PAGDALAW LIWAT
LEKSIYON 7
Pagigin Matiyaga
Prinsipyo: “Nagpadagos sindang daing pundo sa pagtutukdo asin pagpahayag kan maugmang bareta.”—Gibo 5:42.
Kun Ano an Ginibo ni Pablo
1. Hilingon an VIDEO, o basahon an Gibo 19:8-10. Dangan pag-isipan an minasunod na mga hapot:
Imbes na magpundo kan may magkontra sa saiya, paano nagin matiyaga si Pablo sa pagtabang sa mga nagpahiling nin interes?
Gurano kaparating binalikan ni Pablo an mga interesadong ini, asin gurano kahaloy niya iyan na ginibo?
Ano an Manunudan Ta ki Pablo?
2. Kaipuhan tang maghinguwa asin magtao nin panahon para magin epektibo an satong mga pagdalaw liwat asin makapuon nin mga pag-adal sa Bibliya.
Arugon si Pablo
3. I-adjust an saimong iskedyul. Haputon an sadiri: ‘Nuarin ko daw siya posibleng marhay na makaulay? Nuarin asin sain daw siya posibleng marhay na makipag-ulay sa sako?’ Magin andam na magdalaw liwat, dawa sa oras na bakong kumbenyente sa saimo.
4. Haputon kun nuarin mo siya puwedeng makaulay giraray. Sa katapusan kan kada pag-uulay, siguraduhon kun anong espesipikong oras mo siya puwedeng makaulay giraray. Siguraduhon na makabalik ka sa napag-ulayan nindong oras.
5. Dai mawaran nin paglaom. Dai tulos pag-isipon na bako nang interesado an sarong tawo na bihira mong maabutan sa harong o na parating sibot. (1 Cor. 13:4, 7) Matiyagang balikan siya, pero siguraduhon man na madunong mong nagagamit an saimong panahon.—1 Cor. 9:26.