Kun Paano Papagdadanayon an Kaigotan

¹ An kaigotan ni Apolos sa paggibo kan saiyang ministeryo puedeng magpagirumdom sa sato dapit sa mga kapwa Kristiano ngonyan na nangorognang maigot sa paghuhulit. (Gibo 18:24-28) Pero, sinasadol kita gabos: “Dai kamo maghinugak sa saindong gibohon. Magin malaad sa espiritu.” (Roma 12:11) Ano an makakatabang sa sato na magkaigwa asin papagdanayon an kaigotan para sa Kristianong ministeryo?

² An Kaigotan Nagkokosog Paagi sa Kaaraman: Pagkatapos na si Jesus magpaheling sa duwa kan saiyang mga disipulo asin “ininterpretar nia sa sainda an mga bagay manongod sa saiya sa bilog na Kasuratan,” sinda nagsabi: “Bakong naglaad an satong puso mantang nagtataram sia sa sato sa dalan?” (Luc. 24:27, 32) Kaagid kaiyan, bako daw na garo naglalaad an satong puso huli sa kaogmahan kun nadadagdagan an pakasabot niato sa Tataramon nin Dios? Iyo, an pagtubod nagkokosog paagi sa kaaraman. An Roma 10:17 nagpapaliwanag: “An pagtubod minasunod sa bagay na nadangog.” Kun an satong puso pano nin kompiansa sa mga panuga ni Jehova, dai nanggad niato magigibong umontok sa pagtaram manongod sa mga bagay na nanodan niato!—Sal. 145:7; Gibo 4:20.

³ Tangani na mapagdanay na makosog an satong pagkamoot sa Dios asin malaad an satong kaigotan sa paglilingkod sa saiya, dai kita puedeng magsarig sana sa kaaraman na nakua niato sa pag-adal kaidto. Dapat na padagos niatong pahiwason an satong pakasabot sa katotoohan asin pararomon an satong pagkamoot ki Jehova. Ta kun dai, an paglilingkod niato sa saiya puedeng luway-luway na magin mekanikal na sana. (Kap. 2:4) Sinasadol kita kan Tataramon nin Dios na ‘padagos na umoswag sa tamang kaaraman dapit sa Dios.’—Col. 1:9, 10.

⁴ An Satong Ugale sa Pag-adal: Kun siring, marahay na siyasaton niato an satong ugale sa pag-adal. Halimbawa, tibaad nahihimo niatong markahan an mga simbag sa pag-aadalan na artikulo sa Torrengbantayan asin nakakapagtao nin tamang mga komento. Alagad hineheling daw niato an sitadong mga teksto asin hinohorophorop kun paano aplikado sa satong buhay an pag-aadalan? Sa semanal na babasahon sa Biblia, naghihingoa daw kitang gumibo nin dagdag na pagsiyasat kun itinotogot kan satong kamugtakan asin horophoropon an mga leksion na yaon dian? (Sal. 77:11, 12; Tal. 2:1-5) Kanigoan kapakipakinabang na pensaron asin tawan nin lubos na atension an Tataramon nin Dios! (1 Tim. 4:15, 16) An siring na makahulogan na pag-adal sususteniran kita asin papakosogon kita na magin “maigot sa marahay na mga gibo.”—Tito 2:14.