Hapot

◼ Taano ta kaipuhan na magmaan kun nagpapatotoo paagi sa surat?

An pagpatotoo paagi sa surat haloy nang probado na paagi nin paghiras kan maogmang bareta. Minsan siring, an nakaagi pa sanang mga pangyayari sa kinaban nagpangyari sa mga tawo na magin mapagmaan sa pagbukas nin dai midbid na surat. An mga sobre hale sa dai midbid na mga ginikanan o mayong adres kan nagpadara parateng pinagsususpetsahan, nangorogna kun iyan surat-kamot asin mahibog. Tibaad itapok kan mga kagharong an siring na surat na dai iyan binubuksan. Paano niato malilikayan ini na mangyari?

Kun posible, an surat sagkod sobre maninigong minakinilya. Maninigo na an sobre may ngaran kan kagharong. Dai iyan ipagpadara sa “Residente.” Dugang pa, pirmeng ibugtak an adres kan nagpadara. Kun bakong marahay na ipaheling an saindong personal na adres, isurat an saindong ngaran asin adres kan Kingdom Hall. Dai magpadara nin mga surat na daing ngaran kan nagpadara. Dai noarin man paggamiton an adres kan sangang opisina.​​—Helingon an “Hapot” sa Nobyembre 1996 na An Satong Ministeryo sa Kahadean, pahina 2.

An dugang pang mga suhestion asin sampol nin surat makukua sa bagong libro na, Makinabang sa Edukasyon sa Teokratikong Paadalan sa Pagmiministro, pahina 71-3. An mga giyang ini makakatabang sa sato na gamiton nin epektibo an mga surat sa pagpaabot sa iba kan maogmang bareta.