Magayagayang Kasaro ni Jehova Asin kan Saiyang Aki
An Pinakamahalagang Okasyon kan Taon Seselebraron sa Marso 28
1 Paagi sa pagselebrar kan Pamanggihan nin Kagurangnan pagkasolnop kan saldang sa Marso 28, 2002, ipinaheheling niato an satong magayagayang pagkasararo kaiba ni Jehova Dios asin ni Jesu-Cristo. Sa espesyal na marhay na okasyon na iyan, makakamtan kan natatada kan linahidan na mga Kristiano an espesyal na “pakisumaro” ninda kaiba an ibang mga paramana kan Kahadean, kan Ama, asin kan saiyang Aki. (1 Juan 1:3; Efe. 1:11, 12) Pepensaron kan minilyon na “ibang karnero” an saindang makangangalas na pribilehio na makisaro ki Jehova asin sa saiyang Aki, na nagkakasararo an puso asin isip kaiba ninda sa paghaman kan gibohon nin Dios!—Juan 10:16.
2 Nagtatarabangan na may Dayupot na Relasyon: Si Jehova asin si Jesus haloy nang magayagayang nagkakasaro. Haloyon na panahon na sindang dayupot na magkaibanan bago pa lalangon an tawo. (Miq. 5:2) Sa siring nagtalubo an sarong makosogon na bungkos nin mamomoton na kapadangatan sa pag-oltanan nindang duwa. Bilang kadonongan na napersonipikar, an panganay na Aki na ini makapagsasabi mapadapit sa saiyang buhay bago nagin tawo: “Ako an nangongorog niang [ni Jehova] kinaoogmahan sa aroaldaw, mantang ako maogma sa atubangan nia sa gabos na panahon.” (Tal. 8:30) An haraning marhay na pakikiasosyar sa Burabod nin pagkamoot sa laog nin dai mabilang na panahon nagkaigwa nin hararom na epekto sa Aki nin Dios!—1 Juan 4:8.
3 Nasa isip an pangangaipo nin pagkabalukat kan katawohan, pinili ni Jehova an saiyang Aking bugtong, na espesyalmenteng naoogma sa mga tawo, na magtao kan atang na pantubos, na nagtatao kan satong solamenteng paglaom. (Tal. 8:31) Kun paanong si Jehova asin an saiyang Aki nagkakasaro sa paghaman nin sarong katuyohan, kita man danay na nakikisaro sa sainda asin sa balang saro sa bungkos nin makosog na pagkamoot, na magayagayang ginigibo an kabotan nin Dios.
4 Ipinaheheling an Satong Odok sa Pusong Pag-apresyar: Paagi sa pagigin presente sa Memorial asin maingat saka magalang na paghinanyog, ikapaheheling niato an satong tunay na pag-apresyar sa pagkamoot ni Jehova sagkod sa atang kan saiyang Aki para sa sato. Itatampok an mamomoton na halimbawa ni Jesus, an saiyang pagigin fiel sagkod sa kagadanan sa pagtao kan pantubos, asin an saiyang pamamahala bilang Hade kan inestablisar na Kahadean nin Dios, siring man an mga bendisyon na itatao kan Kahadean sa katawohan. Ipapagirumdom man sa sato an pangangaipo na ipaheling an satong pagtubod nin dagos-dagos, na maigot na naggigibo kaoyon kan kabotan ni Jehova bilang “mga kapwa trabahador sa katotoohan.”—3 Juan 8; Sant. 2:17.
5 Pagtabang sa Iba na Makikabtang Kaiba Niato: Maninigong gumibo nin espesyal na paghihingoa an kamagurangan na enkaminaron an gabos na inaktibong Saksi sa teritoryo na mag-atender sa Memorial kan Kagadanan ni Cristo. (Mat. 18:12, 13) Gumibo nin lista kan mga dadalawon tangani na mayong malipasan asin gabos personal na maimbitaran.
6 May iba pa daw kamong midbid na puedeng umatender sa Memorial? Magsadiring boot na parigonon an saindang pag-apresyar sa okasyon na ini. Mainit na imbitaran sinda, asin ipamate sa sainda na sinda maogmang inaako. Gibohon niato an satong pinakamakakaya na imbitaran sa pinakamahalagang okasyon na ini kan taon an gabos niatong estudyante sa Biblia asin an iba pang interesadong tawo, siring man an mga miembro nin pamilya asin kamidbid. An pakinabang kan pantubos makukua pa kan gabos na nakakanood kan “daing kaagid na halaga kan kaaraman manongod ki Cristo Jesus.” (Fil. 3:8) An mga naggigibo nin pagtubod sa atang ni Cristo puedeng magkamit kan marigon na paglaom na buhay na daing katapusan.—Juan 3:16.
7 Nungkang menoson an puedeng magin epekto kan Memorial sa sinserong mga tawo. Duwang taon na an nakaagi sa islang nasyon nin Papua New Guinea, 11 interesado an nagbiahe sakay nin sarong sadit na baroto sa laog nin 17 oras sa maalon na dagat tangani na makaatender. Taano? Sinabi ninda: “Gusto niamong iselebrar an Memorial ni Cristo kaiba nin mga kapwa nagsasamba ki Jehova; kaya sulit an biahe.” Isip-isipa an kaigotan na ipinaheling kan mga interesadong idto asin an saindang pag-apresyar sa pagigin magayagayang kasaro ni Jehova, kan saiyang Aki, asin kan Kristianong kasararoan nin magturugang!
8 Mag-alok nin pag-adal sa Biblia sa gabos na interesado. Enkaminaron sinda na regular na mag-atender sa mga pagtiripon kan kongregasyon asin ihiras sa iba an mga katotoohan na nanonodan ninda. Tabangan sinda na ‘maglakaw sa liwanag’ asin na ‘gibohon an katotoohan’ paagi sa pag-aplikar kan mga prinsipyo sa Biblia sa saindang buhay. (1 Juan 1:6, 7) Tabangan sinda na mapatalubo an sarong dayupot na relasyon ki Jehova asin na padagos na magtalubo sa pag-apresyar sa pribilehio nin paggibo kan saiyang kabotan na nagkakasararo.
9 Kanigoan kamakangangalas na pribilehio na magin magayagayang kasaro “sa sarong espiritu, na sa sarong kalag daramay na naghihingoa para sa pagtubod sa maogmang bareta”! (Fil. 1:27, 28) Antisiparon niato an satong nakaoogmang asosasyon sa Memorial sa Marso 28, na pirmeng mapagpasalamat ki Jehova asin sa saiyang Aki!—Luc. 22:19.