Mawawara Pa Daw an Terorismo?
Pagkatapos nin sarong pag-atake nin terorista, puwedeng natural sana na maihapot mo sa sadiri: ‘Nagmamalasakit daw an Diyos? Taano ta nangyayari ini? Mawawara pa daw an terorismo?a Paano ko makakayanan an takot na namamatian ko?’ Nagtatao an Bibliya nin nakakaugmang simbag sa mga hapot na ini.
Ano an paghiling nin Diyos sa terorismo?
Nauungis an Diyos sa kadahasan asin terorismo. (Salmo 11:5; Talinhaga 6:16, 17) Sinaway man kan representante nin Diyos, si Jesus, an saiyang mga disipulo kan nagin madahas an mga ini. (Mateo 26:50-52) Dawa ngani may mga nagsasabi na para sa Diyos an kadahasan na ginigibo ninda, dai niya lamang sinda tinawan nin deretso na gibuhon iyan. An totoo, dai niya ngani dinadangog an mga pamibi ninda.—Isaias 1:15.
Nagmamalasakit an Diyos sa gabos na nagsasakit, pati na an mga naapektaran kan mga pag-atake nin mga terorista. (Salmo 31:7; 1 Pedro 5:7) Ipinapahiling man kan Bibliya na may gigibuhon an Diyos para halion an kadahasan.—Isaias 60:18.
An pinakadahilan kan terorismo
Ihinahayag kan Bibliya an tunay na dahilan kan terorismo: “An tawo nananakop sa tawo sa saiyang ikakapahamak.” (Eclesiastes 8:9) Sa bilog na kasaysayan, ginamit kan mga tawo na nasa kapangyarihan an terorismo para mang-api nin iba. Huli kaini, nagbalos man an ibang mga inaapi paagi sa terorismo.—Eclesiastes 7:7.
Mawawara na an terorismo
Nanunuga an Diyos na hahalion niya an takot saka kadahasan asin na sisiguraduhon niya na magigin matuninong digdi sa daga. (Isaias 32:18; Mikas 4:3, 4) Ini an mga gigibuhon niya:
Hahalion niya an pinakadahilan kan terorismo. Sasalidahan nin Diyos an mga gobyerno nin tawo kan saiyang gobyerno na mamamahala sa bilog na kinaban. An Tagapamahala kan gobyernong ini, si Jesu-Cristo, tatrataron nin patas an gabos, asin hahalion niya an pang-aapi saka kadahasan. (Salmo 72:2, 14) Sa panahon na iyan, mayo nin siisay man an magibo nin terorismo. “Makakanumpong [an mga tawo] nin labi-labing kaugmahan huli sa abundang katuninungan.”—Salmo 37:10, 11.
Hahalion niya an gabos na epekto kan terorismo. Papaumayan nin Diyos an mga tawo sa mga epekto kan terorismo, iyan man danyos sa pisikal o emosyonal. (Isaias 65:17; Kapahayagan 21:3, 4) Nanunuga pa ngani siya na bubuhayon niya an mga gadan asin papaistaron sinda sa sarong matuninong na daga.—Juan 5:28, 29.
Ipinapahiling kan Bibliya an mga dahilan kun taano ta makakasigurado kita na madali nang humiro an Diyos. Pero, tibaad maisip mo, ‘Taano ta dai pa hinahali kan Diyos an terorismo?’ Para maaraman an simbag, hilingon an video na Taano ta Tinutugutan nin Diyos an Pagsakit?
a An “terorismo” sa pangkagabsan nanunungod sa paggamit o paghuma nin kadahasan—lalo na sa mga sibilyan—para matakot an mga tawo asin magkaigwa nin pagbabago sa sistema kan pulitika, relihiyon, o komunidad. Pero, tibaad magkakalain an opinyon kan mga tawo sa kun baga an sarong partikular na pangyayari maibibilang na terorismo o bako.