Puede daw Kamong ‘Bumalyo sa Macedonia’?
1. Taano ta nagpa-Macedonia si Pablo asin an kairiba nia?
1 Kan mga taon nin 49 C.E., naghale si apostol Pablo sa Antioquia sa Siria para sa saiyang ikaduwang pagbiahe sa pagmimisyonero. Plano niang magbisita sa Efeso asin sa iba pang siudad sa Asia Minor. Minsan siring, paagi sa banal na espiritu, nag-ako sia nin bisyon na nag-aagda sa saiya na ‘bumalyo sa Macedonia.’ Maogma nia ining inako patin kan saiyang kairiba, asin nagkapribilehio sindang establisaron an enot na kongregasyon sa rehion na idto. (Gui. 16:9, 10, NW; 17:1, 2, 4) Sa nagkapirang parte kan kinaban ngonyan, talagang igwa nin pangangaipo para sa dakol pang paraani. (Mat. 9:37, 38) Nasa kamugtakan daw kamo na tumabang?
2. Taano ta dai pinag-iisipan nin iba an pagbalyo sa ibang nasyon?
2 Tibaad igwa kamo kan espiritu nin pagmimisyonero arog ni Pablo alagad dai nindo gayong pinag-iisipan an pagbalyo sa ibang nasyon. Halimbawa, tibaad bakong posible sa saindo an pagsasanay sa Gilead huli sa edad nindo o dahel sa kamo tugang na babae na daing agom o may mga aki na menor de edad pa. Tibaad dai nindo pinag-iisipan na bumalyo sa ibang nasyon huling mayo kamo nin kompiansa na makakanood kamo nin ibang lenguahe. O tibaad imigrante kamo sa nasyon na iniistaran nindo ngonyan huli sa pinansial na mga dahelan kaya nag-aalangan kamong bumalyo. Minsan siring, pagkatapos nin mapagngayongayong paghorophorop, tibaad marealisar nindo na an siring na mga kamugtakan dai man makakaolang sa saindo na bumalyo sa ibang nasyon na igwa nin pangangaipo.
3. Taano ta dai kaipuhan an pagsasanay sa pagmimisyonero tanganing magin mapanggana sa paghuhulit sa ibang nasyon?
3 Kaipuhan daw an Pagsasanay sa Pagmimisyonero? Ano an nakatabang ki Pablo asin sa kairiba nia na magin mapanggana? Nagsarig sinda ki Jehova asin sa saiyang banal na espiritu. (2 Cor. 3:1-5) Kun siring, dawa kun dai kamo mag-ako nin espesyal na pagsasanay huli sa saindong kamugtakan, puede pa man giraray kamong magin mapanggana sa paghuhulit sa ibang nasyon. Girumdomon man na nag-aako kamo nin padagos na pagsasanay paagi sa Teokratikong Paadalan sa Pagmiministro asin Pagtiripon sa Paglilingkod. Asin kun pasohan nindong makapag-adal sa Gilead o sa kaagid na paadalan, an pagbalyo nindo sa ibang nasyon tanganing maeksperyensiahan an paglilingkod siring sa sarong misyonero matao sa saindo nin kapakipakinabang na eksperyensia na magagamit nindo sa huri kun kamo akoon para sa dugang pang pagsasanay.
4. Taano an mga may edad na ta dai maninigong mag-isip na nungka sindang makakabalyo sa ibang nasyon tanganing makapaghulit?
4 Mga May Edad Na: Puedeng magin dakulang tabang sa mga nasyon na may pangangaipo an mga may edad nang maygurang sa espirituwal asin medyo may marahay na salud. Nagretiro na daw kamo sa sekular na trabaho nindo? An nagkapira na nag-aako nin dawa dikit na pension nagkakaigwa man nin marahay na kamugtakan sa pinansial sa sarong nagpoprogreso pa sanang nasyon na dian mas dikit nanggad an gastos ninda, pati na an para sa de kalidad na serbisyo medikal, kisa sa nasyon na ginikanan ninda.
