Pagkondukta nin Epektibong mga Pag-adal sa Bibliya
1. Ano an responsabilidad kan mga parahayag na nagkokondukta nin pag-adal sa Bibliya?
1 Mayo nin siisay man na makakapaglingkod ki Jehova kun dai niya sinda “dagkahon” o irani sa saiya. (Juan 6:44) Dawa siring, dapat na gibuhon kan mga parahayag na nagkokondukta nin pag-adal sa Bibliya an saindang kabtang sa pagtabang sa mga tawo na rumani sa saindang Ama sa langit. (Sant. 4:8) Kaipuhan an paghahanda. Kulang an basta sana basahon an kada parapo asin haputon an satong mga tinutukduan kan nakaimprentang hapot para matabangan sinda na masabutan an mensahe asin umuswag.
2. Ano an resulta kan epektibong pagtutukdo sa Bibliya?
2 Para magin epektibo sa pagtutukdo, dapat na tabangan kan mga parahayag an saindang tinutukduan na (1) masabutan an itinutukdo kan Bibliya, (2) akuon an itinutukdo kan Bibliya, asin (3) iaplikar an itinutukdo kan Bibliya. (Juan 3:16; 17:3; Sant. 2:26) Puwedeng dakul na bulan an kaipuhan para matabangan sinda na magibo ini. Pero, an kada lakdang na ini garo pasaro-sarong tangga parani ki Jehova sagkod na sinda magdusay sa saiya.
3. Taano ta nagbabangon nin punto de vistang mga hapot an sarong mahusay magtukdo?
3 Ano an Iniisip kan Tinutukduan sa Bibliya?: Para maaraman kun nasasabutan asin inaako kan satong tinutukduan sa Bibliya an saiyang nanunudan, likayan na haros kita na sana an nagtataram; imbes, dagkahon siya na sabihon an nasa buot niya. (Sant. 1:19) Nasasabutan daw niya an sinasabi kan Bibliya manungod sa pinag-uulayan nindo? Maipapaliwanag daw niya iyan sa sadiri niyang tataramon? Ano an sabuot niya sa nanudan niya? Nagtutubod daw siya na rasonable an itinutukdo kan Bibliya? (1 Tes. 2:13) Nasasabutan daw niya na an mga nanunudan niya dapat na mahiling sa saiyang paagi nin pamumuhay? (Col. 3:10) Para maaraman an simbag diyan, kaipuhan tang magin mataktika asin magbangon nin punto de vistang mga hapot, dangan magdangog.—Mat. 16:13-16.
4. Ano an marahay na gibuhon kun an satong tinutukduan nasasakitan na masabutan o iaplikar an itinutukdo kan Bibliya?
4 An mga nakatudan asin mga pag-uugali sa parati masakit mahali asin nangangaipo nin panahon para mabago. (2 Cor. 10:5) Paano kun an itinutukdo ta dai man inaako o inaaplikar kan satong tinutukduan? Kaipuhan an pagtitiyaga asin rasonableng panahon para mahiling sa saiya an paghiro kan Tataramon nin Diyos asin kan banal na espiritu. (1 Cor. 3:6, 7; Heb. 4:12) Imbes na piriton siya, mas marahay na magbalyo sa ibang tema kun nasasakitan siyang masabutan o iaplikar an partikular na itinutukdo kan Bibliya. Sa matiyaga asin may pagkamuot na pagtutukdo ta, puwedeng mapahiro siya na gibuhon an kinakaipuhan na mga pagbabago pag-abot nin panahon.