Tabangan an Kagharong na Mangatanosan
1. Arin na pamamaagi sa ministeryo an pinakaepektibo?
1 Arin na pamamaagi sa ministeryo an mas epektibo—an saro na dogmatiko o an saro na nagtatabang sa kagharong na mangatanosan asin makaabot sa tamang mga kongklusyon? Ginamit ni apostol Pablo an ikaduwang pamamaagi kan kaolayon nia an mga Judio sa Tesalonica, asin bilang resulta “an nagkapira sa sainda napaoyon,” o nagin mga nagtutubod. (Gui. 17:2-4) Ano an kalabot sa pangangatanosan sa iba?
2. Paano niato maaarog an halimbawa ni Pablo kun naghuhulit kan maogmang bareta?
2 Konsideraron an Saboot Asin Kamugtakan: Sa pamamaaging nangangatanosan, kinokonsiderar niato an mga saboot asin paniniwala kan mga tawo sa satong teritoryo. Pinonan ni Pablo an sarong diskurso sa daing pagtubod na mga Griego sa Areopago paagi sa pagsambit nin mga bagay na posibleng marhay na aram asin inaako ninda. (Gui. 17:22-31) Kun siring, kun iinaandam an saindong presentasyon, konsideraron an komun na mga paniniwala asin gusto o dai gusto kan mga tawo sa saindong teritoryo. (1 Cor. 9:19-22) Kun magkontra an kagharong, pagmaigotan na magkaigwa nin puntong pagkakaoyonan, asin gamiton iyan na basehan sa saindong pag-oolay.
3. Paano kita mas epektibong mangangatanosan sa iba paagi sa ekspertong paggamit nin mga hapot?
3 Ekspertong Gamiton an mga Hapot: Dai niato matatawan nin instruksion an sarong nagbibiahe tanganing matabangan siang makaabot sa dudumanan nia kun dai niato aram an lokasyon nia sa presente. Kaagid kaiyan, dai niato matatabangan an kagharong na makaabot sa tamang kongklusyon kun dai niato aram an saiyang opinyon ngonyan. Bago mangatanosan sa sarong nagdadangog, si Jesus parateng naghahapot tanganing maaraman an iniisip kan tawo. Halimbawa, kan may maghapot ki Jesus, “Ano an guiguibohon ko tagñaning magmana kan buhay na daing katapusan?” inaram nguna ni Jesus an punto de vista kan tawo bago nagsimbag. (Luc. 10:25-28) Sa saro pang pangyayari, kan sala an simbag ni Pedro, si Jesus ekspertong naggamit nin mga hapot tanganing itanos an pag-iisip kaini. (Mat. 17:24-26) Kun siring, kun an kagharong naghahapot o nagpapahayag nin salang opinyon, puede kitang maggamit nin mga hapot tanganing tabangan siang mangatanosan sa mga bagay-bagay.
4. Taano ta maninigo niatong pagmaigotan na tabangan an kagharong na mangatanosan?
4 Kun tinatabangan niatong mangatanosan an kagharong, inaarog niato si Jesus, an Dakulang Paratokdo, saka an iba pang ekspertong ebanghelisador kan enot na siglo. Tinatawan niato nin dignidad an kagharong asin pinapahelingan sia nin paggalang. (1 Ped. 3:15) Bilang resulta, tibaad magin mas andam siang togotan kita na magdalaw liwat.