Ginibo Ninda an Kabotan ni Jehova

Si Daniel Naglingkod nin Danay sa Dios

PAMBIHIRA na an dalagan nin kasaysayan magliwat nin bigla. Pero, nangyari iyan kan 539 B.C.E., kan an Imperyo nin Babilonya ibagsak kan mga Medo asin Persiano sa laog sana nin pirang oras. Kan taon na idto, an propeta ni Jehova na si Daniel haros 80 taon nang nag-eerok bilang disterradong Judio sa Babilonya. Posible na sa saiyang edad na labi nang 90 anyos, aatubangon ni Daniel an saro sa pinakadakulang mga pagbalo sa saiyang integridad sa Dios.

Pagkabagsak kan Babilonya, sa primero garo marahay an kamugtakan para ki Daniel. An bagong hade iyo si Dario na Medo, sarong 62 anyos na lalaki na nagpapaheling nin pabor ki Daniel. An saro sa enot na mga ginibo ni Dario bilang hade iyo an pagnombrar sa 120 satrapa asin ilangkaw an tolong lalaki sa ranggo nin pagigin halangkaw na opisyal.a Si Daniel saro sa tolong lalaking idto na pinahelingan nin pabor. Minimidbid an pambihirang potensial ni Daniel, desidido pa ngani si Dario na itao sa saiya an posisyon nin pagigin primer ministro! Minsan siring, sa panahon man sanang idto may nangyari na biglang nakaliwat sa mga plano kan hade.

Sarong Tusong Plano

An mga kapwa halangkaw na opisyal ni Daniel, na kairiba an sarong dakulang grupo nin mga satrapa, nagdolok sa hade na may ideyang nakapupukaw sa interes. Nakimaherak sinda ki Dario na establisaron an sarong ley na nagsasabi: “An siisay man na gumibo nin kahagadan sa siisay man na dios o tawo sa laog nin tolong polong aldaw apuera sa saindo, O hade, maninigong iapon sa bobon kan mga leon.” (Daniel 6:7) Tibaad garo hinona ni Dario na an mga lalaking ini nagpapahayag kan saindang kaimbodan sa saiya. Tibaad nangatanosan man sia na an ley na ini makatatabang sa saiya, na sarong dayo, na dugangan an puersa kan saiyang posisyon bilang namamayo sa rona.

Minsan siring, an haralangkaw na opisyal asin mga satrapa dai nagmukna kan ediktong ini para sa kapakanan kan hade. Sinda “naghihingoang makakua nin sarahotan tumang ki Daniel manongod sa kahadean; alagad mayo sindang nakua na sarahotan o maraot na bagay, mantang sia mapagtitiwalaan asin mayong nakua saiyang kapabayaan o maraot na bagay.” Kaya an tusong mga lalaking ini nangatanosan: “Dai kita makakakua sa Daniel na ini nin ano man na sarahotan, kundi kaipuhan na hanapon niato iyan tumang sa saiya sa ley kan saiyang Dios.” (Daniel 6:​4, 5) Nakaaaram na si Daniel namimibi ki Jehova aroaldaw, naghingoa sinda na gibohon ini na sarong krimen na an padusa kagadanan.

Posible na an haralangkaw na opisyal asin mga satrapa nagtanom nin kaanggotan ki Daniel huli ta saiyang “padagos na ipinamimidbid an saiyang sadiri na nakalalabi [sa sainda], mantang may pambihirang espiritu na nasa saiya; asin intension kan hade na ilangkaw sia na mamahala sa bilog na kahadean.” (Daniel 6:3) An pagkasadiosan ni Daniel tibaad pinaggikanan nin dai nagustohan na pan-olang tumang sa karatan asin pandadaya. Ano man an situwasyon, nakombensir kan mga lalaking ini an hade na pirmahan an edikto, na ginigibo iyan na kabtang kan “ley kan mga Medo asin kan mga Persiano, na dai rinerebokar.”​—Daniel 6:​8, 9.

