Pagbuklat kan mga Mata sa Maogmang Bareta

“AN LANGIT bakong gayong asul huli ta iyan dai naheheling kan buta,” an sabi kan talinhagang Danes. Alagad sa satong sibot na pan-aroaldaw na buhay, naheheling daw niato na an langit asul, sabi ngani? Minamansay daw niato an ngapit na igwa nin pagsarig? Kita daw talagang naniniwala sa maogmang bareta na itinatao kan Tataramon nin Dios, an Biblia?

Sa sinundan na artikulo, ipinaliwanag niamo an mga kabtang nin literal na pagkabuta. Siyasaton niato ngonyan an sarong klase nin pagheling na orog pang importante. Kalabot dian an satong nagdadanay na kaogmahan siring man an mga paglaom para sa satong mga namomotan.

Mayong duwa-duwa, kita napapaatubang sa “delikadong mga panahon na masakit pakibagayan.” (2 Timoteo 3:1) Ano an nangyayari mantang an mga tawo nagsasakit sa paghanapbuhay, nagtatagal nin mga kasakitan sa salud asin pampamilyang mga problema, asin pinapangganahan an sosyal na inhustisya asin kakulangan nin pagkamoot? Makamomondo nanggad, naheheling kan dakol na nagluluya an saindang pagtitiwala sa kapwa, relihiyon, asin gobyerno. Sa pakamate na mayo nin solusyon, an iba nagkokonklusyon na an saindang mga problema nungkang mareresolberan sa normal na paagi. Sa diaryo sa Brazil na Jornal da Tarde, si Jacob Pinheiro Goldberg nagsabi: “An mga tawo, sa atubang nin maringis na katunayan, napupurisaw na gayo kan mga sala na dai ninda nasasabotan sa tamang paagi, asin sinda nagsasarig sa nakakauyam na mistisismo.” Alagad, dawa pa rumaot an mga bagay, boot niatong gumamit nin marahay na kaisipan, bako daw?

Imahinara ngonyan na kaipuhan nindo nin sarong harong para sa saindong pamilya, asin bakong problema an kuwarta. Tibaad nangangalagkalag asin nagsosongko kamo sa manlaenlaen na harong sa laen-laen na pagtaraed. Maski ngani an mga ahente nin daga asin edipisyo pinagmamaigotan na itao an saindong mga kamawotan, an iniisip nindong harong nagdadanay na masakit hanapon. Minsan siring, huling kalabot an pagkakontento asin karahayan kan saindong pamilya, dai kamo minasuko, bako daw? Ngonyan imahinara an kaogmahan kun sa katapustapusi nanompongan nindo an harong na pangarap nindo.

Kun paanong magamit kamo nin panahon para sa paghanap nin sarong bagong harong, taano ta dai siyasaton an Biblia tangani na maheling an solusyon sa saindong mga problema? Kun paanong dapat niatong tirotimbangon an mga bagay kun kita nagdedesisyon dapit sa sarong harong, siring man kaipuhan niatong mangatanosan sa marahay na paagi sa kun ano an satong binabasa sa Tataramon nin Dios. Asin mas kapakipakinabang pa ngani kisa sa paghanap nin sarong harong iyo an satong pakaheling asin pag-ako sa katotoohan dapit ki Jehova Dios asin ki Jesu-Cristo. Si Jesus nagsabi: “Ini nangangahulogan nin buhay na daing katapusan, an saindang pagkua nin kaaraman dapit saimo, na iyo sanang tunay na Dios, asin sa saro na saimong sinugo, si Jesu-Cristo.”​—Juan 17:3.

