Tabangan an mga Buta na Makanuod Dapit ki Jehova

1. Paano ipinahiling ni Jesus an pagmalasakit sa mga buta?

¹ Pirang aldaw na sana bago magadan si Jesus. Mantang paluwas siya sa siyudad nin Jerico, duwang butang parapakilimos an nagkukurahaw: ‘Kagurangnan, kahiraki kami!’ Minsan ngani napupurisaw si Jesus sa mga pagbalo na aagihan niya, puminundo siya, pinarani an mga lalaki sa saiya, asin pinaumayan sinda. (Mat. 20:29-34) Paano ta maaarog an pagigin mapagmalasakit ni Jesus sa mga buta?

2. Paano kita makakapagpatotoo sa sarong buta na puwedeng manumpungan ta sa pampublikong lugar?

² Magin Matinabang: Kun may manumpungan kamong buta, tibaad sa pampublikong lugar, magpamidbid kamo asin mag-alok nin tabang. Huling sa parati inaaprobetsaran an mga arog ninda, tibaad magsuspetsa sinda sa inot. Minsan siring, puwedeng mapamugtak an buot ninda huli sa pagigin tunay na makikatuod nindo asin pagpahiling nin sinserong interes. Tandaan man na iba-iba an klase nin pagigin buta, asin madepende diyan kun anong tabang an itatao. Pagkatapos magtao nin tabang, puwedeng sabihon sa saiya na may ginigibo kamong pagtutukdo sa Bibliya. Mag-alok na basahon sa saiya an sarong teksto, arog kan Salmo 146:8 o Isaias 35:5, 6. Kun tatao siyang magbasa nin Braille, haputon siya kun gusto niyang magkaigwa nin publikasyon sa Braille na makakatabang sa saiya na urog pang makanuod sa Bibliya. Puwede mo man siyang tabangan na magkaigwa nin mga audio file hali sa jw.org. Kun an saiyang kompyuter may screen reader program na nadadangog na binabasa an mga nakasurat sa screen, tibaad magustuhan niya an inimprentang mga artikulo na mababasa man sa jw.org kaiba kan mga publikasyon na puwedeng ma-download sa RTF (Rich Text Format).—Hilingon an kahon na “Kun Nagtatabang sa Sarong Buta . . .”

3. Paano ta hahanapon an mga buta sa satong teritoryo?

³ Hanapon an mga Buta: Bihira kitang makanumpong nin mga buta sa pagharong-harong huling dakul sa sainda an bakong komportable na makipag-ulay sa mga tawong dai ninda midbid. Kaya, kaipuhan talagang maghinguwa na “hanapon” an mga arog ninda tanganing mapatotoohan. (Mat. 10:11, NW) May katrabaho ka daw o kaeskuwelang buta? Ika mismo an mag-inot na makipag-ulay sa saiya. Kun may eskuwelahan para sa mga buta sa teritoryo nindo, mag-alok kan satong mga publikasyon sa Braille para sa librarya kan eskuwelahan. May midbid ka daw na may kapamilyang buta? Igwa daw nin mga organisasyon sa teritoryo nindo na nagtatao nin tabang sa mga buta o mga pasilidad na may nakaistar na mga buta? Ipaliwanag sa kapamilya, sa receptionist, o sa namamahala na an mga Saksi ni Jehova interesadong marhay na tabangan an mga buta, asin mag-alok nin mga babasahon sa Braille o mga audio recording. Sabihon sa saiya an panuga sa Bibliya na dai na mahahaloy permanenteng papaumayan nin Diyos an mga buta. Puwede mo man ipahiling an video sa jw.org na may titulong “Without It, I Would Feel Lost,” na nagsasaysay kan eksperyensiya nin sarong lalaking buta na nakinabang sa pagkaigwa nin Bibliya sa Braille. Paagi sa pagpaliwanag kan saimong tuyo sa pagdalaw mo, puwedeng magin paagi ini na makaulay mo an mga tawong buta.

4. Ano an manunudan ta sa eksperyensiya ni Janet?

⁴ Si Janet, sarong sister na buta, nagbisita sa sarong pasilidad na may nakaistar na mga buta. Nakaulay niya an sarong hoben na babayi. Sinabi sa saiya ni Janet na “nagpaumay si Jesus nin mga buta tanganing ipahiling kun ano an gigibuhon niya sa gabos na tawong buta.” Pinag-ulayan ninda an Kapahayagan 21:3, 4, asin ipinaliwanag ni Janet kun paano uutubon kan Kahadian nin Diyos an panugang iyan. Nagtuninong an babayi dangan nagsabi: “Dai ko pa lamang ‘yan nadangog na sinabi nin sarong buta. An kadaklan sa mga tawong nakakahiling naniniwala na may mga tawong buta huli ta may sarong bagay na ginibo sinda o an mga apuon ninda.” Ipinadara ni Janet sa e-mail kan babayi an link kan librong Itinotokdo kan Biblia, asin ngunyan nag-aadal sinda nin Bibliya duwang beses sa sarong semana.

5. Minsan ngani dai ta kayang paumayan an mga buta arog kan ginibo ni Jesus, an pagpahiling ta nin pagmakulog sa mga buta matao nin anong mga bendisyon?

⁵ Siyempre, dai ta kayang paumayan an mga tawong buta arog kan ginibo ni Jesus, pero puwede tang tabangan an gabos na binuta kan diyos kan sistemang ini nin mga bagay, kaiba na an mga buta sa pisikal, na masabutan an katotoohan sa Tataramon nin Diyos. (2 Cor. 4:4) Pinaumayan ni Jesus an duwang lalaki harani sa Jerico huling ‘napahiro siya sa pagkahirak’ sa sainda. (Mat. 20:34) Kun ipapahiling ta an arog kaiyan na pagmakulog sa mga buta, ikakaugma ta an pribilehiyo na tabangan an nagkapira na makanuod dapit ki Jehova, an saro na mapangyaring mayo na nin buta sagkod lamang.