Ma-auxiliary Payunir Ka daw?
1. Taano ta marahay na pagkakataon an panahon nin Memoryal na pahiwason an satong ministeryo?
1 An panahon nin Memoryal marahay na pagkakataon na pahiwason an satong ministeryo. Iyan an panahon na hinuhurop-hurop ta an dakulang pagkamuot ni Jehova sa pagtao kan saiyang Aki bilang pantubos. (Juan 3:16) Dahil diyan, napapano nin pag-apresyar an satong puso, na nagpapakusog kan pagmawot ta na sabihon sa iba an dapit ki Jehova asin an ginigibo niya para sa katawuhan. (Isa. 12:4, 5; Luc. 6:45) Iyan man an panahon na may espesyal na kampanya kita na imbitaran an mga kamidbid asin mga tawo sa teritoryo na mag-atender sa Memoryal. Pagkatapos kaiyan, hinihinguwa tang patalubuon an interes kan mga nag-atender. Papahiwason mo daw an saimong ministeryo paagi sa pag-auxiliary payunir sa Marso, Abril, o Mayo?
2. Taano ta marahayon na bulan an Marso para mag-auxiliary payunir?
2 Gibuhon na Espesyal na Bulan an Marso: Marahayon na bulan an Marso para mag-auxiliary payunir. An mga maaplay mapili sa kahagadan na 30 o 50 oras. Kun an dalaw kan paraataman nin sirkito mataon nin Marso, an mga auxiliary payunir puwedeng umatender sa bilog na pakipagmiting kan paraataman nin sirkito sa mga regular asin espesyal payunir. An kampanya sa pag-imbitar para sa Memoryal, na gigibuhon sa Martes, Marso 26, 2013, pinalaba kisa kan nakaaging mga taon. Mapuon iyan sa Marso 1. Saro pa, an Marso may limang Sabado asin Domingo. Kaya taano ta dai seryosong pag-isipan kun makakapag-auxiliary payunir ka para magibo mong pinakaespesyal na bulan ini kan taon?
3. Anong mga pagbabago an magigibo ta para madagdagan an satong oras sa ministeryo?
3 Magplano Na Ngunyan: Ngunyan na an panahon na repasuhon kun anong mga pagbabago sa saimong iskedyul an kaipuhan na gibuhon tanganing makapagpayunir. Mahalaga an pagtarabangan kan pamilya, kaya pag-ulayan sa saindong Pampamilyang Pagsamba an mga pasuhan kan pamilya nindo asin gumibo nin iskedyul. (Tal. 15:22) Kun dai ka makakapag-auxiliary payunir, dai mangluya an buot. Puwede ka daw na gumibo nin pagbabago sa saimong iskedyul tanganing madagdagan an oras mo sa mga aldaw na ika nagluluwas sa ministeryo? Puwede mo daw dagdagan nin sarong aldaw durante kan semana an pagluwas mo sa ministeryo?
4. Ano an mga pakinabang kun dudugangan ta an satong aktibidad sa Marso, Abril, asin Mayo?
4 Mantang dinudugangan ta an satong aktibidad sa Marso, Abril, asin Mayo, madadagdagan an satong kagayagayahan asin satispaksiyon sa paglilingkod ki Jehova saka pagtao sa iba. (Juan 4:34; Gui. 20:35) Mas mahalaga, an satong mga pagsakripisyo makakapagpagaya-gaya ki Jehova.—Tal. 27:11.