Pag-otro Tanganing Ikadoon

KABALE sa epektibong pagtotokdo an paggamit nin pag-otro. Kun bako sanang sarong beses na sinasabi an sarong importanteng punto, mas posibleng marhay na magirumdoman iyan kan mga nag-atender. Kun an ideya isinasabi giraray sa medyo laen man na paagi, tibaad masabotan pa ngani ninda iyan nin mas malinaw.

Kun dai nagigirumdoman kan mga naghihinanyog sa saindo an saindong sinasabi, an mga tataramon nindo dai makakaimpluwensia sa saindang tinutubod o sa pamumuhay ninda. An padagos gayod nindang iisip-isipon an mga punto na tinawan nindo nin espesyal na pagdodoon.

Si Jehova, an satong Kaharohalangkaweng Paratokdo, nagtatao kan arogan para sa sato sa paggamit nia nin pag-otro. Itinao nia an Sampulong Togon sa nasyon nin Israel. Paagi sa anghel na representante sa pagtaram, ipinadangog nia sa nasyon an mga togon na idto sa Bukid nin Sinai. Pagkatapos itinao nia iyan ki Moises sa pormang nasusurat. (Ex. 20:1-17; 31:18; Deut. 5:22) Sa instruksion ni Jehova, sinabi giraray ni Moises an mga togon na iyan sa nasyon bago sinda naglaog sa Dagang Panuga, asin paagi sa banal na espiritu, isinurat iyan ni Moises, na makukua sa Deuteronomio 5:6-​21. Kabilang sa mga togon na itinao sa Israel an kahagadan na kamotan asin paglingkodan ninda si Jehova sa bilog nindang puso, kalag, asin kosog. Ini paorootro man na isinabi. (Deut. 6:5; 10:12; 11:13; 30:6) Taano? Huli ta, arog kan sabi ni Jesus, idto “an nakalalabi sa gabos asin enot na togon.” (Mat. 22:34-38) Paagi ki propeta Jeremias, pinagirumdom ni Jehova an mga taga Juda nin labing 20 beses manongod sa pagigin seryoso kan pagkuyog sa saiya sa gabos na ipinagboot nia sa sainda. (Jer. 7:23; 11:4; 12:17; 19:15) Asin paagi ki Ezequiel, sinabi nin Dios nin labi sa 60 beses na an mga nasyon ‘kaipuhan na makaaram na ako si Jehova.’​—Ezeq. 6:10; 38:23.

Sa rekord kan ministeryo ni Jesus, maoobserbaran man niato an epektibong paggamit nin pag-otro. Halimbawa, yaon an apat na Ebanghelyo​—na balang saro nagtatratar sa importanteng mga pangyayari na sinasabi sa saro o labi pa sa ibang Ebanghelyo alagad sa medyo laen man na anggulo. Sa sadiri niang pagtotokdo, bako sanang sa sarong okasyon na trinatar ni Jesus an iyo man sanang pundamental na puntong itinotokdo alagad sa laen-laen na paagi. (Mar. 9:34-37; 10:35-45; Juan 13:2-17) Asin mantang yaon sa Bukid nin mga Olibo mga pirang aldaw bago sia nagadan, ginamit ni Jesus an pag-otro tanganing idoon an mahalagang marhay na hatol na ini: “Magdanay kamong mapagbantay, . . . huli ta dai nindo aram kun sa anong aldaw madatong an saindong Kagurangnan.”​—Mat. 24:42; 25:13.

Sa Ministeryo sa Langtad. Kun nagpapatotoo kamo sa mga tawo, linalaoman nindo na logod magirumdoman ninda an saindong sinasabi. An epektibong paggamit nin pag-otro makatatabang na maotob an pasohan na iyan.

Sa parate, an pag-otro sa panahon na pinag-oolayan an sarong bagay makatatabang na ikatudok iyan sa isip nin tawo. Sa siring, pakabasaha kan sarong teksto, ikadodoon nindo iyan paagi sa pagtokdo sa mayor na kabtang kaiyan asin paghapot, “Narisa daw nindo kun paano an pagkasabi kan tekstong iyan?”

