Si Daniel sa Lungib nin mga Leon

An saro pang hadi kan Babilonya iyo si Dario na Medo. Nahiling ni Dario na mahusayon si Daniel kaya ginibo niya siyang tagapamahala kan mga halangkaw na opisyal kan Babilonya. Nauri an mga lalaking ini ki Daniel kaya gusto nindang ipagadan siya. Aram nindang namimibi si Daniel ki Jehova tulong beses kada aldaw, kaya sinabi ninda ki Dario: ‘O hadi, dapat magkaigwa nin pagbuot na saimo lang dapat mamibi an gabos. An magsuway ihuhulog sa lungib nin mga leon.’ Nagustuhan iyan ni Dario kaya pinirmahan niya an pagbuot.

Kan maaraman ni Daniel an manungod sa bagong pagbuot, nag-uli siya tulos sa harong niya. Nagluhod siya sa atubangan nin nakabukas na bintana, asin namibi ki Jehova. Dali-daling naglaog sa harong niya an nauuring mga lalaki asin nadakop siyang namimibi. Nagduman tulos sinda ki Dario tapos nagsabi: ‘Sinuway ka ni Daniel. Namimibi siya sa Diyos niya nin tulong beses kada aldaw.’ Importante ki Dario si Daniel kaya habo niya ining magadan. Maghapon siyang nag-isip nin paagi para iligtas si Daniel. Pero pag pirmado na kan hadi an pagbuot, dai na niya iyan puwedeng baguhon. Kaipuhan niyang ipahulog si Daniel sa lungib nin maiisog na mga leon.

Kan bangging idto, haditon si Dario ki Daniel kaya dai siya nakaturog. Kinaagahan, nagdalagan siya paduman sa lungib dangan nag-apod siya ki Daniel: ‘Ilinigtas ka kan saimong Diyos?’

May nadangog na boses si Dario. Si Daniel idto! Sinabi niya ki Dario: ‘Tinikom kan anghel ni Jehova an nguso kan mga leon. Dai lamang ninda ako inano.’ Ugmahon si Dario! Ipinaluwas niya si Daniel sa lungib. Wara lamang ni sarong kinamrutan si Daniel. Dangan ipinagbuot kan hadi: ‘Ihulog sa lungib an mga lalaking nagsahot ki Daniel.’ Kan ihulog sinda sa lungib, siniriba sinda kan mga leon.

Ipinagbuot ni Dario sa saiyang mga sakop: ‘Dapat na matakot an gabos sa Diyos ni Daniel. Ilinigtas niya si Daniel sa mga leon.’

Aroaldaw ka man daw na namimibi ki Jehova arog ni Daniel?