“Magsagibo . . . nin Hustisya” sa Paglakaw Kaiba nin Diyos

1-3. (a) Taano ta may utang na buot kita ki Jehova? (b) Anong balos an hinahagad sa sato kan satong mamumuton na Parasalbar?

IMAHINARA na nalaom ka sa sarong palubog na barko. Kan pighuhuna mo na mayo na nin paglaom, nag-abot an sarong parasalbar asin binutong ka para makaligtas. Siguradong nakamati ka nin kaginhawahan mantang irinarayo ka sa peligro kan tawong iyan asin sinasabi saimo: “Ligtas ka na”! Bako daw na makakamati ka nin utang na buot sa tawong iyan? Iyo, magigin utang mo sa saiya an saimong buhay.

² Sa nagkapirang bagay, pig-iilustrar kaiyan an ginibo ni Jehova para sa sato. Daing duda na may utang na buot kita sa saiya. Iyo, itinao niya an pantubos, na dahil diyan nagin posible na maisalbar kita sa kapangyarihan nin kasalan asin kagadanan. Namamatian ta na ligtas kita huling aram niyato na sagkod na nagtutubod kita sa mahalagang marhay na atang na iyan, an satong mga kasalan pinapatawad, asin siguradong makakamtan niyato an buhay na daing sagkod. (1 Juan 1:7; 4:9) Arog kan nasabutan niyato sa Kapitulo 14, an pantubos sarong dakulaon na kapahayagan kan pagkamuot asin hustisya ni Jehova. Ano an dapat na magin reaksiyon ta diyan?

³ Tama sanang pag-isipan kun ano an balos na hinahagad sa sato kan sato mismong mamumuton na Parasalbar. Sinasabi ni Jehova paagi sa propetang si Mikas: “Sinabi niya sa saimo, O tawo, kun ano an marahay. Asin ano an hinahagad sa saimo ni Jehova? An magsagibo sana nin hustisya, kamutan an kaimbudan, asin maglakaw na may kababaan nin buot kaiba kan saimong Diyos!” (Mikas 6:8) Mangnuha na saro sa mga balos na hinahagad sa sato ni Jehova iyo na “magsagibo [kita] nin hustisya.” Paano ta iyan magigibo?

Pagmaigutan na Ipahiling an “Tunay na Katanusan”

4. Paano ta naaraman na inaasahan ni Jehova na mamumuhay kita suno sa saiyang matanos na mga pamantayan?

⁴ Inaasahan ni Jehova na mamumuhay kita suno sa mga pamantayan niya nin tama asin sala. Mantang an mga pamantayan niya makatanusan asin matanos, pinagmamaigutan ta na ipahiling an hustisya asin katanusan pag sinusunod ta an mga iyan. “Makanuod kamong gumibo nin marahay, hanapon nindo an hustisya,” an sabi kan Isaias 1:17. Sinasadol kita kan Tataramon nin Diyos na ‘hanapon an katanusan.’ (Sofonias 2:3) Sinasadol man kita kaiyan na “isulot an bagong personalidad na linalang sigun sa kabutan nin Diyos, kauyon kan tunay na katanusan.” (Efeso 4:24) An tunay na katanusan—tunay na hustisya—minarayo sa kadahasan, karigsukan, asin imoralidad, huli ta binabasang-basang kan mga iyan kun ano an banal.—Salmo 11:5; Efeso 5:3-5.

5, 6. (a) Taano ta bakong pagabat para sa sato an pagsunod sa mga pamantayan ni Jehova? (b) Paano ipinapahiling kan Bibliya na an pagmamaigot na ipahiling an katanusan sarong nagpapadagos na proseso?

