngonyan sa pagtao nin pautang sa mga kongregasyon sa kadagaan na nangangaipong marhay nin dakol na Kingdom Hall alagad limitado an kuarta asin grabe an problema sa pagbuhay. Sa pag-oltanan kan Marso 1996 asin Oktubre 1998, inaprobaran kan Sosyedad an 359 pag-utang para sa Kingdom Hall hale sa mga sangang opisina na nagdidirehir sa 11 kadagaan sa Sirangan na Europa. An ikinontribwir na mga pondo ginagamit sa pagbakal nin mga daga asin materyales para sa pagtogdok nin bagong mga Kingdom Hall asin sa pagtabang sa mga kongregasyon sa paghirahay sa nag-eeksister nang mga pasilidad. An mga retratong ipinaheheling digdi nagtatao sato nin ideya kun paano an mga kontribusyon sa Pondo sa Kingdom Hall kan Sosyedad sa Estados Unidos asin sa ibang nasyon nakatatabang sa satong mga tugang sa Sirangan na Europa.
4 Durante kan 1998, an Bulgaria nakaeksperyensia nin 12 porsientong aumento, asin an mga tugang naogmang marhay kan an saindang pinakaenot na Kingdom Hall idinedikar kan Abril kan taon na idto. An Croatia nagkaigwa nin 4 na porsientong aumento, asin sa presente an mga tugang duman nagtotogdok nin dugang pang mga Kingdom Hall, tanganing paoswagon an tunay na pagsamba. Sa Hungaria mga 80 Kingdom Hall an ginagamit kan 144 kongregasyon. Ini nangangahulogan na sa 235 kongregasyon sa nasyon na iyan, 61 porsiento an igwa nin sadiring lugar nin pagsamba. Sa Macedonia an programa sa pagtogdok nin Kingdom Hall nakahaman nin duwang bagong hall, asin dakol pa an hinahaman. Kan tig-init nin 1999, sarong dobleng Kingdom Hall an natapos sa kabiserang siudad nin Skopje. An hall na ini puedeng gamiton nin kisuerra anom na kongregasyon.
5 Kan nakaaging taon sa Rusya, sa promedyo, labi sa 260 persona an nababautismohan kada semana! Sinusundan an arogan na ginamit sa ibang nasyon, an sangang opisina sa Rusya nakaorganisar na ngonyan nin 12 Rehional na Komite sa Pagtogdok sa mahiwas nindang teritoryo, tanganing suportaran an mga proyekto sa pagtotogdok nin Kingdom Hall sa ngapit. Sa parteng amihanan kan St. Petersburg, pinoponan na an pagtogdok sa pinakaenot na Assembly Hall sa nasyon na iyan, na puedeng matukawan nin 1,600. Kabale man sa pasilidad an limang Kingdom Hall na igwa nin 200 na tukawan an lambang saro. Tanganing ikatao an espirituwal na mga pangangaipo kan satong mga tugang asin dakol na interesado sa Ukraine, 84 Kingdom Hall an natapos na asin 80 an itinotogdok pa.
6 Bako daw na an pag-oswag na ini sa Sirangan na Europa nagtatao nin kagayagayahan sa satong puso? Saen man kita nakaistar, an paghiwas kan tunay na pagsamba nagpapagirumdom sa sato na an Dios daing pagpalaenlaen asin na an saiyang pagpasensia mangangahulogan nin kaligtasan para sa “dakulang kadaklan.” (Kap. 7:9; 2 Ped. 3:9) Kanigoan na pribilehio an yaon sa sato sa pagkaigwa nin sadit na kabtang sa pagkontribwir sa espirituwal na pag-oswag kan iba, dawa kan mga yaon sa hararayong kadagaan! An Talinhaga 28:27 nag-aasegurar sa sato na “an nagtatao sa dukha dai magkukulang.” An pagigin andam niatong tumabang na mataparan an mga gastos na ini sa pagtogdok nagbubunga nin ‘pagpapantaypantay’ nin materyal na mga bagay, na pinapangyayari an gabos na makamate kan kaogmahan na gikan sa pagtatao asin kan kagayagayahan na resulta kan pakaheling sa paghiwas kan tunay na pagsamba sa bilog na kinaban.—2 Cor. 8:14, 15; Gibo 20:35.
[Retrato sa pahina 3]
Săcele, Romania
[Retrato sa pahina 3]
Maardu, Estonia
[Retrato sa pahina 3]
Sevnica, Slovenia
[Retrato sa pahina 3]
Tiszavasvári, Hungaria
[Mga retrato sa pahina 4]
Jūrmala, Latvia
[Mga retrato sa pahina 4]
Tallinn, Estonia
[Mga retrato sa pahina 4, 5]
Taurage, Lituania
[Mga retrato sa pahina 4, 5]
Belgrade, Yugoslavia
[Mga retrato sa pahina 5]
Prievidza, Slovakia
[Mga retrato sa pahina 5]
Mátészalka, Hungaria
[Mga retrato sa pahina 6]
Vranov nad Topl’ou, Slovakia
[Retrato sa pahina 6]
Ruma, Yugoslavia
[Mga retrato sa pahina 6]
Tornakalns, Latvia