Mga Magurang—Patoodon an mga Aki Nindo Poon sa Pagkaomboy
1 “Patoodon mo an aki oyon sa dalan para sa saiya; minsan kun sia maggurang dai sia masiko dian.” (Tal. 22:6) Mga magurang, kun habo nindo na an saindong mga aki ‘magsiko’ parayo sa dalan kan katotoohan, noarin maninigong pumoon an siring na pagpatood? Poon sa pagkaomboy!
2 Kan sabihon ni Pablo na an espirituwal na edukasyon ni Timoteo “poon sa pagkaomboy,” minalataw na an boot niang sabihon poon sa pagkaaki. (2 Tim. 3:14, 15) Bilang resulta, nagtalubo si Timoteo na nagin marahayon na espirituwal na tawo. (Fil. 2:19-22) Mga magurang, kamo man dapat na magpoon “poon sa pagkaomboy” sa pagtao sa saindong mga aki kan pagpatood na kaipuhan ninda tangani na ‘dumakula kaiba ni Jehova.’—1 Sam. 2:21.
3 Itao an Tubig na Kaipuhan Ninda Tangani na Tumalubo: Kun paanong an lumbod pang mga kahoy nangangaipo nin dayaday na suplay nin tubig tangani na tumalubo na magin halangkaw na mga kahoy, an mga aki ano man an edad kaipuhan na masagom kan tubig nin katotoohan sa Biblia tangani na tumalubo na magin maygurang na mga lingkod nin Dios. An pangenot na paagi nin pagtotokdo sa mga aki kan katotoohan asin pagtabang sa sainda na magin dayupot ki Jehova iyo an regular na pampamilyang pag-adal sa Biblia. Alagad mga magurang, konsideraron an lawig nin oras na makakokonsentrar an lambang aki. Para sa sadit na mga aki, posibleng marhay na an dayaday na pinahalipot na mga sesyon nin pagtotokdo magigin mas epektibo kisa pira sanang halawig na pagtotokdo.—Deut. 11:18, 19.
4 Nungkang menoson an potensial kan saindong mga aki na makanood. Mag-estorya sa sainda manongod sa mga personahe sa Biblia. Ipadrowing sa sainda an mga eksena sa Biblia o iakto an mga pangyayari sa Biblia. Gamiton nin tama an satong mga video asin audiocassette, kaiba an mga drama sa Biblia. Ibagay an pampamilyang pag-adal sa edad asin abilidad na makanood kan mga aki nindo. An enot na pagpatood simple sana, na padikitdikit; alagad mantang nagdadakula an aki, an pagpatood sa saiya maninigong magin detalyado asin progresibo. Gibohon na bibo asin may pagkalaenlaen an pagtotokdo sa Biblia. Boot nindo na an mga aki nindo ‘magkaigwa nin pagmawot’ sa Tataramon, kaya gibohon nindo na interesante an pag-adal sagkod sa mapupuede.—1 Ped. 2:2.
5 Ilabot Sinda sa Kongregasyon: Magbugtak nin progresibong mga pasohan para sa saindong mga aki tangani na sinda magin lubos na kalabot sa kongregasyon. Ano an puedeng magin enot na pasohan ninda? An mga magurang nin duwang sadit na aki nagsabi: “An duwa nagpoon na mag-ako nin pagpatood na tumukaw nin toninong sa Kingdom Hall.” Pagkatapos, tabangan an mga aki na magkomento sa mga pagtiripon sa sadiri nindang mga tataramon asin gibohon na pasohan ninda na magpalista sa Teokratikong Paadalan sa Pagmiministro. Sa paglilingkod sa langtad, an marahay na mga pasohan na magigibo iyo an pag-alok nin pulyeto sa pinto, pagbasa nin sarong teksto, pag-atubang nin magasin, asin pakipag-olay nin makahulogan sa mga kagharong.
6 Magtao nin Entusiastikong Halimbawa: An mga aki daw nindo aroaldaw na nadadangog kamong nagtataram manongod ki Jehova asin namimibi sa saiya? Naheheling daw ninda kamo na nag-aadal kan saiyang Tataramon, nag-aatender sa mga pagtiripon, nakikikabtang sa ministeryo sa langtad, asin naoogmang marhay sa paggibo kan kabotan nin Dios? (Sal. 40:8) Mahalagang marhay na naheheling ninda iyan saindo asin na magkairiba nindong gibohon an mga bagay na ini. An sarong husto na sa edad na aking babae nagsabi manongod sa saiyang ina, na nagpadakula nin anom na aki na magin fiel na mga Saksi: “An pinakanakatudok sa isip niamo iyo an halimbawa mismo ni Nanay—iyan mas epektibo kisa sinasabi.” An sarong magurang nin apat na aki nagsabi: “An ‘Enoton si Jehova’ bako sanang pamilyar na mga tataramon kundi iyo an paagi kan samong pamumuhay.”
7 Mga magurang, pumoon nin amay sa pagpatood sa mga aki nindo, na tinotokdoan sinda kan katotoohan hale sa Tataramon nin Dios, na nagbubugtak nin progresibong mga pasohan, asin nagtatao kan pinakamarahay na posibleng halimbawa. Maoogma kamo na ginibo nindo iyan!