⁵ Pagabat daw para sa sato an pagsunod sa matanos na mga pamantayan ni Jehova? Bako. An puso na naaakit na rumani ki Jehova dai nauuyam sa saiyang mga kahagadan. Huling namumutan ta an satong Diyos asin an gabos na manungod sa saiya, gusto tang mamuhay sa paagi na nakakapaugma sa saiya. (1 Juan 5:3) Girumduma na si Jehova “namumuot . . . sa mga matanos na gibo.” (Salmo 11:7) Kun talagang gusto niyatong arugon an hustisya, o katanusan, nin Diyos, dapat na mamutan ta an namumutan ni Jehova asin ikaungis an ikinakaungis niya.—Salmo 97:10.

⁶ Bakong pasil para sa bakong perpektong mga tawo na ipahiling an katanusan. Dapat na hubaon niyato an lumang personalidad kaiba na an mga gibo kaiyan asin isulot an bagong personalidad. Sinasabi kan Bibliya na an bagong personalidad “ginigibong bago” paagi sa tamang kaaraman. (Colosas 3:9, 10) An mga tataramon na “ginigibong bago” nagpaparisa na an pagsulot kan bagong personalidad sarong nagpapadagos na proseso, saro na nangangaipo nin maigot na paghihinguwa. Gurano man an satong pagmamaigot na gibuhon an tama, may mga pagkakataon na huli sa satong pagigin makasalan nakakapag-isip kita, nakakataram, o nakakagibo pa man giraray nin sala.—Roma 7:14-20; Santiago 3:2.

7. Ano an dapat na magin pagmansay ta sa mga ulang sa satong mga paghihinguwa na ipahiling an katanusan?

⁷ Paano ta dapat mansayon an mga ulang sa satong mga paghihinguwa na ipahiling an katanusan? Siyempre, habo niyatong pagianon an gabat nin kasalan. Kasabay kaiyan, dapat na nungka kitang sumuko, na iniisip na huli sa satong mga pagkukulang bako na kitang maninigo sa paglilingkod ki Jehova. An satong Diyos na may marahay na buot guminibo nin probisyon tanganing kamtan giraray kan mga sinserong nagsusulsol an saiyang pag-uyon. Isip-isipa an nakakapakusog na mga tataramon ni apostol Juan: “Sinusuratan ko kamo kan mga bagay na ini tanganing dai kamo makagibo nin kasalan.” Pero idinagdag niya an nakakarangang mga tataramon na ini: “Alagad ta kun makagibo man nin kasalan an siisay man [huli sa minanang pagkabakong perpekto], igwa kita nin paratabang na kaibanan kan Ama, si Jesu-Cristo.” (1 Juan 2:1) Iyo, itinao ni Jehova an atang na pantubos ni Jesus tangani na makapaglingkod kita sa Saiya sa inuuyunan na paagi sa ibong kan satong pagigin makasalan. Dai daw kita napapahiro kaiyan na mawuton na gibuhon an pinakamakakaya niyato tanganing mapaugma si Jehova?

An Maugmang Bareta Asin an Hustisya nin Diyos

8, 9. Paano ipinapahiling kan pagbalangibog kan maugmang bareta an hustisya ni Jehova?

⁸ An sarong paagi na maisasagibo niyato an hustisya asin maaarog an Diyos iyo an lubos na pakikikabtang sa paghuhulit kan maugmang bareta kan Kahadian nin Diyos sa iba. Ano an koneksiyon kan hustisya ni Jehova asin kan maugmang bareta?

⁹ Dai tatapuson ni Jehova an maraot na sistemang ini na dai nguna naipapaabot an patanid. Sa hula niya manungod sa mangyayari sa panahon kan katapusan, sinabi ni Jesus: “Sa gabos na nasyon, an maugmang bareta kaipuhan na ihulit nguna.” (Marcos 13:10; Mateo 24:3) An paggamit kan tataramon na “nguna” nagpaparisa na may ibang mga mangyayari kasunod kan pambilog na kinaban na paghuhulit. Kaiba sa mga mangyayaring iyan an ihinulang dakulang kasakitan, na mangangahulugan nin kalaglagan para sa mga maraot, asin maandam iyan kan dalan para sa pag-abot kan matanos na bagong kinaban. (Mateo 24:14, 21, 22) Siyerto nanggad, mayo nin puwedeng magsahot ki Jehova na bako siyang makatanusan sa mga maraot. Paagi sa pagpaabot kan patanid, tinatawan niya an siring na mga tawo nin igong oportunidad na magbago asin sa siring dai malaglag.—Jonas 3:1-10.

