PAGGIBO NIN MGA DISIPULO
LEKSIYON 12
Pagigin Prangka
Prinsipyo: “An lana asin insenso nagpapaugma sa puso; siring man an hamis kan pakikiamigo na bunga nin sinserong konseho.”—Tal. 27:9.
Kun Ano an Ginibo ni Jesus
1. Hilingon an VIDEO, o basahon an Marcos 10:17-22. Dangan pag-isipan an minasunod na mga hapot:
Anong marahay na mga kuwalidad an posibleng nahiling ni Jesus sa hoben na tagapamahala?
Taano ta kaipuhan ni Jesus na magin mamumuton saka magin prangka sa pagsadol sa lalaki?
Ano an Manunudan Ta ki Jesus?
2. Kaipuhan tang magin mamumuton alagad prangka sa satong mga tinutukduan para tabangan sindang umuswag sa espirituwal.
Arugon si Jesus
3. Tabangan an tinutukduan mo na magkaigwa asin mag-abot nin mga pasuhan.
Gamiton an feature na “Gibuhon Ini” sa kada leksiyon kan Mabuhay nin Maugma Sagkod Pa Man!
Tabangan an tinutukduan mo na maaraman an espesipikong mga lakdang para maabot an simple saka panghaluyan na mga pasuhan.
Pirming komendaran an tinutukduan mo sa pag-uswag niya.
4. Aramon an mga ulang sa pag-uswag, asin tabangan an tinutukduan mo na mapangganahan an mga iyan.
Haputon an sadiri:
‘Kun an tinutukduan ko dai nag-uuswag pasiring sa bawtismo, ano an nakakaulang sa saiya?’
‘Anong praktikal na tabang an puwede kong itao?’
Mamibi na magkaigwa ka nin kusog nin buot para maipakipag-ulay mo sa tinutukduan mo sa prangka asin mamumuton na paagi kun ano an kaipuhan niyang gibuhon.
5. Ipundo an dai nag-uuswag na mga pag-adal.
Determinaran kun baga nag-uuswag an tinutukduan mo sa Bibliya paagi sa paghapot sa saimong sadiri:
‘Isinasabuhay daw kan tinutukduan ko an mga nanunudan niya?’
‘Nag-aatender daw siya sa mga pagtiripon kan kongregasyon asin ihinihiras an katotoohan sa iba?’
‘Kun haloy na siyang nag-aadal, gusto daw niyang magin sarong Saksi ni Jehova?’
Kun an sarong tinutukduan sa Bibliya dai nag-uuswag:
Haputon siya para pag-isipan kun ano an posibleng nakakaulang saiya.
Mabuot na ipaliwanag kun taano ta ipupundo mo na an pag-adal.
Sabihon saiya kun anong pag-uswag an dapat niyang gibuhon bago mo ipadagos giraray an pag-adal nindo.