Mga Hapot Hale sa mga Parabasa

◼ Maninigo daw niatong isipon basado sa Mateo 7:13, 14 asin Lucas 13:24 na minsan sa pagbuhay liwat, an kadaklan na tawo mahabo sa tunay na pagsamba?

Dai, an mga bersikulong ini dai nagsusuportar sa konklusyon na iyan. Imbes, an mga iyan partikularmenteng may koneksion sa pagkakamit nin buhay sa langitnon na Kahadean.

An mga tataramon ni Jesus sa Mateo 7:13, 14 kabtang kan Sermon sa Bukid. Sia nagsabi: “Maglaog kamo sa tatang hayakpit, huli ta halakbang asin mahiwas an dalan na pasiring sa kalaglagan, asin dakol an mga nagraralaog dian; sa ibong na kampi piot an tata asin hayakpit an dalan pasiring sa buhay, asin diit an mga nakakakua kaiyan.”

An kadaklan sa isinabi ni Jesus sa okasyon na ini espesyalmenteng may koneksion sa langitnon na Kahadean. Halimbawa, nagpoon sia paagi sa mga tataramon na: “Maogma idtong mga nakamamate kan saindang espirituwal na pangangaipo, huli ta an kahadean kan kalangitan sadiri ninda.” Sia nagsabi na an malinig sa puso “makakaheling sa Dios” asin na “an kahadean kan kalangitan” sadiri kan mga “pinaglamag huli sa katanosan.” (Mateo 5:3, 8, 10) Sa iyo man sanang diskursong iyan, si Jesus nagtaram manongod sa mahiwas na dalan na pasiring sa kalaglagan asin sa hayakpit na dalan na pasiring sa buhay. Idinugang nia: “Bakong an gabos na nagsasabi sako, ‘Kagurangnan, Kagurangnan,’ makalalaog sa kahadean nin kalangitan, kundi idtong naggigibo kan kabotan kan sakong Ama na nasa langit.”—Mateo 7:13, 14, 21.

Nakaaagid man an kahulogan kan Lucas 13:24, siring sa ipinaheheling kan konteksto. Si Jesus nagtao nin duwang ilustrasyon manongod sa “kahadean nin Dios.” Dangan, sia hinapot: “Kagurangnan, an mga maliligtas daw pipira sana?” Si Jesus nagsimbag: “Maghingoa kamo nin maigot na makalaog sa piot na tata, huli ta, sinasabi ko sa saindo, dakol an magmamawot na makalaog alagad dai makakahimo.” An “dakol” iyo an mga tawo na nakimaherak na palaogon pakapintoi asin pakasirrahi kan tata. An mga ini “mga paragibo nin karatan” na dai kuwalipikadong makaibanan “ni Abraham asin Isaac asin Jacob patin kan gabos na propeta sa kahadean nin Dios.” An “dakol” naghona na sinda an maeenot “sa kahadean nin Dios,” alagad ta sinda an mahuhuri, na malinaw na nangangahulogan na dai nanggad sinda makalalaog.—Lucas 13:18-30.

Ipinaheheling kan konteksto na an ipinaliliwanag ni Jesus paglaog sa langitnon na Kahadean nin Dios. An mga namomoon na Judio kaidto haloy nang nasa mapalad na posisyon, na nakababasa kan Tataramon nin Dios. Sinda naghona na sinda mayaman sa espirituwal asin matanos sa pagheling nin Dios, bakong arog kan ordinaryong mga tawo, na sa pagheling ninda hababa. (Juan 9:24-34) Pero, sinabi ni Jesus na an mga parasingil nin buhis asin patotot na nag-ako kan saiyang mensahe asin nagsolsol puwedeng magkamit kan pag-oyon nin Dios.—Ikomparar an Mateo 21:23-32; Lucas 16:14-31.

An ordinaryong mga tawo na nagin mga disipulo ni Jesus nakalinyang akoon bilang espirituwal na mga aki kan buksan an langitnon na pag-apod kan Pentecostes 33 C.E. (Hebreo 10:19, 20) Minsan ngani kadakoldakol kan nakadangog ki Jesus, pipira sana an nag-ako sa saiya asin kan huri nagkamit kan langitnon na paglaom. Alagad an sadangoton na aripompon nin mga tawong pinaniaki sa espiritu na nag-ako kan balos na iyan ikababaing ki Jacob na naghahandig sa sarong lamesa sa langit kaiba ni Jehova (an Orog Kadakulang Abraham) asin kan saiyang Aki (na ilinadawan ni Isaac). Tunay na bawi dian an paghingoa nin maigot, alagad ta an kadaklan na nakadangog ki Jesus dai guminibo kaiyan.

Kaya, maheheling niato gikan sa konteksto sa duwang okasyon na an komento ni Jesus (manongod sa pipira sana an mapapasa hayakpit na dalan na pasiring sa buhay asin maliligtas) sa pangenot may koneksion sa pagkakamit kan pag-oyon nin Dios kan panahon na idto na iinaalok Nia an paglaom sa langitnon na buhay. Pipira sana na nakadangog sa mensahe nin katotoohan asin nakanood kun ano an kaipuhan an nagkuyog asin nagmaimbod.—Mateo 22:14; 24:13; Juan 6:60-66.

Interesante nanggad na minsan ngonyan, na yaon an bilog na Biblia asin abunda an kaotoban nin banal na mga hula manongod sa huring mga aldaw, pipira sana an nagkukuyog sa Kristianong mensahe asin nagtatagal sa paglilingkod ki Jehova. Ini kaoyon sa ilustrasyon ni Jesus manongod sa laen-laen na klase nin daga. Sia nagsabi na an iba magdadangog sa “tataramon kan kahadean,” alagad ta aagawon ni Satanas an isinabwag. An iba maako sa tataramon na may kaogmahan alagad pag-abot nin panahon mawawara huli sa kahorasaan o paglamag. An iba pa dai magbubunga huli sa “kahaditan kan palakaw na ini nin mga bagay asin an mapandayang kapangyarihan nin kayamanan.”—Mateo 13:18-23.

Makasisierto kita na magigin laen nanggad an kamugtakan kun buhayon na liwat an minilyon sa Aldaw nin Paghokom. Sa panahon na iyan si Satanas bakong libre na agawon an mga banhi nin katotoohan na itinanom sa saindang puso. Dai sinda kaipuhan na umatubang sa paglamag o sa mga kahaditan sa presenteng maraot na palakaw. Sinda totokdoan sa sarong matanos na kamugtakan, napapalibotan kan mga milagro nin Dios, kaiba an pagbuhay liwat sa mga gadan asin pagpaomay sa mga nasyon. Totoo, an iba dai maako minsan sa panahon na iyan. (Ikomparar an Juan 11:45-53.) Alagad may marahay na dahelan na isipon na an mayoriya makasasabot sa tataramon, makuyog dian, asin maliligtas.