10, 11. Paano an satong pakikikabtang sa paghuhulit kan maugmang bareta nagpapabanaag kan hustisya nin Diyos?

¹⁰ Paano ipinapabanaag kan satong paghuhulit kan maugmang bareta an hustisya nin Diyos? Inot sa gabos, tama sana na gibuhon niyato an satong makakaya na tabangan an iba na magkamit nin kaligtasan. Pag-isipan giraray an ilustrasyon manungod sa pagkasalbar hali sa sarong barkong papalubog na. Mantang ligtas ka na asin nasa lifeboat, siguradong gusto mong tabangan an iba na yaon pa sa tubig. Kaagid kaiyan, may obligasyon kitang tabangan an mga nasa peligro an buhay na nasa “katubigan” pa kan maraot na kinaban na ini. Totoo, dakul an habo sa mensahe niyato. Pero sagkod na nagpapadagos na mapasensiya si Jehova, may paninimbagan kita na tawan sinda kan oportunidad na “makapagsulsol” asin sa siring magkaigwa nin paglaom na magkamit nin kaligtasan.—2 Pedro 3:9.

¹¹ Paagi sa paghuhulit kan maugmang bareta sa gabos niyatong nanunumpungan, ipinapahiling ta an hustisya sa saro pang importanteng paagi: Dai kita nagpapalain-lain. Girumduma na “an Diyos mayong pinapalain, kundi sa lambang nasyon, inaako niya an tawong may pagkatakot sa saiya asin naggigibo nin matanos.” (Gibo 10:34, 35) Tangani na maarog niyato an Saiyang hustisya, dapat na dai ta tulos husgaran an mga tawo. Imbes, dapat na ipaabot niyato an maugmang bareta sa iba ano man an saindang rasa, kamugtakan sa sosyedad, o mayaman man sinda o pobre. Sa siring, tinatawan ta an gabos na mahinanyog nin oportunidad na madangog an maugmang bareta asin maghimati diyan.—Roma 10:11-13.

Kun Paano Niyato Tinatratar an Iba

12, 13. (a) Taano ta dai niyato dapat husgaran tulos an iba? (b) Ano an buot sabihon kan sadol ni Jesus na “magpundo na kamo sa paghusgar” asin “magpundo na kamo sa pagkondenar”? (Hilingon man an nota sa ibaba.)

¹² Maisasagibo man niyato an hustisya paagi sa pagtratar sa iba arog kan pagtratar ni Jehova sa sato. Madalion na maghusgar sa iba, na tinatatsaran an mga sala ninda asin kinukuwestiyon an mga motibo ninda. Pero siisay sa sato an gustong siyasaton na marhay ni Jehova an satong mga motibo asin pagkukulang sa daing hirak na paagi? Bakong arog kaiyan an pagtratar sa sato ni Jehova. Naghapot an salmista: “Kun an mga sala an saimong binabantayan, O Jah, siisay, O Jehova, an makakatindog?” (Salmo 130:3) Dai daw kita nagpapasalamat na an satong makatanusan asin mahihirakon na Diyos dai nagpopokus sa satong mga pagkukulang? (Salmo 103:8-10) Kun siring, paano ta dapat trataron an iba?

