Kun Taano ta Maninigo Kamong Mag-atender sa “Banal na Katoninongan” na Kombension
Ngonyan na an terorismo, rebolusyon, asin guerra iyo an nangyayari permi, marahayon nanggad na poon sa bulan na ini makakaatender kamo sa “Banal na Katoninongan” na Kombension nin mga Saksi ni Jehova! Dian kamo bako sanang mag-aako nin praktikal na Kristianong pagtotokdo sa pagpapadanay sa katoninongan kundi aktuwal na makakaheling nin rinibo na nag-aaplikar kan katokdoan na iyan.
Magin presente poon sa enot na sesyon na mapoon sa ala 1:30 nin hapon nin Huwebes. Madadangog nindo an haloy nang mga parabalangibog nin katoninongan. Siring man, maaaraman nindo an mga siod sa sosyal na pag-aling-aling asin kun paano iyan malilikayan. Asin sa katapusan kan sesyon, may mareresibi kamong bako sanang magayon kundi kapakipakinabang man para sa paglilingkod sa iba.
An programa sa aga nin Biyernes igwa kan pangenot na pahayag na, “Banal na Katoninongan Para sa mga Tinokdoan ni Jehova.” Mapapahiro nanggad an boot nindo kan dramang “Pagpreserbar sa Buhay sa Panahon nin Gutom.” Dai iyan pagpalihison!
Sa Sabado, an mga demonstrasyon, interbio, asin nakapagtotokdong mga pahayag magtatao nin praktikal na giya sa pagpapadanay nin katoninongan sa laog kan pamilya. An programa matatapos sa mahalagang pahayag na “Lakop sa Kinaban na Katiwasayan Sakop kan ‘Prinsipe nin Katoninongan’.”
Sa Domingong aga iaatubang an prangka, mapuwersang drama sa modernong aldaw na nagdodoon kan pangangaipo na hanapon an katanosan nin Dios para sa kaligtasan. Sa hapon, an mapuwersang pahayag-publiko, “Sa Katapustapusi Katoninongan!—Kun an Dios Magtaram,” magigin saro na naman na tampok na kabtang kan kombension.
Mantang 27 kombension an nakaiskedyul sa Pilipinas, magkakaigwa nin kombension na harani sa saindong harong. Ihapot sa lokal na mga Saksi ni Jehova an oras asin lugar kan pinakaharani sa saindo.