An Punto-de-Vista kan Biblia

Mga Kalamidad—Padusa daw nin Dios?

SA Pilipinas, nasyon na paorootrong tinatamaan nin natural na mga kalamidad, dakol an nag-iisip-isip, ‘Binabalo daw nin Dios an tawo paagi sa siring na mga kalamidad?’ Kan 1991, pakatapos kan pinakamapanlaglag na pagputok nin bulkan sa siglong ini, an pangenot na bareta sa sarong peryodiko sa Pilipinas naghapot: “Pagputok: Padusa daw nin Dios?”

An kolumnistang si Nelly Favis-Villafuerte nagpahayag nin siring na punto-de-vista kan sia sumurat: “Pero para sa mga Kristianong nagtutubod sa Biblia—sasaro sana an paliwanag: An pagputok kan bulkan na Mt. Pinatubo espesyal na pagpaheling nin kaanggotan nin Dios tanganing ipagirumdom liwat sato na igwa nin makangingirhat asin soberanong Dios na may nakalalabaw na kapangyarihan sa mga gibo-gibo asin kaaabtan nin mga tawo asin nasyon.” Huli sa kapahayagan na ini, an satong hapot:

Hinohokoman daw kan Makakamhan sa Gabos na Dios an mga Komunidad Ngonyan?

Dai maninigaran na iyan ginibo nin Dios kan mga nakaagi. An mga halimbawang nakatala sa Kasuratan manongod sa Baha kan aldaw ni Noe, paglaglag sa Sodoma asin Gomorra, asin sa duwang pangyayari an biyong paglaglag sa Jerusalem, an siudad na konektado sa saiyang dakulang ngaran, nagpapaheling na kaya kan Dios na Makakamhan sa gabos na hokoman an mga paorootrong nagkukulang sa pagsuportar sa saiyang mga pamantayan.—Genesis 7:11, 17-24; 19:24, 25; 2 Cronica 36:17-21; Mateo 24:1, 2.

Alagad kumusta man ngonyan? Na magkakaigwa nin panahon nin lakop sa kinaban na kalamidad ihinula ni Cristo Jesus sa Mateo kapitulo 24, Marcos kapitulo 13, asin Lucas kapitulo 21. Sa mga kapitulong ini, sia nagtao nin makahulang mga patanid sa mga pangyayari asin kamugtakan na magigin konektado sa pagtatapos kan palakaw na ini nin mga bagay tanganing marealisar nin naghohorophorop na mga tawo na sia naghahade nin dai naheheling hale sa langit. An mga hulang ini nangaootob ngonyan. Pero maninigong mangnohon na sa kada paghokom na nasambitan, si Jehova Dios nagtao nin klaro, paorootrong patanid bago nag-abot an paglaglag. (Amos 3:7) Pero, sa kaso nin natural na mga kalamidad na nangyayari sa satong panahon, an mga patanid sa parate gikan sa sekular na mga autoridad, basado sa sientipikong mga obserbasyon.

Saro pa, sinabi sato kan disipulong Santiago sa enot na kapitulo kan saiyang surat, bersikulo 13: “Paagi sa maraot na mga bagay an Dios dai puwedeng baloon ni binabalo man nia an siisay man.” Huli sa nagdadakol na populasyon sa bilog na kinaban, an tawo nag-iistar nang harani sa dakol na potensial na peligro. An pangangaipo nin lugar na maiistaran asin mapagtatanoman nin pagkakan nagbubunga nin paglinig sa dating mga kadlagan, na kun beses nakakokontribuwir sa paggrabe nin pirang natural na kalamidad huli sa sobrang pag-oran asin biglang paglipwas nin tubig.

Kun siring, bakong tamang sabihon na an natural na mga kalamidad direktang ipinadara kan Makakamhan sa gabos na Dios bilang padusa sa mga tawong yaon sa apektadong mga lugar. An totoo, madaling maheling na dakol na inosente, arog nin mga aki, an pinakanagsasakit sa mga panahon nin kasakitan. Minsan siring, minsan ngani bakong an Makakamhan sa gabos na Dios an pinaghahalean kan siring na mga kalamidad, puwede pa niatong ihapot:

May mga Leksion daw na Manonodan Kita?

