Pagdoon kan Prinsipal na mga Ideya

AN EPEKTIBONG parabasa bako sanang an indibiduwal na sentence an naheheling, bako sana nganing an parapo na namumugtakan kaiyan. Kun sia nagbabasa, nasa isip nia an prinsipal na mga ideya sa bilog na materyales na saiyang iinaatubang. Ini nakakaimpluwensia sa kun saen an idodoon nia.

Kun dai susunodon an prosesong ini, mawawaran nin pinakalataw na mga punto sa pagpahayag. Mayo nin malataw nin malinaw. Pagkatapos kan pag-atubang, tibaad depisil na magirumdoman an ano man bilang lataw.

Parate na dakula an magigibo nin tamang atension sa pagdodoon kan prinsipal na mga ideya tanganing mapakarhay an pagbasa nin sarong salaysay sa Biblia. An siring na pagdodoon makatatao nin dagdag na kahulogan sa pagbasa kan mga parapo sa sarong pag-adal sa Biblia o sa pagtiripon kan kongregasyon. Asin iyan nangorognang importante kun nagdidiskurso hale sa sarong manuskrito, arog kan ginigibo kun beses sa satong mga kombension.

Kun Paano Iyan Gigibohon. Sa paadalan, tibaad maasignaran kamong basahon an sarong kabtang kan Biblia. Ano an maninigong idoon? Kun may mahalagang marhay na ideya o importanteng pangyayari na dian nakapalibot an babasahon nindo, tama sana na palatawon iyan.

Baga man berso o prosa, talinhaga o estorya an kabtang na babasahon nindo, makikinabang an mga nagdadangog sa saindo kun toltol an pagbasa nindo kaiyan. (2 Tim. 3:16, 17) Tangani na magibo ini dapat nindong konsideraron an babasahon nindo sagkod an mga magdadangog sa saindo.

Kun babasahon nindo nin makosog an sarong publikasyon sa pag-adal sa Biblia o sa pagtiripon kan kongregasyon, ano an prinsipal na mga ideya na kaipuhan nindong idoon? Ibilang na prinsipal na mga ideya an simbag sa imprentadong mga hapot sa pag-adal. Idoon man an mga ideya na konektado sa mas maitom an letra na subtema na napapairaroman kan materyales.

Dai irinerekomendar na ugaleon nindong gumamit nin manuskrito para sa mga pahayag sa kongregasyon. Minsan siring, may beses na itinatao an manuskrito para sa nagkapirang diskurso sa kombension tangani na pararehong ideya an ikaatubang sa pararehong paagi sa gabos na kombension. Tangani na ikadoon an prinsipal na mga ideya sa siring na manuskrito, dapat ngunang maingat na analisaron kan magpapahayag an materyales. Ano an prinsipal na mga punto? Maninigo na mamidbid nia an mga ini. An prinsipal na mga punto bako sanang mga ideya na sa paghona nia interesante. An mga iyan an mayor na mga ideya na dian nakapalibot an materyales. Kun beses an sarong halipot pero malaman na deklarasyon nin prinsipal na ideya sa manuskrito nag-iintrodusir nin salaysay o argumento. Mas parate, igwa nin mapuersang deklarasyon pakatapos na iatubang an nagsusuportar na ebidensia. Kun naaraman na kun arin an mayor na mga puntong ini, iyan maninigong markahan kan magpapahayag sa saiyang manuskrito. Parate na iyan pira sana, dai gayod malabi sa apat o lima. Sunod, kaipuhan na ensayohon nia an pagbasa sa paagi na an mga iyan madaling maaaraman kun arin kan mga nagdadangog. Ini an pinakalataw na mga punto kan pahayag. Kun an materyales ipinahayag na may tamang pagdodoon, mas posible na magirumdoman an prinsipal na mga ideyang ini. Iyan an maninigong magin pasohan kan nagpapahayag.

May manlaenlaen na paagi na ikapaaabot kan nagpapahayag an pagdodoon na kaipuhan tangani na matabangan an mga nagdadangog na maaraman kun arin an prinsipal na mga punto. Puede siang gumamit nin orog na entusiasmo, pagbago nin rikas, hararom na pagsaboot, o tamang mga mustra, sa pagsambit nin nagkapira.