An Kristianong Kongregasyon kan Enot na Siglo

Kan Pentecostes 33 C.E., an banal na espiritu ibinubo sa 120 disipulo ni Jesus, asin sa dakol na tataramon sinda nagpoon na magtaram manongod sa makangangalas na mga bagay nin Dios. Ini an pagkapundar kan Kristianong kongregasyon. Mga 3,000 na bagong disipulo an binautismohan kan aldaw na idto.—Gibo, kapitulo 2.

An mga kongregasyon sa laen-laen na lugar nagdakol mantang an mga apostol asin iba pa padagos na nagtataram kan Tataramon nin Dios na may kapusoan. Arog kan nakatala sa librong Mga Gibo, dai nahaloy an paghuhulit nakalakop sa bilog na lugar kan Mediterraneo, poon sa Babilonya asin North Africa sagkod sa Roma asin tibaad sa España.—Roma 15:18-29; Colosas 1:23; 1 Pedro 5:13.

Saen man magin disipulo an mga tawo, sinda nagpoporma nin mga kongregasyon. An kuwalipikado, maygurang na mga lalaki ninombrahan bilang kamagurangan, o mga paraataman, tanganing mapagdanay an pamantayan nin tamang katokdoan asin gawe sa mga kongregasyon. Alagad sinda bakong klero; sinda mga ministro asin katabang na mga nagtatrabaho para sa Kahadean nin Dios.—Gibo 14:23; 20:28; 1 Corinto 3:5; 5:13; Colosas 4:11; 1 Timoteo 3:1-15; Hebreo 13:17; 1 Pedro 5:1-4.

An mga apostol asin an iba pang kadayupot na mga katabang naglingkod bilang namamahalang grupo. Sinda nangenot sa paghuhulit. Renesolberan ninda an mga problema sa kongregasyon sa Jerusalem. Isinugo ninda an kuwalipikadong mga tugang sa Samaria asin Antioquia tanganing pakosogon an bagong mga nagturubod duman. Inasikaso ninda an pasuruhay manongod sa pagturi, na ipinadara an saindang desisyon tanganing kuyugon kan gabos na kongregasyon. Alagad an mga lalaking ini bakong kagurangnan nin iba kundi mga lingkod asin katabang kan bilog na kongregasyon.—Gibo 4:33; 6:1-7; 8:14-25; 11:22-24; 15:1-32; 16:4, 5; 1 Corinto 3:5-9; 4:1, 2; 2 Corinto 1:24.

An enot na mga disipulo namidbid bilang mga Kristiano, na inapod nin siring sa paggiya nin Dios. Igwa man sinda nin mga katokdoan na ipinalaen sinda; an mga ini inapod na mga katokdoan kan mga apostol, o arogan nin marahay na mga tataramon. An Makakasuratan na katokdoan na ini namidbid man bilang an katotoohan.—Juan 17:17; Gibo 2:42; 11:26; Roma 6:17; 1 Timoteo 4:6; 6:1, 3; 2 Timoteo 1:13; 2 Pedro 2:2; 2 Juan 1, 4, 9.

Sinda lakop sa kinaban na kasararoan nin mga tugang na sararo sa pagkamoot. Nagpaheling sinda nin interes sa saindang mga kapagtubod sa ibang nasyon. Kun nagbibiyahe sa ibang lugar, pinadagos sinda nin mga kapagtubod sa saindang harong. Pinapagdanay ninda an halangkaw na pamantayan sa moral na paggawe, huling sinda banal na banwaan na siblag sa kinaban. Danay nindang ginirumdom an panahon para sa aldaw kan presensia ni Jehova asin maigot na ipinahayag sa publiko an saindang pagtubod.—Juan 13:34, 35; 15:17-19; Gibo 5:42; 11:28, 29; Roma 10:9, 10, 13-15; Tito 2:11-14; Hebreo 10:23; 13:15; 1 Pedro 1:14-16; 2:9-12; 5:9; 2 Pedro 3:11-14; 3 Juan 5-8.

Minsan siring, arog kan ihinula, nagpoon an dakulang apostasiya, kan ikaduwa asin ikatolong siglo. Ini nagbunga nin darakulang sistema nin iglesya na dai nagpadanay sa kalinigan kan enot na Kristianong kongregasyon kun dapit sa katokdoan, paggawe, organisasyon, asin paninindogan dapit sa kinaban.—Mateo 13:24-30, 37-43; 2 Tesalonica, kapitulo 2.

Alagad ihinula ni Jesus na mangyayari an pagbabalik sa tunay na pagsamba sa pagtatapos kan palakaw nin mga bagay. An mga Saksi ni Jehova nagtutubod na an pagbabalik na ini maheheling sa saindang gibohon sa bilog na kinaban sa satong panahon, mga 1,900 na taon pakalihis kan hula ni Jesus. An minasunod na pahina magpapaliwanag kun taano.

• Paano napundar an Kristianong kongregasyon, asin paano iyan nagtalubo?

• Paano ginibo an pagdirehir sa kongregasyon na idto?

• Anong mga bagay an malinaw na nagpalaen kan mga Kristiano kan enot na siglo?

[Mapa sa pahina 7]

(Para sa aktuwal na format, hilingon an publikasyon)

Black Sea

Caspian Sea

Great Sea

Red Sea

Persian Gulf

Lugar na naabot kan maogmang bareta kan enot na siglo

ITALY

Rome

GREECE

MALTA

CRETE

CYPRUS

BITHYNIA

GALATIA

ASIA

CAPPADOCIA

CILICIA

SYRIA

ISRAEL

Jerusalem

MESOPOTAMIA

Babylon

An nagkapira sa mga lugar na ini nagturubod

ILLYRICUM

MEDIA

PARTHIA

ELAM

ARABIA

LIBYA

EGYPT

ETHIOPIA

[Mga ritrato sa pahina 7]

An enot na mga Kristiano naghulit kan Tataramon nin Dios na may kapusoan

An mga Kristiano inako sa harong nin mga kapagtubod saen man sinda magduman