Ano an Nangyari sa Naturalesa nin Tawo?

“Taano ta may panriringis sa aki sa panahon na ini? Taano ta may panriringis sa hayop? Taano ta may kadahasan? . . . Taano ta nagugusto sa terorismo an mga tawo? Taano ta nagugusto sa droga an mga tawo? . . . Taano ta, mantang yaon na sa saimo an gabos, may mga tawo na minagibo kan pundamental na mga bagay na iyan na nakararaot sa bilog na sibilisasyon?”

AN MGA hapot na iyan ihinapot kan primer ministro nin Britania. Tibaad dakol na beses naman kamong naghapot nin arog kaiyan. May nanompongan daw kamong nakakokontentong mga simbag?

Sa pagtao nin tamang pagmansay sa saiyang mga hapot, an primer ministro nagsabi: “Sa laog nin dakol na taon kan ako hoben pa asin nasa politika kaiba an gabos kong paglaom asin pangarap patin ambisyon, an paghona ko asin kan dakol kong katemporanyo kun kita makaabot sa panahon na igwa na kita nin puwerteng mga harong, marahay na edukasyon, rasonableng grado nin pamumuhay, an gabos areglado na asin magkakaigwa na kita nin marahay asin mas pasil na ngapit. Aram na niato ngonyan na iyan bakong totoo. An kalaban niato iyo an tunay na mga problema sa naturalesa nin tawo.”—Samo an italiko.

An naturalesa nin tawo matatawan nin kahulogan na “an kabilogan kan pundamental na mga disposisyon asin ugale nin tawo.” Malinaw na an magkakakontrang disposisyon asin ugale puwedeng gikanan nin problema sa personal, nasyonal, o pati sa internasyonal na grado. Alagad ta gurano man nanggad an kasalan kan naturalesa nin tawo sa peligrosong mga tendensia ngonyan sa kadahasan, terorismo, pagpabakal nin droga, asin iba pa?

An naturalesa sana daw nin tawo an may kasalan sa mga kamugtakan na nagsasapeligrong ‘raoton an bilog na sibilisasyon’? O igwa daw nin ibang bagay na maninigo niatong konsideraron tanganing ikapaliwanag kun taano an mga tawo ta madalion na maholog sa makasosopog, paslong mga gibo mantang puwede sindang maghingoa sa mas halangkaw, mas nobleng mga gibo? Helingon niato.