¹³ Kun nasasabutan niyato an pagigin mahihirakon kan hustisya nin Diyos, dai ta huhusgaran tulos an iba pag-abot sa mga bagay na bako man talaga kitang kalabot o daing gayo mahalaga. Sa saiyang Sermon sa Bukid, nagpatanid si Jesus: “Magpundo na kamo sa paghusgar tanganing dai kamo paghusgaran.” (Mateo 7:1) Sigun sa pagkasaysay ni Lucas, idinagdag ni Jesus: “Magpundo na kamo sa pagkondenar, asin dai nanggad kamo kokondenaron.”a (Lucas 6:37) Ipinahiling ni Jesus na aram niya na an mga tawong bakong perpekto may tendensiya na magin mapaghusgar. An siisay man sa mga nagdadangog sa saiya na may ugaling husgaran nin daing hirak an iba dapat na ipundo iyan.

14. Sa anong mga dahilan dapat na “magpundo na [kita] sa paghusgar” sa iba?

¹⁴ Taano ta dapat na “magpundo na [kita] sa paghusgar” sa iba? An sarong dahilan iyo na limitado an satong awtoridad. Ipinapagirumdom sa sato kan disipulong si Santiago: “Saro sana an Paratao nin Katugunan asin Hukom”—si Jehova. Kaya diretso sa punto na ihinapot ni Santiago: “Siisay ka man para manghusgar sa saimong kapwa?” (Santiago 4:12; Roma 14:1-4) Dugang pa, huli sa satong pagigin makasalan madalion na magin bakong makatanusan an satong mga paghusgar. Dakul na ugali asin motibo—kaiba an pagpalain-lain, nakulgan na pride, pagkauri, asin pagpapakangmatanos—an puwedeng makaraot sa satong pagmansay sa kapwa. May iba pa kitang mga limitasyon, asin an paghurop-hurop sa mga ini dapat na makapugol sa sato sa paghanap tulos nin sala sa iba. Dai kita nakakabasa nin puso; dai ta man kayang aramon an gabos na personal na kamugtakan nin iba. Kun siring, siisay man kita para pag-isipan nin salang mga motibo an satong mga kapagtubod o tatsaran an mga paghihinguwa ninda sa paglilingkod sa Diyos? Marahayon nanggad na arugon si Jehova sa paagi nin paghanap kan marahay sa satong mga tugang imbes na magpokus sa saindang mga pagkukulang!

15. Anong mga tataramon asin pagtratar an mayo nin lugar sa tahaw kan mga nagsasamba sa Diyos, asin taano?

¹⁵ Paano ta man dapat trataron an satong mga kapamilya? Makamumundo, sa kinaban ngunyan an nagkapira sa pinakadaing hirak na mga paghusgar nangyayari sa laog kan pamilya, an lugar na dapat kutana igwa nin katiwasayan. Ordinaryo na sanang mabaretaan an manungod sa nangmamaltrato na agom na lalaki, agom na babayi, o magurang na garo daing hirak na hukom kun trataron an saindang mga kapamilya sa pisikal man o berbal na paagi. Pero an maraot na mga tataramon, sarkastikong pananaram, asin mapang-abusong pagtratar mayo nin lugar sa tahaw kan mga nagsasamba sa Diyos. (Efeso 4:29, 31; 5:33; 6:4) An konseho ni Jesus na “magpundo na kamo sa paghusgar” asin “magpundo na kamo sa pagkondenar” aplikado man sa laog nin harong. Girumduma na kalabot sa pagsagibo nin hustisya an pagtratar niyato sa iba nin arog kan pagtratar sa sato ni Jehova. Asin an satong Diyos nungkang nagin daing hirak o maringis sa pagtratar sa sato. Imbes, siya “mamumuton na marhay” sa mga namumuot sa saiya. (Santiago 5:11) Marahayon nanggad na halimbawa na dapat arugon ta!

Mga Elder na Naglilingkod “Para sa Hustisya”

16, 17. (a) Ano an inaasahan ni Jehova sa mga elder? (b) Ano an dapat na gibuhon kun an sarong parakasala dai makapahiling nin tunay na pagsulsol, asin taano?

