Mapoon sa Abril 2 an Pagdistribwir kan mga Imbitasyon sa Memorial
1. Noarin kita madistribwir nin mga imbitasyon para sa Memorial ngonyan na taon, asin ano an halaga kan taonan na kampanyang ini?
1 Poon Abril 2 sagkod Abril 17, madistribwir kita nin mga imbitasyon para sa pinakaimportanteng okasyon kan taon—an Memorial kan kagadanan ni Cristo. Kan nakaagi, dakol na interesado an naghimate sa taonan na kampanyang ini. Halimbawa, kan aldaw kan Memorial, sarong babae an nag-apod sa sangang opisina asin nagsabi: “Kaaabot ko pa sana sa harong, asin may imbitasyon na nakalaag sa irarom kan samong pinto. Gusto kong magduman, pero dai ako segurado sa oras.” Ipinaliwanag kan tugang na lalaki kun saen sa imbitasyon maheheling an impormasyon na ini. Bago magpaaram an babae, sia nanuga, “Maatender ako sa okasyon nindo atyan na banggi!”
2. Ano an puede tang sabihon kun ipinepresentar an imbitasyon?
2 Kun Paano Niato Iyan Gigibohon: Huling limitado sana an panahon niato tanganing matapos an bilog na teritoryo, pinakamarahay na halipot sana an presentasyon. Puede tang sabihon: “Kumusta. Gusto ming itao sa pamilya nindo an imbitasyon na ini para sa sarong importanteng taonan na selebrasyon na gigibohon sa bilog na kinaban sa Domingo, Abril 17. [Itao sa kagharong an imbitasyon.] An petsang iyan iyo an anibersaryo kan kagadanan ni Jesus. Magkakaigwa nin sarong libreng pahayag basado sa Biblia na magpapaliwanag kun paano kita puedeng makinabang sa pantubos ni Cristo. Yaon sa imbitasyon na iyan an adres asin oras kan pagtiripon na gigibohon sa satong lugar.”
3. Paano kita makakapag-imbitar nin pinakadakol na tawo na mapupuede?
3 Kun dakula an teritoryo kan kongregasyon, an kamagurangan puedeng magtao sa saindo nin instruksion na magwalat nin imbitasyon sa mga harong na mayo nin tawo, kun puede iyan na ilaag sa parte kan harong na dai talaga maheheling nin iba. Seguradohon na imbitaran an saindong mga dinadalaw liwat, paryente, katrabaho, kaeskuela, asin iba pang kamidbid. Kun nakikikabtang sa pagdistribwir sa katapusan kan semana, mag-alok nin mga magasin kun angay. Puede daw kamong mag-auxiliary payunir durante kan Abril asin orog na makikabtang sa nakakaogmang kampanyang ini?
4. Taano ta bobooton niatong mag-atender sa Memorial an mga interesado?
4 Dakulang patotoo nanggad an madadangog kan mga interesado na maatender! Madadangog ninda an dapit sa dakulang pagkamoot ni Jehova paagi sa pagtao kan pantubos. (Juan 3:16) Manonodan ninda kun paano an katawohan makikinabang sa Kahadean nin Dios. (Isa. 65:21-23) Iimbitaran man sinda na magdolok sa mga attendant asin makiolay na adalan sinda sa Biblia tanganing makanood nin orog pa. Ipinapamibi niato na logod dakol na sadiosan an puso an mahimate sa kampanyang ini asin makikiiba sa sato sa Memorial!