5. Isaysay an eksperyensia nin sarong retiradong tugang na nagbalyo sa ibang nasyon.
5 Sarong retiradong tugang, na magurang sa kongregasyon asin payunir, an nagbalyo hale sa nasyon na Ingles an lenguahe pasiring sa sarong popular na lugar na dinadayo nin mga turista sa Timog-Sirangan na Asia tanganing magtabang sa sarong grupo na Ingles an lenguahe asin may siyam na parahayag. Naghuhulit an grupo sa 30,000 na dayo na nakaistar duman. Sa laog nin duwang taon, 50 na an nag-aatender sa mga pagtiripon. An tugang nagsurat: “An pagbalyo ko digdi nagtao sa sako kan pinakamarahay na mga bendisyon na nakamtan ko kasuarin man. Kulang nanggad an panahon tanganing ikasaysay ko an nagkapira kaiyan huli sa kadakolan!”
6. Isaysay an eksperyensia nin sarong tugang na babae na daing agom na nagbalyo sa nasyon na mas dakula an pangangaipo.
6 Mga Tugang na Babae na Daing Agom: Ginagamit ni Jehova an mga tugang na babae sa epektibong paagi tanganing ipalakop an maogmang bareta sa mga nasyon na mas dakula an pangangaipo. (Sal. 68:11, NW) Sarong hoben na tugang na babae na daing agom an may pasohan na pahiwason an saiyang ministeryo sa ibang nasyon, alagad natural sanang nahahadit an mga magurang nia dapit sa mga peligrong tibaad mapaatubang sa saiya. Kaya sia nagpili nin nasyon na may estabilidad sa politika asin ekonomiya, nagsurat sa sangang opisina, dangan tinawan sia nin nakakatabang asin espesipikong impormasyon. Dakol na bendisyon an inako nia durante kan anom na taon na pag-istar nia sa nasyon na iyan. Sia nagsabi: “Kakadikit sana an oportunidad kong makapagkondukta nin mga pag-adal sa Biblia sa sadiri ming lugar. Pero an paglilingkod sa lugar na mas dakula an pangangaipo nakatabang sa sako na makapagkondukta nin dakol na pag-adal sa Biblia asin talagang mapaoswag an sakong kakayahan sa pagtotokdo.”
7. Isaysay an eksperyensia nin sarong pamilya na nagbalyo sa ibang nasyon.
7 Mga Pamilya: Kun kamo may mga aki, talaga daw na olang iyan sa saindo sa pagbalyo sa ibang nasyon tanganing ipalakop an maogmang bareta? Sarong pamilya na may duwang aki, otso asin dies anyos, an nagdesisyon na probaran iyan. Nagsurat an ina manongod sa saindang eksperyensia: “Nagpapasalamat kami na digdi mi mapapadakula an samong mga aki huling nakakaibaiba ninda an mga espesyal payunir asin misyonero. Nagin mas marahay an buhay mi huli sa paglilingkod sa lugar na mas dakula an pangangaipo.”
8. Posible daw na makapaglingkod sa ibang nasyon na dai na maadal nin ibang lenguahe? Ipaliwanag.
8 Problema sa Lenguahe: Nakakaolang daw sa saindo na bumalyo sa ibang nasyon an ideya na maadal kamo nin ibang lenguahe? Posibleng marhay na itinataram man an lenguahe nindo sa ibang nasyon na igwa nin pangangaipo para sa mas dakol pang parahulit kan Kahadean. Sarong mag-agom na Ingles an lenguahe an nagbalyo sa nasyon na Kastila an lenguahe, na duman dakol an nag-imigrar na nagtataram nin Ingles. Pakaresibi ninda nin impormasyon hale sa sangang opisina dapit sa nagkapirang kongregasyon na Ingles an lenguahe asin igwa nin pangangaipo, nagpili sinda nin saro asin duwang beses iyan na dinalaw. Dangan, nagbuelta sinda sa sadiri nindang lugar, binawasan an saindang bulanan na gastos, asin nagtipon nin kuarta sa laog nin sarong taon. Kan sinda andam nang bumalyo, tinabangan sinda kan mga tugang duman na makahanap nin baratong istaran.
9, 10. Ano an puedeng pag-isipan kan mga nagdayo hale sa saindang nasyon, asin taano?