¹⁶ Kita gabos may paninimbagan na magsagibo nin hustisya, pero an kamagurangan sa Kristiyanong kongregasyon nangurugnang may paninimbagan sa bagay na ini. Mangnuha an propetikong paglaladawan na isinurat ni Isaias manungod sa “mga pamayo,” o mga elder: “Uya! Sarong hadi an maghahadi para sa katanusan, asin may mga pamayo na mamamahala para sa hustisya.” (Isaias 32:1) Iyo, inaasahan ni Jehova an mga elder na maglingkod nin uyon sa saiyang hustisya. Paano ninda magigibo ini?

¹⁷ Aram na marhay kan mga lalaking ini na may espirituwal na kuwalipikasyon na kaipuhan an hustisya, o katanusan, para mapagdanay na malinig an kongregasyon. May mga pagkakataon na kaipuhan kan mga elder na maghusgar may koneksiyon sa magabat na mga pagkakasala. Pag ginigibo iyan, ginigirumdom ninda na gusto nin Diyos na magpahiling sinda nin pagkahirak sagkod na posible. Sa siring, hinihinguwa nindang matabangan an nagkasala na magsulsol. Pero, paano kun an nagkasala dai makapahiling nin tunay na pagsulsol sa ibong nin siring na mga paghihinguwa na tabangan siya? Marigon na susunudon kan mga elder an perpektong hustisya na ipinagbubuot kan Tataramon ni Jehova: “Halion nindo an maraot na tawo diyan sa saindo.” Nangangahulugan iyan na ititiwalag siya sa kongregasyon. (1 Corinto 5:11-13; 2 Juan 9-11) Ikinakamundo kan mga elder na gibuhon an siring na aksiyon, alagad aram ninda na kaipuhan iyan para maprotektaran an kalinigan sa moral asin espirituwal kan kongregasyon. Dawa pa siring, naglalaom sinda na pag-abot nin panahon makakapag-isip-isip an nagkasala asin mabalik sa kongregasyon.—Lucas 15:17, 18.

18. Ano an isinasaisip nin mga elder pag nagtatao sa iba nin sadol na basado sa Bibliya?

¹⁸ Kalabot man sa paglilingkod nin uyon sa hustisya nin Diyos an pagtao nin sadol na basado sa Bibliya pag kaipuhan. Siyempre, an mga elder dai naghahanap nin mga depekto sa iba. Ni tulos-tulos na itinatanos ninda an mga tugang sa lambang pagkakataon. Alagad an sarong kapagtubod tibaad “mapasala nin lakad bago niya iyan marealisar.” An paggirumdom na an hustisya nin Diyos bakong maringis kundi mahihirakon mapahiro sa mga elder na “maghinguwa na itanos an siring na tawo sa espiritu nin kahuyuan.” (Galacia 6:1) Huli kaiyan, dai aanggutan kan mga elder an napasala nin lakad o tataraman nin nakakakulog na mga tataramon. Imbes, an sadol na itinatao sa mamumuton na paagi nakakaparigon sa buot sa nag-aako kaiyan. Dawa pag nagtatao nin diretso sa puntong pagsagwi—na prangkang sinasabi an magigin mga resulta nin salang paggawi—isinasaisip nin mga elder na an kapagtubod na napasala nin lakad sarong karnero sa aripumpon ni Jehova.b (Lucas 15:7) Pag an mga elder nagtatao nin sadol o pagsagwi na motibado nin pagkamuot asin itinatao sa mamumuton na paagi, posibleng marhay na mapakarhay giraray an napasala nin lakad.

