Pakikikomunikar Paagi sa Surat

NAPAKARHAY nin mga surat an buhay asin gawe-gawe nin minilyon na tawo. An kadaklan na libro kan Kristianong Griegong Kasuratan sa kapoonpooni mga surat. Kita ngonyan puedeng sumurat tanganing pakosogon an bagong mga may pagtubod, makikomunikar sa mga katood, parigonon an boot nin mga tugang na lalaki saka babae na nagsaabaga nin espesyal na mga responsibilidad, pasarigon an boot kan mga napapaatubang sa mga kasakitan, asin ipaabot an impormasyon na kaipuhan tanganing mapangatamanan an mga aktibidad kan kongregasyon.—1 Tes. 1:1-7; 5:27; 2 Ped. 3:1, 2.

An pagsurat saro man na epektibong paagi nin paghuhulit. Sa nagkapirang lugar, dakol an nag-iistar sa mga apartment na guardiadong marhay o otel para sa panhaloyan na mga residente na bakong libre an paghuhulit. An nagkapira mayo sa harong sa kadaklan na panahon, kaya nalalaktawan niato sinda kun kita naghaharongharong. An iba nag-iistar sa napapasuway na mga lugar.

Tibaad kun beses dai kamo makahale sa harong nindo huli sa helang, maraot na panahon, o kurpio. Puede daw kamong sumurat sa pagtao nin dugang pang patotoo sa sarong paryente o sa saro na nakaolay nindo nin impormal? Nagbalyo daw an saro sa saindong inaadalan sa Biblia? An surat nindo tibaad iyo an eksaktong kaipuhan nia tanganing magdanay na buhay an saiyang espirituwal na interes. O tibaad puede nindong paabotan nin angay na impormasyon sono sa Kasuratan an mga bago pa sanang kasalon, magkaaki, o magadanan nin namomotan.

Paghuhulit Paagi sa Surat

Kun nagsusurat sa paghulit sa saro na dai pa nindo nakamidbid, enot ipamidbid an saindong sadiri. Puede nindong ipaliwanag na nakikikabtang kamo sa sarong internasyonal na gibohon nin mga boluntaryo. Kun garo baga angay na gibohon, sambiton na saro kamo sa Mga Saksi ni Jehova. Sabihon sa tawo kun taano ta nagsurat kamo imbes na personal na dumalaw. Magsurat sa paagi na garo baga kaolay mismo nindo an tawo. Pero, kaoyon kan instruksion na “magin kamong maingat siring sa mga halas pero inosente siring sa mga salampati,” isipon na marhay kun guranong impormasyon an itatao nindo manongod sa saindong sadiri.—Mat. 10:16.

Iiba sa surat an sasabihon kutana nindo sa tawo kun sia nadalaw nindo. Puede nindong gamiton an sarong introduksion hale sa librong Reasoning o an sono sa Kasuratan na pag-atubang hale sa sarong bagong luwas kan An Satong Ministeryo sa Kahadean. Puede kamong magpalataw nin hapot asin enkaminaron an tawo na isip-isipon iyan. An nagkapirang parahayag ipinaliliwanag sana na kita igwa nin libreng programa sa pagsimbag sa mga hapot sa Biblia dangan sinisitar an nagkapirang titulo nin kapitulo sa saro sa satong mga pantabang sa pag-adal. May sampol na surat sa paghuhulit sa pahina 73. Iyan tibaad may ikataong ideya sa saindo, alagad marahay na gibohon na laen-laen an laog. Ta kun dai, tibaad pag-abot nin panahon paorootrong maresibi nin mga tawo an iyo man sanang surat.

An nagkapirang tawo magabat an boot na basahon an halawig na surat hale sa sarong dai kamidbid. Kaya tibaad sarong kadonongan na palipoton sana an saindong surat. Taposon an surat nindo bago tibaad mapagal na sa pagbasa kaiyan an nakaresibi. Tama na ilakip an inimprentang imbitasyon sa mga pagtiripon sa Kingdom Hall. Puede nindong ilakip an sarong pulyeto, brosyur, o sarong luwas kan An Torrengbantayan o Awake! asin iesplikar na ini puedeng isuplay nin regular kun gusto ninda. O puede nindong ihapot kun puedeng sumongko sa harong kan sinusuratan tangani na orog pa siang makaolay manongod sa tinokar na tema.

