Ano an Sinasabi kan Bibliya sa Nangyayaring Kakulangan nin Kakanon Ngunyan?

“Mayo nang magugutom.” Iyan an gustong-gustong mangyari kan mga lider kan kinaban may koneksiyon sa saro sa pinakadakulang problema kan katawuhan—kun paano matatawan nin kakanon an gabos na tawo sa bilog na kinaban.a Pero posible daw talaga na mayo nang magugutom sa kinaban? Ano an sinasabi kan Bibliya?

Iprinopesiya sa Bibliya an nangyayaring kakulangan nin kakanon ngunyan

Haloy nang sinabi kan Bibliya na magkakaigwa nin kakulangan nin kakanon sa panahon na kinabubuhayan ta, na inaapod na “huring mga aldaw.” (2 Timoteo 3:1) Bako an Diyos an responsable sa nangyayaring kakulangan na ini nin kakanon, pero pinatanidan niya kita manungod diyan. (Santiago 1:13) Pag-isipan an duwang propesiya sa Bibliya.

“Magkakaigwa nin sunod-sunod na kakulangan nin kakanon . . . sa manlain-lain na lugar.” (Mateo 24:7) Sinabi sa propesiyang ini sa Bibliya na magkakaigwa nin tiggutom sa manlain-lain na lugar. Risahon an sinabi sa sarong report hali sa mga nagmomonitor kan suplay nin kakanon, an sabi: “Mas naggagrabe an tiggutom, kakulangan nin kakanon, asin malnutrisyon sa kinaban sa ibong kan pagmamaigot na tapuson iyan.”b Ginatos na milyon na tawo sa manlain-lain na nasyon an mayo nin igong kakanon. Nakakamundo, dakul sa sainda an nagagadan huli kaiyan.

“Uya! nahiling ko an sarong itom na kabayo, asin an nakasakay diyan igwang kapot-kapot na timbangan.” (Kapahayagan 6:5) Sa propesiyang ini, an kabayo saka an nakasakay diyan nagrerepresentar sa tiggutom sa huring mga aldaw.c An timbangan na kapot kan parakabayo gagamiton para timbangon an rasyon nin kakanon. Mantang nangangabayo ini, sarong boses an nagsasabi na an presyo kan kakanon malangkaw na marhay asin pinapatanidan an mga tawo na dai magsayang nin kakanon. (Kapahayagan 6:6) Malinaw na ipinapahiling kaiyan an nangyayaring krisis sa kakanon ngunyan sa bilog na kinaban, kun sain binilyon na tawo an mayong makakan o dai kayang makabakal nin masustansiyang mga kakanon.

Kun paano matatapos an kakulangan nin kakanon

Sinasabi kan mga eksperto na an satong planeta nakakaprodusir nin kakanon na kayang pakakanon an gabos na nabubuhay diyan. Kun arog kaiyan, taano ta may nangyayaring tiggutom? Asin ano an sinasabi kan Bibliya na gigibuhon kan satong Kaglalang, si Jehova,d para solusyunan iyan?

Problema: Dai kayang halion kan mga gobyerno an pagtios saka an bakong patas na ekonomiya na nagigin dahilan na magutom an mga tawo.

Solusyon: An bakong perpektong mga gobyerno nin tawo sasalidahan nin sarong perpektong gobyerno—an Kahadian nin Diyos. (Daniel 2:44; Mateo 6:10) Dakul na pobre ngunyan an nasasakitan na makabakal nin kakanon, pero dai na iyan mangyayari sa pamamahala kan Kahadian nin Diyos. Ini an sabi kan Bibliya manungod ki Jesu-Cristo, an Hadi kan Kahadian nin Diyos: “Ililigtas niya an dukha na naghahagad nin tabang, siring man an hamak asin an siisay man na mayo nin paratabang. . . . Magkakaigwa nin abundang tipasi sa ibabaw kan daga; masurobra iyan sa alituktok kan kabukidan.”—Salmo 72:12, 16.

Problema: Huli sa giyera, grabe an nagigin destroso saka minabagsak an ekonomiya kaya nadidipisilan an mga tawo na makakua nin kakanon na kaipuhan ninda.

Solusyon: “Pinapapundo [ni Jehova] an mga giyera sa bilog na daga. Binabari niya an pana asin pinuputol-putol an garod; sinusulo niya an mga karetang panggiyera.” (Salmo 46:9) Biyong rarauton nin Diyos an mga armas na panggiyera saka lalaglagon niya an mga promotor kaiyan. Huli kaiyan, ligtas saka madali nang makakakua nin kakanon an gabos. Nanunuga an Bibliya: “An matanos magigin marambong, asin an katuninungan magigin abunda.”—Salmo 72:7.

Problema: Dahil sa mapandestrosong kamugtakan nin panahon saka natural na mga kalamidad, dakul na mga pananom an nararaot saka ataman na mga hayop na nagagadan.

Solusyon: Kokontrulon nin Diyos an natural na puwersa kan daga, na mapangyaring magin paborable an kondisyon kaiyan para sa produksiyon nin kakanon. Sinasabi kan Bibliya: “Pinapakalma [ni Jehova] an alipuros; an mga alon kan dagat minakulpa. . . . Ginigibo niyang mga danaw-danaw na pano nin tambo an disyertong kadagaan, asin ginigibo niyang mga burabod nin tubig an marang daga. Pinapaistar niya diyan an mga gutom . . . Nagsasabwag sinda sa mga uma asin naggigibo nin mga ubasan na namumunga nin abunda.”—Salmo 107:29, 35-37.

Problema: An mga mahanab saka koraptong mga tawo nagpoprodusir nin bakong ligtas na kakanon o itinatago ninda an mga kakanon sa mga nangangaipo.

Solusyon: Hahalion kan Kahadian nin Diyos an bakong onesto asin koraptong mga tawo. (Salmo 37:10, 11; Isaias 61:8) Sinasabi kan Bibliya na an Diyos na Jehova “an Saro na nagtatao nin hustisya sa mga dinaya, an Saro na nagtatao nin tinapay sa mga nagugutom.”—Salmo 146:7.

Problema: Kada taon, 33 porsiyento kan suplay nin kakanon sa kinaban an nasasayang o nawawara.

Solusyon: Sa pamamahala kan Kahadian nin Diyos, magigin marahay an distribusyon kan suplay nin kakanon. Kan si Jesus yaon sa daga, dai siya nagsayang nin kakanon. Halimbawa, kan milagroso niyang pakakanon an labing 5,000 na tawo, sinabihan niya an saiyang mga disipulo: “Tipuna nindo an mga tada-tada, tanganing dai nin masayang.”—Juan 6:5-13.

Huling hahalion kan Kahadian nin Diyos an pinakadahilan kan tiggutom, makakamtan kan mga tawo an abundang masiram saka masustansiyang mga kakanon. (Isaias 25:6) Para maaraman kun nuarin ini gigibuhon kan Kahadian nin Diyos, hilingon an artikulong “Nuarin Mamamahala sa Daga an Kahadian nin Diyos?”