9 Mga Nagdayo: Nagdayo daw kamo hale sa saindong nasyon, tibaad bago pa nindo nanodan an katotoohan? Tibaad igwa nin dakulang pangangaipo para sa mga paraani sa saindong namundagan na nasyon. Puede daw kamong bumalik tanganing tumabang? Posibleng marhay na mas madali kamong makakua nin trabaho asin istaran kisa sa saro na hale sa ibang nasyon. Tibaad dati na kamong nagtataram kan lokal na lenguahe. Dugang pa, tibaad mas andam an mga tawo na dangogon an mensahe kan Kahadean hale sa saindo kisa sa saro na ibinibilang nindang estranghero.
10 Sarong lalaki an nagbalyo hale sa Albania pasiring sa Italia bilang sarong dulag, nagkaigwa nin marahay na trabaho, asin nakakapagpadara nin kuarta sa saiyang pamilya sa Albania. Kan manodan nia an katotoohan, nagpoon siang magtokdo nin Albaniano sa sarong grupo nin mga Italianong espesyal payunir na mabalyo duman tanganing maglingkod sa lugar na mas dakula an pangangaipo. An tugang na lalaki nagsurat: “Paduman sinda sa teritoryong binayaan ko. Dai sinda tatao kan lenguahe pero gustong-gusto nindang magduman. Albaniano an lenguahe asin kultura ko. Ta’no ta yaon ako digdi sa Italia?” Nagdesisyon an tugang na magbalik sa Albania tanganing tumabang sa pagpalakop kan maogmang bareta. Sia nagsabi: “Nagbasol daw ako na binayaan ko an trabaho asin an gaganaron ko sa Italia? Dai! Tunay na trabaho an nakua ko sa Albania. Kun ako an hahapoton, an talagang mahalagang trabaho na makakapagtao nin nagdadanay na kagayagayahan iyo an bilog na pusong paglilingkod ki Jehova!”
11, 12. Ano an maninigong gibohon kan mga nag-iisip na bumalyo sa ibang nasyon?
11 Kun Paano Iyan Gigibohon: Bago magduman sa Macedonia, plano na ni Pablo asin kan saiyang kairiba na magbiahe pasolnopan, alagad “sinda binawalan kan banal na espiritu,” kaya nagpaamihanan sinda. (Gui. 16:6, NW) Kan harani na sinda sa Bitinia, inolang sinda ni Jesus. (Gui. 16:7) Padagos na dinidirehiran ni Jehova an paghuhulit paagi ki Jesus. (Mat. 28:20) Kun siring, kun pinag-iisipan nindong bumalyo sa ibang nasyon, mapagngayongayong hagadon an paggiya ni Jehova.—Luc. 14:28-30; Sant. 1:5; helingon an kahon na “Kun Paano Nindo Maaaraman Kun Baga May Pangangaipo an Nasyon na Pinag-iisipan Nindong Balyohan.”
12 Hagadan nin realistikong mga komento an mga magurang sa kongregasyon nindo asin an iba pang maygurang na mga Kristiano. (Tal. 11:14; 15:22) Magbasa nin mga artikulo sa satong mga publikasyon manongod sa paglilingkod sa ibang nasyon, asin magsiyasat man dapit sa arin man na mga nasyon na pinag-iisipan nindong balyohan. Puede daw kamong magbisita sa nasyon na gusto nindong balyohan, tibaad sa laog nin pirang aldaw sana? Kun talagang seryoso kamo sa pagbalyo sa ibang nasyon, puede kamong sumurat sa sangang opisina sa nasyon na iyan para sa dugang pang impormasyon, na ginagamit an adres na yaon sa pinakabagong Yearbook. Minsan siring, imbes na direktang ipadara sa sangang opisina an surat nindo, itao iyan sa lokal na kamagurangan, huling iiiba ninda dian an saindang mga komento bago iyan ipadara.—Helingon an librong Organisado sa Paggibo kan Kabotan ni Jehova, pahina 111-112.