Sarong Halipot na Komento Manongod sa Porma

Helinga ngonyan an sampol na surat. Mangnoha an minasunod: (1) Areglado an itsura kaiyan, bakong disareglado. (2) Dawa kun mawara an sobre, an nakaresibi igwa pa man giraray kan ngaran saka adres na pankoreo kan nagpadara. (3) An katuyohan kan surat sinabi nin simple asin deretso sa punto sa enot na parapo. (4) An lambang prinsipal na punto tinatawan nin atension sa sarong separadong parapo. (5) Huli sa katuyohan kaiyan, an surat bakong sobra kaimpormal ni sobra kapormal.

Sa mas pormal na surat, arog kan tibaad ipadara kan sekretaryo kan kongregasyon sa sangang opisina, ibubugtak an ngaran kan kongregasyon, kaiba an ngaran kan sekretaryo, an saiyang adres na pankoreo, asin an petsa. Yaon man an ngaran saka adres kan tawo o organisasyon na pinadadarahan kan surat. Sinusundan ini nin angay na pagtaong-galang. Bilang katapusan kan surat, sa nagkapirang lenguahe an fraseng arog kan “An minagalang” o “Sa bilog na sinseridad” minalataw sa ibabaw kan pirma. An mismong pirma maninigo na surat-kamot.

Sa arin man na surat, tawan nin atension an tamang pagdeletriya, gramatika, puntuasyon asin, siempre, pagigin malinig saka areglado. An paggibo kaiyan matao nin dignidad sa saindong surat asin sa mensaheng laog kaiyan.

Sa luwas kan sobre, pirmeng itao an adres na pinaghalean—mas marahay kun an sadiri nindong adres na pankoreo. Kun sa pagmate nindo bakong madonong na itao an sadiri nindong adres kun naghuhulit sa mga dai kamidbid paagi sa surat, ihapot sa kamagurangan kun aaprobaran nindang gamiton nindo an adres kan lokal na Kingdom Hall. An adres kan Watch Tower Society dai noarin man maninigong gamiton sa katuyohan na ini, ta ipinaririsa kaini na bako man na tama na an surat nindo ipinadara hale sa mga opisina kan Sosyedad asin ini makariribong. Kun mayo nin itinaong adres na pinaghalean asin may ilinakip na literatura, ini tibaad magtao man kan salang impresyon na an Sosyedad an nagpadara.

Seguradohon na supisyente an selyong ibinugtak nindo, nangorogna kun may ilinakip kamong literatura. Kun kulang an selyo, tibaad singilon an nakaresibi kan kantidad, asin irarayo kaini an atension sa mensahe nindo. Girumdomon na sa dakol na nasyon kun may kalakip na brosyur o magasin, mas mahal an hinahagad na selyo kisa para sana sa surat.

An Tamang Tono

Pakatapos nindo kan saindong surat, basahon iyan tanganing mapagturotimbang an laog. Ano an tono kaiyan? Iyan daw makikatood asin mataktika? An pagkamoot asin kabootan kabilang sa mga kualidad na hinihingoa niatong ipaheling sa satong relasyon sa iba. (Gal. 5:22, 23) Kun may marisa kamong negatibong tono o kadikit na pesimismo, liwaton an pagkasabi.

An surat puedeng makaabot sa mga lugar na dai nindo madudumanan. An bagay sanang ini dahelan nang iyan nagigin mahalagang kasangkapan sa ministeryo. Mantang an surat nindo nagrerepresentar sa saindo asin sa mga bagay na mahalaga sa saindo, isipon an sinasabi kaiyan, an itsura kaiyan, asin an tono kaiyan. Tibaad ikatao kaiyan an eksaktong kaipuhan na mapapoon, mapakosog, o maparigon an boot nin sarong mahalagang marhay na kalag sa dalan pasiring sa buhay.