Pero kun mahalagang marhay an mensahe kan Biblia, taano ta kadakoldakol an nagdadanay na buta sa maogmang bareta kaiyan? Sarong dahelan, asin puwedeng magngalas digdi an dakol, “an bilog na kinaban namumugtak sa kapangyarihan kan maraot.” (1 Juan 5:19) Bilang resulta, si Satanas na Diablo “binuta . . . an isip kan mga dai nagtutubod, tanganing an liwanag kan mamuraway na maogmang bareta manongod ki Cristo, na iyo an ladawan nin Dios, dai sumirang.” (2 Corinto 4:4) Dawa ngani nakakaheling kita paagi sa mga mata niato, an hotok an nag-iinterpretar sa liwanag na minalaog sa mata. Kaya an pagigin buta tinatawan man nin kahulogan na “mayong kakayahan o bakong andam na makamansay o maghusgar.” Ipinagigirumdom kaini an popular na sarabihon: “Mayo nin saro na siring kabuta kan mga habo na makaheling.”

An buta dai nakakaheling kan nasa atubangan nia, kaya puwede siang mameligro na makologan. An literal na pagkabuta nin dakol dai na ngonyan ikakabalik, alagad mayo nin saro na obligadong magdanay na buta sa espirituwal.

Pakapanggana sa Espirituwal na Pagkabuta

Kun paanong an bakong marahay na mga kamugtakan sa kalinigan makakapaluya sa pagheling, an nagrururong palibot makakakontribuwir sa moral na pagkabuta. Saro pa, nagpatanid si Jesu-Cristo tumang sa gibo nin tawong mga doktrina asin tradisyon. Liniwanag nia na an relihiyosong mga namomoon kan panahon na idto dinadaya an saindang aripompon: “Sinda mga butang parakabit. Kaya, kun an buta magkabit sa buta, pareho sinda mahoholog sa kali.”​—Mateo 15:14.

Imbes na padaya sa butang mga namomoon, kanigoan kaogma idtong binubuklat an saindang mga mata sa maogmang bareta dapit sa Kahadean nin Dios! Ipinahayag ni Jesus: “Sa paghokom na ini ako napadigdi sa kinaban na ini: tanganing an mga dai nakakaheling makaheling.” (Juan 9:39) Alagad, paano makakaheling an mga buta sa espirituwal? Bueno, ipadagos niato an satong pagrepaso manongod sa literal na pagkabuta.

Manlaenlaen na probisyon an makukua na ngonyan kan mga may diperensia an pagheling. Bako perming arog kaini an kamugtakan. Mayo talagang determinadong mga pagprobar an ginibo tanganing tabangan an mga buta bago inestablisar ni Valentin Haüy an espesyal na eskuwelahan para sa mga buta kan 1784. Dai nahaloy, inimbento ni Louis Braille an paagi na igwa kan saiyang ngaran; talagang ginibo nia iyan tanganing tabangan na makabasa an mga may diperensia sa pagheling.

Kumusta man an mga buta sa espirituwal? Sa dai pa sana nahahaloy na mga taon ginibo an odok na mga paghihingoa na ibalangibog an maogmang bareta minsan sa pinakapuwerang mga parte kan daga. (Mateo 24:14) Naoogma an mga Saksi ni Jehova na darahon an paglaom sa mga buta kapwa sa piguratibo asin sa pisikal.

An sarong babaeng taga-Brazil nagsurat: “Boot kong sabihon na sa ibong kan sakong pisikal na diperensia, nakakaheling ako​—sa espirituwal na paagi. Kanigoan kamakangangalas na Dios! Naoogma kaming maaraman na ‘bibikladon ni Jehova an saiyang kamot asin paninigoan an mawot nin lambang bagay na may buhay.’” (Salmo 145:16) Asin si Jorge, na buta sa pisikal, nagigirumdoman: “An sakong buhay puwede nanggad na bangaon sa duwang kabtang: bago asin pakatapos kan mga Saksi. . . . Paagi sainda, naponan kong masabotan an kinaban na may kalinawan asin kaliwanagan. Naoogma ako sa ekselenteng pakikiiba sa lambang saro sa kongregasyon.” Makawiwili man, nagtatao an Biblia sa sato nin kasegurohan na dai na mahahaloy mayo ni saro digdi sa daga an magigin buta​—sa literal o espirituwal. Paano daw iyan mangyayari? Paano magigin totoo sa bilog na daga na “si Jehova nagbubukas sa mga mata kan mga buta”?​—Salmo 146:8.

