Labanan an Pakamati na Nagsosolo Paagi sa Pagtabang sa Iba—An Sinasabi kan Bibliya

An mga tawo sa manlain-lain na parte kan kinaban nakakamating nagsosolo sinda asin napapasuway sa iba. Naniniwala an nagkapirang eksperto sa salud na an pagtabang sa iba sarong paagi na malabanan an arog kaiyan na mga pagmati.

• “An pagtabang sa mga nangangaipo puwedeng makatao nin kahulugan sa satong buhay asin puwedeng makatabang na malabanan an pakamating nagsosolo o napapasuway.”—U.S. National Institutes of Health.

An Bibliya nagtatao nin praktikal na sadol sa kun ano an puwede tang gibuhon tanganing tabangan an iba. An pag-aplikar sa sinasabi kaiyan makakatabang sa sato na malabanan an pakamating nagsosolo.

An puwede mong gibuhon

Magin matinao. Maghanap nin mga oportunidad na makaibanan an iba, lalo na nin personal. Magin andam na ihiras kun ano an igwa ka. Kun gigibuhon mo iyan, posibleng marhay na magin mapagpasalamat sinda sa saimo, na makakatabang na magin mag-amigo kamo.

• Prinsipyo sa Bibliya: “Ugalion an pagtao, asin an mga tawo matao sa saindo.”—Lucas 6:38.

Gamiton an saimong kusog para sa iba. Maghanap nin mga paagi na matabangan an mga tawong napapaatubang sa kadipisilan. Puwedeng kaiba diyan an may pagmalasakit na pagdangog sa sainda o pag-alok nin praktikal na tabang na makakapagian kan pasan ninda.

• Prinsipyo sa Bibliya: “An sarong amigo yaon para tumabang, sa ano man na sitwasyon.”—Talinhaga 17:17, Contemporary English Version.

Para sa urog pang impormasyon sa kun paano mo mapapagdanay an marahay na relasyon sa iba, basahon an artikulong “Pamilya at Pakikipagkaibigan.”