19. Anong mga desisyon an kaipuhan na gibuhon nin mga elder, asin sain ninda dapat ibasar an siring na mga desisyon?

¹⁹ An mga elder sa parati kaipuhan na gumibo nin mga desisyon na may epekto sa saindang mga kapagtubod. Halimbawa, sa pana-panahon nagmimiting an kamagurangan tanganing pag-ulayan kun baga an ibang tugang na lalaki sa kongregasyon kuwalipikado nang irekomendar bilang mga elder o ministeryal na lingkod. Aram kan mga elder an halaga nin pagigin mayong pinapalain. Tinutugutan ninda na an mga kahagadan nin Diyos sa siring na mga pagnombra an maggiya sa sainda sa pagdedesisyon, na dai nagsasarig sa personal sanang mga sabuot. Sa siring, minahiro sinda na “mayo nin pinapalain o pinapaburan.”—1 Timoteo 5:21.

20, 21. (a) Ano an pinagmamaigutan na gibuhon nin mga elder, asin taano? (b) Ano an magigibo nin mga elder tanganing matabangan an “mga nagmumundo nin grabe”?

²⁰ Isinasagibo nin mga elder an hustisya nin Diyos sa iba pang mga paagi. Pagkatapos na ihula ni Isaias na an mga elder maglilingkod “para sa hustisya,” sinabi niya: “An lambang saro magigin siring sa sarong lugar na pahiplian sa duros, sarong lugar na taguan sa makusugon na uran, siring sa mga sapa nin tubig sa dagang mayong tubig, siring sa lindong nin dakulaon na gapo sa alang na daga.” (Isaias 32:1, 2) Kun siring, an mga elder nagmamaigot na magin gikanan nin karangahan asin kaginhawahan para sa mga kapwa ninda parasamba.

²¹ Ngunyan, huli sa gabos na problema na nakakapaluya sa buot, dakul an nagkakaipo nin pagparigon sa buot. Mga elder, ano an magigibo nindo tanganing matabangan an “mga nagmumundo nin grabe”? (1 Tesalonica 5:14) Magdangog sa sainda nin may empatiya. (Santiago 1:19) Tibaad kaipuhan na sabihon ninda an kahaditan sa saindang puso sa saro na pinagtitiwalaan ninda. (Talinhaga 12:25) Asiguraron sinda na kaipuhan sinda, pinapahalagahan, asin namumutan—iyo, ni Jehova saka kan saindang mga tugang na lalaki asin babayi. (1 Pedro 1:22; 5:6, 7) Apuwera pa diyan, puwede kamong mamibi kaiba ninda asin ipamibi nindo sinda. Pag nadadangog ninda an sarong elder na ipinapamibi sinda nin udok sa puso, makakarangang marhay iyan sa sainda. (Santiago 5:14, 15) An mamumuton na mga paghihinguwa nindo na tabangan an mga nagmumundo nin grabe siguradong maririsa kan Diyos nin hustisya.

22. Sa anong mga paagi niyato maaarog an hustisya ni Jehova, asin may anong resulta?

²² Tunay nanggad, urog kitang napaparani ki Jehova paagi sa pag-arog kan saiyang hustisya! Pag sinusuportaran ta an saiyang matanos na mga pamantayan, pag ipinapaabot ta sa iba an nagliligtas-buhay na maugmang bareta, asin pag pinipili ta na magpokus sa kun ano an marahay sa iba imbes na hanapon an mga sala ninda, ipinapahiling ta an hustisya nin Diyos. Mga elder, pag pinoprotektaran nindo an kalinigan kan kongregasyon, pag nagtatao kamo nin nakakapakusog na sadol suno sa Kasuratan, pag naggigibo kamo nin mga desisyon na mayo nin pinapalain, asin pag pinaparigon nindo an buot kan mga pinangluluyahan nin buot, ipinapabanaag nindo an hustisya nin Diyos. Siguradong ikakaugmang marhay kan puso ni Jehova na magdungaw hali sa langit asin mahiling an saiyang banwaan na ginigibo an pinakamakakaya ninda na “magsagibo . . . nin hustisya” sa paglakaw sa kaibanan kan saindang Diyos!