An Solamenteng Permanenteng Bolong​—Kahadean nin Dios

Sa ibong kan nag-ooswag na medikal na kaaraman, an kadakoldakol na helang padagos na nagkacausa nin pagkabuta, kolog, asin kagadanan. Kun siring, ano an kaipuhan tangani na mahale an malnutrisyon, bakong marahay na mga kamugtakan sa kalinigan, asin an kasakitan na hinahale pareho an pagheling asin an kagayagayahan nin buhay? An pagbolong ni Jesus sa mga buta asin iba pa sarong sadit na halimbawa para sa ngapit. Makaoogma, an saiyang gibohon na pagtokdo asin pagpaomay ipinanganino an mga bendisyon na ipapaabot sa daga sa irarom kan gobyerno kan Kahadean nin Dios.

Harani na an pambilog na kinaban na pagpaomay.a An programang ini nin Dios sa pagpaomay magayon na iiniilustrar ni apostol Juan: “Ipinaheling nia sa sako an salog kan tubig nin buhay, na malinaw siring sa kristal, na nagbobolos hale sa trono nin Dios asin kan Kordero pasiring sa tahaw kan tinampo kaiyan. Asin sa pangpang na ini kan salog asin duman sa ibong igwa nin mga kahoy nin buhay na nagbubunga nin kagduwang gusi nin bunga, na nagbubunga bulan-bulan. Asin an mga dahon kan mga kahoy para sa pagpaomay sa mga nasyon.”​—Kapahayagan 22:​1, 2.

An mga tataramon na arog baga kan “tubig nin buhay” asin “mga kahoy nin buhay” nag-iilustrar na sa pagkatapos kan presenteng maraot na palakaw, an nakakabolong na mga probisyon kan Kahadean nin Dios luway-luway na dadarahon an katawohan sa pagkasangkap. An totoo, an mga pakinabang sa pantubos na atang ni Jesus (kabale na an biyong kapatawadan nin mga kasalan), kaiba an kaaraman dapit ki Jesu-Cristo asin sa saiyang Ama, magdadara nin sangkap na salud asin buhay na daing katapusan.​—Juan 3:16.

Kaogmahan sa Bagong Kinaban nin Dios

Kun siring, imahinara an daga na mayo nang krimen, polusyon, o kadukhaan. Imahinara an saindong pamilya na namumuhay sa katoninongan sa ibinalik na Paraiso. (Isaias 32:​17, 18) Maogmahon nanggad na masdan an manlaenlaen na kolor na may sangkap na isip asin mga pakamate!

“An natural na kamugtakan para sa tawo iyo na mamuhay sa padagos na nagbabagong palibot​—nin liwanag, kolor, mga porma. Mayo nin siring sa daing pagliwatliwat na palibot sa naturalesa,” an sabi ni Faber Birren. “An kolor saro sa natural na mga kawilihan sa kinaban na ini. Iyan an kuwalidad nin naturalesa, bakong an ipinupuwera, asin an dakol sa makaoogmang buhay minadepende dian.”

Mahalaga nanggad an regalo na pagheling! Kanigoan na kagayagayahan kun an mga mata na dati buta​—sa literal o espirituwal—​makakaheling!

Iyo, sa nagdadangadang na ibinalik na Paraiso, an pagkabuta asin iba pang mga diperensia dai na magkacausa nin kamondoan! Mayo na nin madadaya. Mantang an tunay na pagkamoot maglalakop, an gabos maliliwanagan sa espirituwal. Iyan, asin an dakol pa, harani na, pero ngonyan na an panahon na magin inooyonan kan Saro na maotob kan saiyang makahulang panuga: “Sa panahon na iyan an mga mata kan mga buta magkakaburuklat”!​—Isaias 35:5.

[Nota sa Ibaba]

[Ritrato sa pahina 7]

Sa panahon na iyan an mga mata kan mga buta magkakaburuklat!