Si Daniel Nagdanay na Marigon

Pakatapos na mabaretaan an bagong reglamento, uminontok daw si Daniel sa pamimibi ki Jehova? Dai nanggad! Nagluluhod sa kuarto sa atop kan saiyang harong, namimibi sia sa Dios nin tolong beses kada aldaw, “arog kan dayaday niang ginibo bago kaini.” (Daniel 6:10) Mantang sia namimibi, an saiyang mga kaiwal “nagsurusuan asin nanompongan si Daniel na naghahagad asin nakikimaherak nin pabor sa atubangan kan saiyang Dios.” (Daniel 6:11) Kan darahon ninda an bagay sa atension kan hade, namondong marhay si Dario na mapapalabot si Daniel sa ley na pinirmahan nia. “Sagkod na sumolnop an aldaw sia nagpadagos sa paghihingoa na iligtas sia,” an sabi sa sato kan tala. Alagad minsan an hade dai kayang kanselaron an ley na ginibo nia. Si Daniel kun siring dinara sa bobon kan mga leon, na minalataw na sarong lugar na lukab o nasa irarom nin daga. “An saimong Dios na pinaglilingkodan mo nin danay, sia mismo an masukoro sa saimo,” an pag-asegurar kan hade ki Daniel.​—Daniel 6:​12-16.

Pakatapos na dai makatorog asin mag-ayuno, si Dario naghumari pasiring sa bobon. Si Daniel buhay asin dai naano! Tolos-tolos na huminiro an hade. Ipinaapon nia sa bobon kan mga leon an mga kaiwal ni Daniel asin an saindang mga pamilya bilang padusa. Ipinaaram man ni Dario sa bilog na rona na “sa lambang nasasakopan kan sakuyang kahadean, an mga tawo dapat na magtakig asin matakot sa atubangan kan Dios ni Daniel.”​—Daniel 6:​17-27.

Leksion Para sa Sato

Si Daniel sarong marahay na halimbawa nin pagigin fiel. Maski an hade, na dai nagsasamba ki Jehova, nakarisa na si Daniel naglilingkod sa Saiya “nin danay.” (Daniel 6:​16, 20) An pinakagamot na termino sa Aramaico na trinadusir na “danay” sa pundamental nangangahulogan “humiro nin pabilog.” Iyan nagsusuherir nin pagigin nagpapadagos. Ilinaladawan nanggad kaini an dai nababaring integridad ni Daniel ki Jehova!

Napatalubo ni Daniel an ugale nin pagigin nagdadanay haloy nang panahon bago sia iinapon sa bobon kan mga leon. Bilang hoben na bihag sa Babilonya, sinayumahan nia an pagkakan o inomon na ipinangangalad kan Ley Mosaiko o nadigtaan nin paganong rituwal. (Daniel 1:8) Kan huri, may kapusoan na ipinahayag nia an mensahe nin Dios sa hade nin Babilonya na si Nabucodonosor. (Daniel 4:​19-25) Pirang oras sana bago bumagsak an Babilonya, daing takot na ipinahayag ni Daniel ki Hadeng Belsasar an paghokom ni Jehova. (Daniel 5:​22-​28) Kaya kan atubangon ni Daniel an bobon kan mga leon, nagpadagos sia sa fiel na dalan na saiya nang naestablisar.

Kamo makapaglilingkod man ki Jehova nin danay. Kamo daw sarong hoben? Kun siring humiro na ngonyan na pataluboon an ugale nin pagigin nagdadanay paagi sa pagsikwal sa maraot na pag-iriba asin nakararaot na paggawe kan kinaban na ini. Kun haloy-haloy na kamong naglilingkod sa Dios, papagdanayon an ugale nin fiel na pagtagal. Dai kamo sumuko, huli ta an kada pagbalo na inaatubang niato nagtatao sa sato nin oportunidad na ipaheling ki Jehova na kita determinado na maglingkod sa saiya nin danay.​—Filipos 4:​11-​13.

[Nota sa Ibaba]