Ano an Paglaom Para sa mga Buta?
SI John Milton isinurat an saiyang mga plosa na Paradise Lost asin Paradise Regained dawa ngani butang lubos. An pagigin buta asin bongog dai nakapapondo ki Helen Keller sa saiyang trabaho sa mga igwa nin pisikal na diperensia. Iyo, dakol na buta an nakapanggaganang marhay. Pero kanigoan kagayon kun gabos puwedeng magkamit nin marahay na pagheling! Puwede kamong nangorognang umoyon kun igwa kamo nin sarong namomotan o sarong katood na buta o may diperensia an pagheling.
Totoo, sa nagkapirang kadagaan an mga programa sa pagparahay tinotokdoan an mga tawong may diperensia an pagheling nin mga kakayahan sa pan-aroaldaw na buhay. An braille asin sinanay na mga ayam na giya nagtatabang sa mga buta na asikasohon an dakol sa saindang pangangaipo. Minsan siring, dakol na tawo an minamansay an pagkabuta bilang pinakamakatatakot na diperensia. An sarong parasurat nagpahayag: “An pagigin buta pagkawara nin kakayahan na kamtan an pinakamahalagang kabtang kan satong namamansayan na kinaban.” Kadungan kaiyan, dakol an kaipuhan na magsarig na gayo sa iba.
Taano, tibaad maghorophorop kamo, ta lakop na marhay an pagkabuta? Bueno, nadangog na daw nindo an dapit sa tracoma? Iyan an causa nin mga nuebe milyon na kaso nin pagkabuta. An The New Encyclopædia Britannica nagsasabi manongod dian: “An helang nakakaolakit asin nagdadakol kun saen surusuan an mga populasyon sa bakong malinig na mga palibot. An kakulangan nin tubig para sa paghugas, asin an ribo-ribong langaw na naaakit sa odo nin tawo, nakakatabang sa paglakop kan helang. Sa ibang paagi an tracoma sa pangenot sarong sosyal imbes na medikal na problema; kun mapaooswag an mga pamantayan sa pamumuhay, maiinaan an pagsurusuan, malilikayan an mga langaw, asin masisierto an bastanteng suplay nin tubig, an pangyayari nin tracoma marikas na mag-iina.” Mga saro pang milyon an nagsasakit nin onchocerciasis, o nakakabutang helang na an causa ulod na dara nin nangangagat na mga langaw. O kumusta man an xerophthalmia? Minsan ngani depisil an ngaran, an katunayan iyo na iyan sarongparateng causa nin pagkabuta. Puwede man na magcausa nin pagkabuta an diabetes, dipteria, tipdas, scarlet fever, asin mga helang na ikinaoolakit paagi sa pagdodorog.
Mantang naggugurang kita, an satong pagheling puwedeng lumuya bilang resulta nin mga helang na siring baga kan macular degeneration asin glaucoma, asin dai malalaktawan niato an mga katarata. Nagsabi an The New Encyclopædia Britannica: “An katarata nagkacausa pa nin dakol na pagkabuta sa dakol na nasyon sa kinaban, asin ini mas nakakamondo sa gabos huli ta iyan madalion na mabolong paagi sa operasyon.”
Sa ibong nin bagong mga diskobremiento sa optalmolohiya, an paghale sa pagkabuta garo baga haloy pa. An iyo man sanang ensiklopedya nagsasabi: “An mga pag-oswag sa pag-olang asin an medikal patin pagbolong sa pagkabuta paagi sa operasyon mapapakinabangan sana nin sarong populasyon na kayang gastosan an medikal na pag-ataman. Sagkod na mapaoswag an mga pamantayan sa nutrisyon asin kalinigan nin sarong dakulang kabtang kan populasyon sa kinaban, magdadanay an halangkaw na bilang ngonyan nin pagkabuta na naolang na kutana.”
Mantang an mga antibiotiko asin operasyon siertong may kabtang sa paglaban sa pagkabuta, an paglaom sa permanenteng bolong konektado sa bagay na nangyari haros duwang ribong taon na an nakaagi.
Pagbolong sa mga Buta kan Kaaldawan ni Jesus
Imahinaron an sarong lalaki na labi pa sanang 30 anyos na naglalakaw sa sarong maalpog na dalan. Pakadangog na sia minaagi, duwang buta na nasa gilid kan dalan an nagkurahaw: “Maherak ka samo!” Minsan ngani an mga nagmamasid pinagbotan sindang tumoninong, an mga buta nagkurahaw nin makosog: “Maherak ka samo!” An lalaki maboot na naghapot: “Ano an boot nindong gibohon ko para saindo?” Galaga sindang nagsimbag: “Buklata an samong mga mata.” Imahinara ngonyan: An lalaki dinootan an saindang mga mata, asin tolos-tolos nag-ako sinda nin pakaheling!—Mateo 20:29-34.
Kanigoan na kagayagayahan para sa dati butang mga lalaking ini! Alagad, an pagkabuta lakop na gayo. Ini saro sanang pangyayari. Taano ta maninigo nindong tawan iyan nin atension? Huli ta si Jesus na taga-Nazaret an nagtao nin pag-oyon na makaheling an butang mga lalaking idto. An totoo, apuwera sa pagigin ‘linahidan na magpahayag kan maogmang bareta sa mga dukha,’ si Jesus ‘isinugo na magpamuklat sa mga buta.’—Lucas 4:18.
Nagngalas an mga tawo sa siring kamilagrosong mga pagbolong na ginibo paagi sa makapangyarihan na banal na espiritu nin Dios. Mababasa niato: “An kadaklan nagngaralas kan maheling ninda na an pula nagtataram asin an pilay naglalakaw patin an buta nakakaheling, asin pinamuraway ninda an Dios nin Israel.” (Mateo 15:31) Mayo nin ano man na kantidad o personal na pagpaheling o paghanap kan saiyang sadiring kamurawayan sa siring na mga pagpaomay, itinampok ni Jesus an pagkamoot asin pagkaherak ni Jehova Dios. Pero si Jesus maheherakon man sa buta sa espirituwal asin daing sukat na mga tawo na “maniwang asin nagkakaralagalag siring sa mga karnero na mayong pastor.”—Mateo 9:36.
Minsan ngani tibaad interesante an siring na kasaysayan, puwedeng maghorophorop kamo, Kumusta man ngonyan? Mantang ngonyan mayo ni saro na nagbobolong sa mga tawo arog kan ginibo ni Jesus, an mga pagpaomay daw na idto igwa nin kahulogan para sa sato? Igwa daw nin ano man na paglaom para sa mga buta? Tabi basahon an minasunod na artikulo.
[Blurb sa pahina 4]
“Sagkod na mapaoswag an mga pamantayan sa nutrisyon asin kalinigan nin sarong dakulang kabtang kan populasyon sa kinaban, magdadanay an halangkaw na bilang ngonyan nin pagkabuta na naolang na kutana.”—The New Encyclopædia Britannica