13. Paano kamo tatabangan kan sangang opisina, alagad ano an saindong responsabilidad?
13 Papadarahan kamo kan sangang opisina nin makakatabang na impormasyon manongod sa nasyon tanganing matabangan kamong magdesisyon, alagad mayo iyan sa kamugtakan na magtao nin mga sponsorship letter, residency, visa, o iba pang legal na papeles o na maghanap nin istaran para sa saindo. Ini personal na mga bagay na kaipuhan nindong pag-adalan na marhay asin asikasohon bago kamo bumalyo. Dugang pa, kamo man an may responsabilidad na kumontak sa mga embahada o konsulado tanganing makakua nin impormasyon manongod sa mga kahagadan para sa visa asin permit sa pagtrabaho. An mga mabalyo maninigong may kakayahan na asikasohon an saindang indibiduwal na mga pangangaipo asin legal na mga kahagadan sa sainda.—Gal. 6:5.
14. Anong mga pag-iingat an dapat gibohon kun mabisita o mabalyo sa sarong nasyon na ipinagbabawal an gibohon?
14 Mga Nasyon na Ipinagbabawal an Gibohon: Sa nagkapirang nasyon, an mga tugang dapat na magin mapagmansay na marhay sa saindang pagsamba. (Mat. 10:16) An mga parahayag na mabisita o mabalyo duman tibaad dai tinutuyong makaapod nin dai kinakaipuhan na atension sa satong aktibidad, na huli kaiyan masasapeligro an mga tugang duman. Kun pinag-iisipan nindong bumalyo sa siring na nasyon, magsurat tabi sa saindong lokal na sangang opisina paagi sa saindong grupo nin kamagurangan bago magduman.
15. Paano an mga mayo sa kamugtakan na bumalyo sa ibang nasyon makakapahiwas kan saindang ministeryo sa sadiri nindang lugar?
15 Kun Dai Kamo Puedeng Bumalyo: Dai madesganar kun mayo kamo sa kamugtakan na bumalyo sa ibang nasyon. Tibaad ibang “dakula asin pakikinabagñan na tata,” o pinto na pasiring sa gibohon, an bukas sa saindo. (1 Cor. 16:8, 9) Tibaad an saindong paraataman nin sirkito may aram na haraning lugar na igwa nin pangangaipo. Tibaad puede kamong tumabang sa kaharaning kongregasyon o grupo na iba an lenguahe. O tibaad puede nindong pahiwason an saindong ministeryo sa presente nindong kongregasyon. Ano man an saindong kamugtakan, an mahalaga iyo na bilog na kalag an saindong pagsamba.—Col. 3:23.
16. Ano an maninigong magin reaksion niato sa mga nagmamawot na bumalyo sa ibang nasyon?
16 May midbid daw kamong maygurang sa espirituwal na Kristiano na may pasohan na maglingkod sa ibang nasyon? Kun iyo, suportaran asin parigonon nindo an boot nia! Kan maghale si Pablo sa Antioquia sa Siria, iyo iyan an ikatolo sa pinakadakulang siudad kaidto sa Imperyo nin Roma (sunod sa Roma asin Alejandria). Huling dakula an teritoryo, posibleng marhay na kaipuhan kan kongregasyon sa Antioquia an tabang ni Pablo asin mapupungaw sindang marhay sa saiya kun mahale sia. Pero, mayong ipinaparisa sa Biblia na dinesganar si Pablo kan mga tugang duman na maghale. Minalataw na imbes na isipon sana ninda an saindang lugar, ginirumdom ninda na “an oma iyo an kinaban.”—Mat. 13:38.
17. Ano an mga dahelan tanganing pag-isipan an ‘pagbalyo sa Macedonia’?
17 Abundang binendisyonan si Pablo asin an saiyang kairiba huli sa paghimate sa imbitasyon na bumalyo sa Macedonia. Mantang yaon sinda sa siudad nin Filipos sa Macedonia, nanompongan ninda si Lidia, asin ‘an saiyang puso binukasan [ni Jehova], tanganing magdangog sa mga bagay na itinataram ni Pablo.’ (Gui. 16:14) Imahinara an kagayagayahan ni Pablo asin kan kairiba nia sa pagmimisyonero kan mabautismohan si Lidia asin an gabos na kasararo kaini sa harong! Sa dakol na kadagaan, igwa nin mga sadiosan an puso arog ni Lidia na dai pa nakakadangog kan mensahe kan Kahadean. Kun ‘mabalyo kamo sa Macedonia,’ puede nindong maeksperyensiahan an kagayagayahan na manompongan asin matabangan sinda.