Kun an mga Pangangaipo Napanigoan Na

KADAKOL na taon na an nakaagi itinao an hula: “An mga mata kan mga buta magkakaburuklat, asin an mismong mga talinga kan mga bongog magkakaburukasan.”

‘Alagad imposible iyan,’ an tibaad sabihon nindo. Kun siring kaiyan an saboot nindo, tibaad magngalas kamo na maaraman na kadakol na bioteknisian sa ika-20 siglo an dai na naghohona na imposible iyan. Taano?

Pagheling Para sa mga Buta?

Kun hapoton kun paagi sa anong organo nakaheheling kamo nin mga bagay, posibleng an kadaklan sa saindo masimbag: ‘Paagi kan sakong mga mata.’ Alagad, an bioteknisian, mas posibleng masimbag: ‘Paagi kan sakong hutok.’ Asin mas tama sia. Huli ta mantang an mata an organo nin sentido na nakakakua nin liwanag asin nagtatao nin elektrikal na mga ladawan, an likod na kabtang kan satong hutok an nagtatao sa sato nin bisuwal na pagheling.

An Pranses na babasahon na Science et Vie kasuarin sana nagtao nin sumaryo sa pagsiyasat na ginibo tanganing tabangan an mga buta na makaheling sa artipisyal na paagi. Nakatanom sa bisuwal na sentro kan hutok, an saradit na electrodes na konektado sa sarong video kamera na naghahatod nin mga senyal hale sa kamera direkta sa hutok. Nagbubunga ini nin sinag nin liwanag, kaya kita puwedeng “makaheling nin mga bitoon” kun tinamaan sa payo. Paagi sa paggibo nin angay na mga koneksion, an hutok magbabasa kan mga sinag nin liwanag siring sa satong pagbasa sa mga senyal na binibilog nin kadakol na indibiduwal na bombilya. Mantang tibaad matabangan na makaheling idtong an mga mata nabuta, an mga tawong nadanyaran an mga bisuwal na sentro kan hutok dai makikinabang kan paaging ini.

Paghinanyog Para sa mga Bongog?

“Para sa talinga, an problema tibaad bakong grabe kisa kan para sa mata,” an komento ni Dr. Jean-Michel Bader. Igwa nin marahay na pag-oswag sa paggibo nin cochlear implants tanganing ibalik an sarong grado nin pagdangog sa nagkapirang tawo na igwa nin mga danyos sa pagdangog. Alagad paano idtong an pagkabongog huli sa mga problema sa paggibo kan mga tanog na magin elektrikal na mga ladawan para darahon sa hutok?

Para sa kapakinabangan kan siring na mga tawo, an gibohon nag-ooswag sa elektronikong panlaog na talinga. Paagi sa kagamitan na may pambulsang mikropono na nagbabago kan tanog na magin elektronikong mga ladawan, an mga senyal ibinubugtak sa alambre sa sadit na transmiter na nakakabit sa kublit harani sa talinga. Sarong sadit na nagreresibi na nakabugtak sa irarom kan kublit asin direktang konektado sa nerbiyos na nagkokonektar kan panlaog na talinga sa hutok an naghahatod kan mensahe sa hutok, na dai minaagi sa normal na ruta.

Pangangaipo Para sa Orog na Mapananarigan na Tabang

Sa ibong nin mga linalaoman na garo inaalok nin siring na pagsiyasat, an mga siyentipiko realistikong nagmimidbid na an mga paghihingoa na ikorehir an mga depekto nin hawak parateng nasusudya huli ta an siyensia kulang nin pakasabot sa pagigin komplikado kan pag-andar kan satong pisikal na mga organo asin sentido. Kaya ngani, nagpapadagos an paorumbasan sa pagpaoswag nin mas kompletong ladawan kan pagpunsionar kan mga paagi nin satong hawak.

Mantang kadakol an tibaad naglalaom sa siyensia para sa pagbabalik kan pagheling sa mga buta asin pagdangog kan mga bongog, igwa pa nin mas mapananarigan na gayong basehan para sa paglaom. Ini iyo an panuga kan Kaglalang kan mga sentido nin tawo, si Jehova Dios. Sia an saro na haloy nang nagpasabong kan hula: “Sa panahon na iyan an mga mata kan mismong mga buta magkakaburuklat, asin an mismong mga talinga kan mga bongog magkakaburukasan.” (Isaias 35:5) Alagad paano kita makasisierto na an mga tataramon na ini magigin totoo? Ano an “panahon na iyan” na durante kaiyan ipinanugang mangyayari iyan?

Mga Patanaw sa Ngapit

Kun an sarong bagay nangyari kan nakaagi, bako daw na iyan magtatao saindo nin pagsarig na puwede iyan mangyari liwat, orog na kun an saro na may paninimbagan para kaiyan an magsabi nin siring? Buweno, kan enot na siglo kan satong Komon na Kapanahonan, si Jesu-Cristo nagbalik kan mga sentido kaidtong mga nawaran kaini, siring kan sarong beses saiyang sinabi: “An mga buta nakaheheling, an mga pilay nagraralakaw, an mga daoton nagkakarilinigan asin an mga bongog nakadadangog.” (Lucas 7:22) An mga pagpaomay na ini dai nagdepende sa modernong teknolohiya.

Sarong beses pinaomayan pa ngani ni Jesus an sarong lalaking namundag na buta. Kadakol na kataraed asin kamidbid an nakaheling kan milagro. An lalaking ibinalik an pagheling nagsabi: “Poon pa kan suanoy dai pa noarin man nadangog na an siisay man nakapabuklat sa mata nin saro na namundag na buta. Kun an tawong ini bakong gikan sa Dios, mayo sia nin ano man na magigibo.” Iyo, ibinalik ni Jesus an pagheling kan lalaking iyan paagi kan kapangyarihan nin Dios!—Juan 9:32, 33.

Ano an pinatutunayan kaini? Tara, na paagi sa kapangyarihan nin Dios, puwedeng paomayan an gabos na nagtitios nin may danyos na sentido! Kaya, ginibo ni Jesu-Cristo an mga milagrong ini tanganing ipaheling sa sadit na sokol kun ano an mangyayari sa bilog na daga sa pagsakop kan Kahadean nin Dios. Ini an “sa panahon na iyan,” durante kan pagsakop kan Kahadean nin Dios, magkakaigwa nin mamuraway na literal na kaotoban an hula kan Biblia: “Sa panahon na iyan an mga mata kan mga buta magkakaburuklat, asin an mismong mga talinga kan mga bongog magkakaburukasan.”—Isaias 35:5.

An pakaaram kan panuga nin Dios para sa ngapit siring man an pagkakaigwa nin personal na relasyon sa saiya an nakatatabang sa sarong tawong may deperensia sa hawak na makamate na an depekto dai maninigong magin nakalulunos. Ini an nagpapagin posible sa saiya na magkaigwa nin mas maogma, mas lubos na buhay ngonyan. Iyo nanggad, magigin makangangalas na gayo kun idtong kan dati may mga danyos sa sentido mag-ogma asin maggayagaya asin kun an gabos na kamondoan asin pag-agrangay mawara na!—Isaias 35:10.

[Ritrato sa pahina 22]

Magigin makangangalas na gayo kun idtong kan dati may mga danyos sa sentido mag-ogma asin maggayagaya!