Magplano na Ngonyan na Pahiwason an Saindong Ministeryo
1. Ano an sarong mahalagang bagay manongod sa panahon nin Memorial, asin paano kita makakapag-andam para dian?
1 Kada panahon nin Memorial, natatawan kita nin bagong mga oportunidad na ‘omawon si Jehova nin labi-labi.’ (Sal. 109:30) Mapapahiwas daw nindo an saindong ministeryo sa Marso bilang sarong paagi na ipaheling an pag-apresyar sa Kagtao kan pantubos? Ngonyan na an panahon na ponan an pagplano.—Tal. 21:5.
2. Paano kamo bilang indibiduwal, asin an iba pang tugang, huminiro kaoyon kan probisyon na mas hababang kahagadan na oras sa pag-auxiliary payunir kan nakaaging Abril?
2 Pag-auxiliary Payunir: Kan nakaaging taon, maogmahon an mga kongregasyon kan maaraman ninda an probisyon sa pag-auxiliary payunir sa Abril, na mas hababa an kahagadan na oras. An sarong brother nagsurat: “Nasa hayskul pa ako, kaya bakong posible para sa sako na magregular payunir. Pero, maaplay ako para sa 30 oras saka hihingoahon kong aboton an 50 oras sa Abril.” An sarong sister na nagtatrabaho nin bilog na panahon nagsurat: “Treinta oras—kayang-kaya nanggad iyan!” Kan ipaisi an probisyon na ini, an sarong dating payunir na labi nang 80 anyos nagsabi: “Ini an haloy ko nang pighahalat! Aram ni Jehova na an pagpapayunir an pinakamaogmang panahon sa buhay ko!” An iba na dai nakapag-auxiliary payunir nagkaigwa nin pasohan na gumibo nin orog pa sa ministeryo.
3. Ano an mga dahelan kun taano ta dapat pag-isipan an pag-auxiliary payunir sa Marso, Abril, asin Mayo?
3 An Marso marahayon na bulan tanganing mag-auxiliary payunir huling may pagpipilian giraray kita na 30 o 50 oras na kahagadan. Apuera dian, poon sa Sabado, Marso 17, makikikabtang kita sa sarong espesyal na kampanya tanganing imbitaran an mga tawo na umiba sa sato sa pagselebrar kan Memorial sa Abril 5. Dakol an maoogmang marhay huli sa saindang mas mahiwas na pakikikabtang sa ministeryo, kaya gugustohon nindang mag-auxiliary payunir pati sa Abril asin Mayo, na 50 oras an kahagadan.
4. Paano niato mapapahiwas an pakikikabtang sa ministeryo, asin ano an magigin resulta kaiyan?
4 Sa sunod nindong Pampamilyang Pagsamba, taano ta dai pag-olayan kun paano mapapahiwas nin lambang miembro kan pamilya an saiyang ministeryo sa panahon kan Memorial? (Tal. 15:22) Hagadon ki Jehova na bendisyonan logod an paghihingoa nindo. (1 Juan 3:22) Mientras na pinapahiwas nindo an pakikikabtang sa ministeryo, bako sanang orog nindong maoomaw si Jehova kundi magigin mas magayagaya man kamo.—2 Cor. 9:6.