Kun May Natural na mga Kalamidad
Accra, Ghana, Hulyo 4, 1995: An pinakamakosog na oran sa haros 60 taon nagin dahelan nin grabeng baha. Mga 200,000 an nawaran nin gabos na bagay, 500,000 an dai na nakua an saindang harong, asin 22 an nagadan.
San Angelo, Texas, E.U.A., Mayo 28, 1995: An mga buwawi asin graniso rinaot an siudad na ini na may 90,000 na habitante, na nagin dahelan nin kinakarkulong $120 milyones (E.U.) na danyos.
Kobe, Hapon, Enero 17, 1995: An sarong linog na luminawig sana nin 20 segundos nagwalat nin rinibong gadan, manampulong ribo na nalugadan, asin mananggatos na ribo na nawaran nin harong.
KITA nabubuhay sa puedeng apodon na kapanahonan nin mga kalamidad. An sarong report kan Naciones Unidas naghahayag na sa peryodo nin 30 taon poon 1963-92, an bilang kan mga tawong nagadan, nalugadan, o huminale sa saindang lugar huli sa mga kalamidad luminangkaw nin promedyong 6 porsiento kada taon. An mamondong situwasyon nagpangyari sa NU na apodon an mga taon nin 1990 na “an Internasyonal na Dekada Para sa Pag-ina sa Natural na Kalamidad.”
Siempre, an puersa nin naturalesa—arog baga nin bagyo, pagtuga nin bulkan, o linog—dai man perming nagdadara nin kalamidad. Ginatos an nangyayari kada taon na mayo man nin danyos sa mga tawo. Alagad kun an kalabot dakol na nagadan asin naraot na rogaring, iyan tama sanang apodon na kalamidad.
An pagdakol nin natural na mga kalamidad garo dai maeebitaran. An librong Natural Disasters—Acts of God or Acts of Man? nagsasabi: “An mga tawo liniliwat an saindang palibot sa paaging nagpapangyari kaiyan na magin mas madaling magcausa nin mga kalamidad, asin minagawe sa paaging nagpapangyari sa saindang sadiri na mas madaling maapektaran kan mga peligrong iyan.” An libro nag-aatubang nin teoriya sanang halimbawa: “An sarong maluyang linog sa sarong lugar nin mga barong-barong na gibo sa laboy na ladrilyo sa gilid nin sarong bakilid na ampas puede nanggad na magin kalamidad kun kokonsideraron an pagkagadan asin pagsakit nin mga tawo. Alagad an kalamidad daw mas resulta kan mga pagkunogkunog kan daga o kan katunayan na an mga tawo nag-iistar sa maluya an pagkagibong mga harong na nasa peligrosong marhay na natotogdokan?”
Para sa mga estudyante sa Biblia, may saro pang dahelan kun taano an pagdakol nin natural na mga kalamidad ta bakong makangangalas. Haros 2,000 na taon na an nakaagi, si Jesu-Cristo naghula na an “pagtatapos kan palakaw nin mga bagay” tatandaan nin, kabale an iba pang mga bagay, “mga kakulangan nin kakanon asin mga linog sa surunodsunod na lugar.” (Mateo 24:3, 6-8) Ihinula man kan Biblia na durante kan “huring mga aldaw,” an mga tawo magigin mamomoton sa sainda man sana, mamomoton sa pirak, mayo nin natural na kapadangatan, asin mayong pagkamoot sa karahayan.a (2 Timoteo 3:1-5) An mga ugaleng ini parateng nagpapangyari sa tawo na humiro tumang sa pagpunsionar kan saiyang palibot, na pinangyayari an mga tawo na mas madaling maapektaran kan mga puersa nin naturalesa. An mga kalamidad na gibo nin tawo naggikan man sa daing pagkamoot na sosyedad na dian an kadaklan kaipuhan na mabuhay.
Mientras na orog na napapano nin tawo an satong planeta, mientras na an mga tawo orog na isinasapeligro kan gawe-gawe nin tawo, asin mientras na orog na ginagamit sa salang paagi an mga kayamanan kan daga, an tawo padagos na dadamaton nin mga kalamidad. An pagtao nin ayuda nag-aatubang nin mga angat, siring sa ipaheheling kan minasunod na artikulo.
[Nota sa Ibaba]
a Para sa dugang na impormasyon dapit sa tanda kan huring mga aldaw, helingon an librong Kaaraman na Minagiya Pasiring sa Buhay na Daing Katapusan, pahina 98-107, na ipinublikar kan Watchtower Bible and Tract Society of New York, Inc.
[Picture Credit Line sa pahina 3]
Itaas: Information Services Department, Ghana; too: San Angelo Standard-Times
[Picture Credit Line sa pahina 2]
TUTOB: Maxie Roberts/Courtesy of THE STATE