Magagamit man nin epektibo an pangultimong mga sentence sa orolay. Halimbawa, puede nindong sabihon: “An prinsipal na punto na logod magirumdoman nindo sa pag-oolay niato iyo na . . .” Dangan sabihon giraray iyan sa simpleng paagi. Iyan puedeng arog kaini: “An katuyohan nin Dios iyo na an daga magin paraiso. Seguradong maootob an katuyohan na iyan.” O puedeng: “Malinaw na ipinaheheling kan Biblia na kita nabubuhay sa huring mga aldaw kan sistemang ini nin mga bagay. Tangani na makaligtas kita sa katapusan kaiyan, kaipuhan na manodan niato kun ano an hinahagad sa sato nin Dios.” O puede man na: “Arog kan naheling niato, an Biblia nagtatao nin praktikal na hatol kun paano aatubangon an mga problema sa buhay pampamilya.” Sa nagkapirang kaso puede nindong otrohon sana an sarong kotasyon sa Biblia bilang an puntong gigirumdomon. Siempre, nagkakaipo nin pagplano antes pa tanganing magibo ini nin epektibo.

Sa mga pagdalaw liwat, pati sa mga pag-adal sa Biblia, puedeng kalabot sa paggamit nindo nin pag-otro an mga hapot sa pagrepaso.

Kun an saro nadedepisilan na masabotan o iaplikar an hatol sa Biblia, tibaad kaipuhan na bako sanang sarong beses nindong tokaron an tema. Hingoahon na pag-olayan iyan sa laen-laen na anggulo. Dai kaipuhan na lumawig an orolay alagad iyan maninigong makaenkaminar sa inaadalan na padagos na isip-isipon an bagay. Girumdoma, ginamit ni Jesus an arog kaining pag-otro sa pagtabang sa saiyang mga disipulo na mahale an kamawotan na mangenotan.​—Mat. 18:1-6; 20:20-28; Luc. 22:24-27.

Kun Nagdidiskurso. Kun kamo nagpapahayag sa plataporma, an obheto nindo bako sanang magtao nin impormasyon. Boot nindo na masabotan iyan kan mga nagdadangog, magirumdoman iyan, asin iaplikar iyan. Tanganing magibo iyan, gamiton nin epektibo an pag-otro.

Minsan siring, kun sobra man kaparate nindong inootro an prinsipal na mga punto, tibaad mawara an atension kan mga nagdadangog sa saindo. Maingat na pumili nin mga punto na maninigo sa espesyal na pagdodoon. Parate na ini an prinsipal na mga punto na dian nakapalibot an saindong pahayag, alagad puedeng kaiba man dian an ibang punto na may espesyal na halaga sa mga nagdadangog sa saindo.

Tanganing magamit an pag-otro, puedeng i-outline nguna nindo an prinsipal na mga punto nindo sa introduksion. Gibohon iyan paagi sa haralipot na deklarasyon na nagtatao nin mahiwas na sumaryo kan tatrataron nindo, mga hapot, o haralipot na halimbawa na nag-aatubang nin mga problemang reresolberan. Puede nindong sabihon kun pira an prinsipal na punto asin numerohan iyan. Dangan detalyadong ipaliwanag an kada saro sa mga puntong iyan sa mayor na parte kan saindong pahayag. Madudugangan nin puersa an pagdodoon sa mayor na parte kan saindong pahayag paagi sa pagsabi giraray kan kada prinsipal na punto bago dumagos sa masunod. O magigibo iyan paagi sa paggamit nin halimbawa na kalabot an pag-aplikar kan prinsipal na punto. Orog pang ikadodoon an prinsipal na mga punto nindo paagi sa paggamit nin konklusyon na nagsasabi giraray kan mga iyan, nagsesentro kan atension dian paagi sa paggamit nin mga pagkomparar kan kalaenan, minasimbag sa mga hapot na pinalataw, o nagsasabi sa halipot kan mga solusyon sa iinatubang na mga problema.

Apuera sa mga nasambitan na, maingat na inoobserbaran nin eksperyensiadong nagpapahayag an mga indibiduwal na minakompuesto sa mga nagdadangog sa saiya. Kun an nagkapira sa sainda nadedepisilan na masabotan an sarong ideya, aram iyan kan nagpapahayag. Kun importante an punto, tinatratar nia iyan giraray. Minsan siring, tibaad dai maotob an katuyohan nia kan pag-otro sa iyo man sanang mga tataramon. Bakong arog sana kaiyan an pagtotokdo. Sia dapat na madaling makibagay. Tibaad kaipuhan na dagdagan nia nin impromptu an saiyang pahayag. An pakanood nindo na maatubang an mga pangangaipo kan mga nagdadangog sa arog kaining paagi iyo an madeterminar sa dakulang paagi sa pagigin epektibo nindo bilang paratokdo.