An Penalidad sa Pagigin Bakong Sadiosan

AN BATO ni Casey Lunsford dai nang gayo nagpupunsionar. Kinarkulo nin mga doktor na an tolo may kabangang taon an edad na aking lalaki mga tolo o apat na bulan na sana an ilalawig nin buhay kun dai mabalyohan nin bato. An saiyang mga magurang, na mga Saksi ni Jehova, nagdesisyon apabor sa operasyon; an totoo, an ama ni Casey an madonar kan saro niang bato sa aki.a An solamenteng kondisyon na itinao ninda dai nin dugong gagamiton—an mga Saksi ni Jehova nagsasayumang pasalin nin dugo huli sa Makakasuratan na mga dahelan.—Helingon an Gibo 15:20.

Plano kan pamilyang Lunsford na magpaoperar sa sarong ospital sa Texas na bantog na nakagibo nin mapangganang mga pagbalyo nin bato na mayo nin pagsasalin nin dugo. Alagad ta an sarong ospital na mga pirang milya sana an distansia sa harong kan mga Lunsford sa California nagustong gibohon an operasyon na mayo nin pagsasalin nin dugo. Pinili kan mga Lunsford an mas haraning ospital na ini.

Sa laog kan semana bago an operasyon, an mga tagaospital asin an siruhano sa pagbalyo kan organo paorootrong siniseguro sa mga magurang na dai kakaipuhanon an pagsasalin nin dugo o an orden kan husgado na nag-aautorisar sa pagsasalin sa ibong kan paghabo kan mga magurang. Minsan siring, pagkaoyon tolos kan mga magurang sa operasyon, an siruhano nagpoon na gumibo nin areglo na kumua nin orden kan husgado tanganing ipirit an dugo ki Casey. Nahimo pa ngani niang pasalidahan an sarong nagtatrabaho sa serbisyo sosyal na asignado sa kasong ini kan sia mag-insister na an mga magurang may katanosan na maaraman an manongod sa orden kan husgado. Kan aga kan operasyon, an ospital nagsumitir nin sertipikasyon na naghahagad nin orden kan husgado na salinan si Casey. An pagkasabi kan sertipikasyon garo baga si Casey nagdudugo na sa lamesa de operasyon mantang, an katotoohan, dai pa minapoon an operasyon! Sarong oras pakatapos kan operasyon, na mapangganang nagibo na mayo nin dugo, si Casey sinalinan nin dugo.

Inakusar kan pamilyang Lunsford an siruhano asin an ospital para sa paglapas sa saindang mga diretso sibil asin sa pandadaya, agresion, tuyong pagtao nin kasakitan sa boot, asin paglapas sa obligasyon fiduciario. Pakalihis nin apat na semanang bista, an hurado naghorophorop sa laog nin duwa may kabangang aldaw asin nagtao nin sentensia tumang sa siruhano asin ospital. Pinagbotan sindang bayadan an pamilyang Lunsford nin $500,000.

Minsan ngani binaliktad ngonyan kan huwes sa pagbista an desisyon sa mga paglapas sa mga diretso sibil asin nagboot na magkaigwa nin bagong pagbista sa mga sahot na pandadaya asin iba pa, an 12 hurado kombensido na an pandadaya kan ospital asin kan doktor nagtaong katanosan sa pagtao nin $500,000. Ipinarisa kan mga abogado kan pamilya na pagmamaigotan nindang suportaran an desisyon kan hurado paagi sa apelasyon.

[Nota sa Ibaba]