Igwa. Para sa mga nag-iistar sa apektadong mga lugar, yaon an pagbalo sa kun gurano an pagpapahalaga ninda sa saindang materyal na mga rogaring kun ikokomparar sa buhay mismo. An iba guminibo nin dai kaipuhan, peligroso sa buhay na mga bagay sa siring na mga panahon tangani sanang iligtas an pirang rogaring. Kaipuhan niatong girumdomon na si Jesus nagsabi: “Minsan kun an sarong tawo abunda an saiyang buhay dai minagikan sa mga bagay na saiyang nasasadirihan.” (Lucas 12:15) An materyal na mga bagay masasalidahan, pero mayo nin tawong makasasalida sa saiyang buhay.—Mateo 6:19, 20, 25-34.

An natural na mga kalamidad nagpapahorophorop man sa mga tawo sa kun paano sinda namumuhay. Sinadol ni apostol Pablo an mga Kristiano na mag-ingat sa saindang paggawe: “Kaya maingat na helingon kun paano kamo naglalakaw, bakong siring sa mangmang kundi siring sa madonong, na ginagamit sa pinakamarahay an krisis, huli ta an mga aldaw maraot.” (Efeso 5:15, 16, Byington) An kada pagbalo na atubangon nin saro sa saiyang buhay pagirumdom kun gurano kahalaga na magkaigwa nin marigon na pagtubod.

An ikatolong leksion na nanonodan niato sa natural na mga kalamidad iyo na kaipuhan na pataluboon niato an orog na pakikipagkapwa, o empatiya, sa iba. Sa lugar kan kalamidad, kaipuhan na ipaheling an mamomoton na pagmakolog sa mga kapwa nagsasakit imbes na isipon na bahala na an kada saro sa saiyang sadiri. Ini partikularmenteng totoo sa mga tinawan kan paninimbagan na mag-asikaso sa iba. Ilinadawan ni propeta Isaias an mga inapod niang “prinsipe” na “siring sa pailihan sa doros asin taguan sa bagyo, siring sa mga sapa nin tubig sa sarong disierto, siring sa limpoy nin dakulang gapo sa mainit na daga.”—Isaias 32:1, 2.

Sa pagpaheling nin empatiya sa panahon nin mga kalamidad, kadakol kan okasyon na ihiras sa iba an nasa saro, kapwa sa tataramon asin sa gibo. Halimbawa, an pagputok kan bulkan na Mount Pinatubo asin an suminunod na mga kalamidad na dara kaiyan nagtao nin dai mabilang na mga oportunidad na makikabtang sa pagtabang sa mga kinaipuhan na dumulag sa kalamidad. Dakol an mayo nin ikabakal sa saindang kakanon sa aroaldaw. Kaya, an mga indibiduwal ikinapaheling an saindang pagkamatinao sa pagtabang sa iba. Pero, dakol pa an iniisip-isip:

Magkakaigwa daw nin Ultimong Paghokom sa Katawohan?

Iyo, magkakaigwa, arog kan malinaw na ipinaheheling sa Tataramon nin Dios. (Mateo 24:37-42; 2 Pedro 3:5-7) Bago umabot an paghokom na iyan, kaipuhan na gibohon an pagpatanid sa bilog na kinaban, arog kan ihinula pa ni Jesus: “Siring man, sa gabos na nasyon an maogmang bareta kaipuhan na ikahulit nguna.”—Marcos 13:10.

Kaya, an lambang saro sato kaipuhan na ihapot sa sadiri, ‘Ano daw an gigibohon ko?’ Sinasadol mi kamo na tawan nin panahon an pagsiyasat kun ano an isinasadol kan Biblia na gibohon kan lambang saro sa sato tanganing makaligtas sa panglobong kalamidad na iyan.