Magin ‘Sibot na Gayo’ sa Saindong Ministeryo
1 Kan mabasa niato na si apostol Pablo nagtrabaho sa paggibo nin tolda mientras na nasa Corinto, tibaad magkonklusyon kita na ini nakalimitar sa saiyang oportunidad na maghulit. Minsan siring, an Gibo 18:5 nagsasaysay: “Si Pablo nagpoon na masibot na gayo sa tataramon, na nagpapatotoo sa mga Judio tanganing patunayan na si Jesus iyo an Cristo.” Taano si Pablo ta nagin sibot na marhay sa aktibidad na paghuhulit? Dawa ngani an dakol sa Corinto nagin nang mga nagtutubod, kinompirmar kan Kagurangnan na dakol pang disipulo an magigibo sa siudad na iyan. (Gibo 18:8-11) Igwa daw kita nin kaagid na dahelan na magin sibot na gayo sa satong ministeryo? Igwa. Dakol pang tawo an manonompongan asin matotokdoan kan katotoohan.
2 Gumamit nin Orog Pang Panahon sa Paglilingkod Ngonyan na Abril: Posibleng marhay na pasohan nindo na magpadagos na sibot sa paghuhulit kan maogmang bareta bulan-bulan. Alagad may nagkapirang bulan na nagtatao sa sato nin mas dakol na oportunidad na magin ‘sibot na gayo’ sa aktibidad na ini. Kaiba digdi an bulan nin Abril, na nasa kasagsagan kan panahon nin Memorial. Tinogotan daw kamo kan mga kamugtakan nindo na mag-auxiliary payunir o dugangan an saindong paghihingoa sa ministeryo sa panahon na ini? An dakol na parahayag na naggigibo kaiyan binendisyonan nin igo. (2 Cor. 9:6) Kun ginigibo nindo an bilog nindong makakaya, girumdomon na si Jehova naoogma sa saindong bilog na kalag na paglilingkod. (Luc. 21:2-4) Ano man an saindong kamugtakan, gibohon na pasohan nindo na magin ‘sibot na gayo’ sa saindong ministeryo ngonyan na Abril. Asin dai paglingawan na itao an saindong report nin paglilingkod sa langtad sa katapusan kan bulan tanganing an saindong paghihingoa ikaiba sa kabilangan kan iba pa sa banwaan ni Jehova.
3 Dalawon an mga Bagohan na Nag-atender sa Memorial: Sa Pilipinas kan nakaaging taon, an kabilangan nin mga nag-atender sa Memorial 413,023. An total na kabilangan nin mga nag-atender sa taon na ini dai pa aram. Pero, ipinaheheling nin mga report na igwa nin marahayon na potensial para sa mas dakol pang “anihon.” (Mat. 9:37, 38) Kun siring, sa pinakamadaling panahon, iareglo na dalawon an mga interesado na nag-atender sa Memorial tangani na tabangan sinda sa espirituwal na paagi. An pagdigson kan siring na mga pagdalaw puedeng magtaong lugar sa ‘maraot na agawon an tataramon kan kahadean na nakasabwag sa saindang puso.’ (Mat. 13:19) An listong pagdalaw magpapaheling na kamo tunay na ‘sibot na gayo’ sa saindong ministeryo.
4 Padagos na Tabangan an mga Inaktibo: Nagpoon kan Pebrero an sarong espesyal na paghihingoa na matabangan an mga inaktibo. Kun igwa nin nagkapira na dai pa nasosongko sa pagpastor, maninigong iareglo kan kamagurangan na dalawon sinda haloy pa bago matapos an Abril. Hihingoahon kan kamagurangan na aramon an pundamental na dahelan kan problema kan indibiduwal asin kun paano pinakamarahay na matatabangan sia na maglingkod giraray nin aktibo ki Jehova. An mamomoton na tabang na ini nagpapaheling na sineseryoso kan kamagurangan an saindang paninimbagan bilang mga pastor kan “aripompon nin Dios.” (1 Ped. 5:2; Gibo 20:28) An luwas kan An Torrengbantayan na Setyembre 15, 1993, pahina 22-3, nagtatao nin ekselenteng mga suhestion na magagamit kan kamagurangan kun tinatratar an saro sa limang tipikong problema na tibaad nakaaapektar sa mga inaktibo. An totoo, an nagkapira puede pang mareaktibar sa ministeryo sa langtad ngonyan na Abril.
5 Tabangan an Dakol Pa na Magin Dai Pa Bautisadong mga Parahayag: Nakualipikar na daw an saindong mga aki bilang bagohan na mga parahayag kan maogmang bareta? Kumusta man an iba na inaadalan nindo sa Biblia? Kun sinda aprobado na kan kamagurangan, dai daw an Abril magigin angay na panahon na sinda magpoon sa pagpahayag? Kun an saro nag-ooswag asin napag-adalan na an brosyur na Kahagadan asin an librong Kaaraman, puedeng ipadagos an pag-adal sa Biblia sa ikaduwang libro—magsalang an librong God’s Word, an librong Tunay na Katoninongan, o an librong Nagkakasararo sa Pagsamba. An pasohan nindo tabangan an inaadalan na magkaigwa nin orog na pakarorop sa katotoohan, makualipikar bilang dai pa bautisadong parahayag, asin magin sarong nagdusay patin bautisadong Saksi ni Jehova.—Efe. 3:17-19; 1 Tim. 1:12; 1 Ped. 3:21.
6 An daing liwat-liwat asin tunay na interes nindo sa mga inaadalan nindo sa Biblia puedeng makatabang sa sainda pag-abot nin panahon na isapuso an katotoohan. An sarong Saksi nakanompong nin sarong may edad nang mag-agom na bilog na pusong uminoyon na mag-adal sa Biblia. Alagad idinigson kan mag-agom an pag-adal sa sunod-sunod na tolong semana. Sa katapustapusi naponan an pag-adal. Dangan, kinanselar kan mag-agom an pag-adal nin haros kada ikaduwang semana. Pero, sa katapustapusi, nag-oswag an agom na babae sagkod sa bautismo. “Pakabautismo sa saiya,” an paggirumdom kan tugang na lalaki, “napano an saiyang mga mata nin luha nin kaogmahan, na nagpaluha man sa samong mag-agom huli sa kaogmahan.” Iyo, an pagigin ‘sibot na gayo’ sa maogmang bareta nagtatao nin dakulang kagayagayahan!
7 An mga hula sa Biblia asin mga pangyayari sa kinaban nagpaparisa na kita nabubuhay na sa poro kan panahon kan katapusan. Ngonyan na an panahon na an gabos sa banwaan nin Dios kaipuhan na magin ‘sibot na gayo’ sa pagpaaram sa iba kan maogmang bareta. Si apostol Pablo nagtatao nin garantiya na an siring na pagpapagal talagang “bakong sayang sana dian sa Kagurangnan.”—1 Cor. 15:58.