Kun Paano Gagamiton an Librong “Pagkamoot nin Dios” sa Pagkondukta nin mga Pag-adal sa Biblia
1. Ano an katuyohan kan librong “Pagkamoot nin Dios”?
1 Ogmahon nanggad kita kan maresibi niato an bagong libro na “Magdanay Kamo sa Pagkamoot nin Dios” sa satong “Ginigiyahan kan Espiritu nin Dios” na Pandistritong Kombension! Arog kan ipinaisi, dinisenyo an librong ini tanganing tabangan kitang aramon asin kamotan an mga pamantayan ni Jehova sa paggawe asin bakong tanganing itokdo an pundamental na mga doktrina kan Biblia. Dai niato iaalok an librong ini sa harong-harong.
2. Paano gagamiton an librong ini, asin kiisay ini maninigong gamiton?
2 An librong ini magseserbing ikaduwang publikasyon na gagamiton sa pakikipag-adal sa mga inaadalan sa Biblia pagkatapos kan librong Itinotokdo kan Biblia. Girumdomon nindo na magkakalaen an rikas nin espirituwal na pag-oswag kan mga tawo. An rikas kan lambang pag-adal maninigo na gibohon sa paaging dai nasasakitan an inaadalan sa Biblia. Seguradohon na malinaw niang nasasabotan an pinag-aadalan. Sa kadaklan na kamugtakan, dai maninigong gamiton an librong ini tanganing ponan giraray nin pag-adal sa Biblia an mga tawong tibaad nag-adal na nin nagkapirang libro kaidto alagad dai nag-aatender sa mga pagtiripon kan kongregasyon asin maliwanag na dai interesadong ioyon an saindang pamumuhay sa mga katotoohan sa Biblia na itinokdo sa sainda.
3. Ano an maninigo niatong gibohon kun nagkokondukta kita ngonyan nin pag-adal sa librong Worship God?
3 Kun nagkokondukta kamo ngonyan nin pag-adal sa librong Worship God asin nasa huring pirang kapitulo na sana, puede kamong magdesisyon na taposon an librong iyan asin dagkahon an inaadalan sa Biblia na basahon na sana nia an librong “Pagkamoot nin Dios.” Kun dai pa, pinakamarahay na magbalyo sa bagong libro asin magpoon sa kapinonan. Arog kan librong Itinotokdo kan Biblia, nasa saindo na kun pag-oolayan nindo an mga topiko sa apendise.
4. Ano an maninigo niatong gibohon kun an satong inaadalan sa Biblia nabautismohan na bago pa matapos an mga librong Itinotokdo kan Biblia asin “Pagkamoot nin Dios”?
4 Kun an inaadalan sa Biblia nabautismohan na bago pa matapos an duwang libro, kun siring maninigo na ipagpadagos an pag-adal sagkod na matapos an librong “Pagkamoot nin Dios.” Minsan ngani bautisado na an inaadalan sa Biblia, puede nindong ireport an oras, pagdalaw liwat, asin pag-adal. An parahayag na nag-iiba sa saindo asin nakikikabtang sa pag-adal puede man na magreport nin oras.
5. Paano puedeng gamiton an librong “Pagkamoot nin Dios” sa pagtabang sa mga parahayag na nagin inaktibo sa laog nin harohalawig na panahon?
5 Kun inasignaran kamo nin sarong miembro kan Komite sa Paglilingkod kan Kongregasyon na konduktahan nin pag-adal sa Biblia an saro na nagin inaktibo sa paghuhulit, tibaad hagadon sa saindo na adalan sia sa espesipikong mga kapitulo sa librong “Pagkamoot nin Dios.” Dai kaipuhan na magparahaloy kun nagkokondukta kan siring na mga pag-adal. Sarong marahayon nanggad na probisyon an bagong librong ini, na dinisenyo tanganing tabangan kitang magdanay “sa pagkamoot nin Dios”!—Jud. 21.