Taano ta Maninigong Isaboot an Relihiyon?

“AN TAWO dai mabubuhay sa tinapay sana.” (Mateo 4:4, The New English Bible) An mga tataramon na iyan na parateng kotaron manongod sa pangangaipo nin tawo na nalingawan na nin dakol ngonyan. Iyan nagpaparisa na kita may espirituwal na kabtang sa satong naturalesa na kaipuhan na panigoan. Iyan an dahelan na an nagtaram kaiyan, si Jesu-Cristo, nagsabi man: “Mapalad an mga nakakaaram kan saindang pangangaipo sa Dios.”—Mateo 5:3, NEB.

Solamente an relihiyon an makapagpapanigo sa satong “pangangaipo sa Dios.” Solamente an relihiyon an makasisimbag sa satong pundamental na mga hapot manongod sa ginikanan, katuyohan, asin kahulogan nin buhay. Asin solamente an relihiyon an makatatao nin tunay na kahulogan asin kuwalidad sa satong buhay. Alagad bakong minsan arin na relihiyon an makagigibo kan gabos na ini. Sinabihan ni Jesus an sarong Samaritana: “An tunay na mga parasamba masamba sa Ama sa espiritu asin katotoohan.” (Juan 4:23) An pagsamba ‘sa katotoohan’ nangangahulogan nin labi pa sa pagsunod sa suanoy na mga tradisyon asin rituwal. Parate na an itinatao sana kaini sa mga miembro temporaryong pakamate nin karahayan, mantang pinababayaan sindang gutom sa espirituwal.

Halimbawa, si Edwin O. Reischauer, dating embahador kan E.U. sa Hapon, nagkomento: “An Shinto asin Budhismo para sa kadaklan na tawo mas kostumbre asin pinagkatodan kisa makahulogan na mga paniniwala.” Totoo, dakol na Hapones an kontento na arog na sana kaini. Pero an naglalataw na “bagong mga relihiyon” sa Hapon nagpaparisa nin nag-oorog na pagkadiskontento sa tradisyonal na relihiyon.

An “bagong mga relihiyon” may tendensiang isentro an atension sa karismatikong mga namomoon—bakong sa Dios. An dakol sa relihiyosong mga namomoon na ini naghihingako na pinasabngan nin Dios. Pero an mga doktrina ninda sa kadaklan pinagsaralak sanang Budhista, Shinto, asin iba pang paniniwala—na sinalakan kan dakol na pilosopiya kan kagpundar. An pan-akit kaiyan parateng nasa panugang mas marahay na buhay asin hinihingakong mistiko o nakapagpapaomay na mga kapangyarihan. Alagad an siring daw na mga relihiyon nagtatao nin ebidensia na tinotokdoan ninda an saindang mga miembro na sumamba “sa espiritu asin katotoohan”? Dai man. Enot, an relihiyosong mga kulto yaon ngonyan asin sa aga mayo na. An pagigin garo uso sana kaiyan daing gayo nagtatao nin dahelan na isaboot iyan.

Sarong Relihiyon na Maninigong Isaboot

Minsan siring, igwa nin relihiyon na mas haloy na kisa arin pa man na ibang klase nin pagsamba. Iyan an relihiyon na itinotokdo sa Banal na Biblia. An Biblia nagpoon na isurat kaidtong mga 35 siglo na an nakaagi, asin an iba sa mga ‘kasaysayan’ na iniingatan sa enot na mga kapitulo kaiyan labi pang sangribong taon bago kaiyan.a Yaon dian an kagurang-guranging mga rekord manongod sa mga ginikanan nin relihiyon. Iyan sana dahelan nang tawan nin seryosong pagkonsiderar an relihiyon kan Biblia.

An The Encyclopedia Americana nagsasabi manongod sa Biblia: “An liwanag kaiyan ‘suminirang sa bilog na kinaban.’ Iyan ibinibilang na ngonyan na moral asin relihiyosong kayamanan na an dai nauubos na katokdoan nanunugang magin mas mahalaga pa mantang nag-oorog an paglaom sa pankinaban na sibilisasyon.” Pero kun an libro talagang matutubod na giya sa tunay na relihiyon, dai daw nindo lalaoman na iyan an may pinakamahiwas na sirkulasyon, tanganing madaling makua nin gabos na naghahanap sa katotoohan?

Iyan an kamugtakan kan Biblia. Iyan trinadusir sa 1,928 tataramon, sa kabilogan o kabtang sana, asin iyan an librong may pinakamahiwas na sirkulasyon sa kasaysayan. Dugang pa, iyan napatunayan na tama sa historiko asin sientipikong paagi. An arkeolohiya asin kasaysayan nagpapatunay sa eksaktong kaotoban kan mga hula sa Biblia. Iyan mayo kan gabos na klase nin espiritismo asin mistisismo patin okulto. Ini gabos kaoyon kan paghihingako mismo kan Biblia na iyan ipinasabong nin Dios.b—2 Timoteo 3:16.

An “mga Bunga” nin Tunay na Relihiyon

Alagad bako daw totoo na an dakol na relihiyon naghihingakong nagsusunod sa Biblia? Asin bako daw na an pagraralaban, iriwal, asin pagsaginsagin risa sa dakol na naghihingakong Kristiano? Iyo, pero bako ining dahelan na dai intindihon an Biblia. Si Jesu-Cristo mismo nagsabi na an kadaklan sa mga naghihingakong Kristiano dai ooyonan nin Dios. (Helingon an Mateo 7:13, 14, 21-23.) Kun siring, paano mamimidbid nin saro an mga naggigibo kan tunay na relihiyon na itinotokdo sa Biblia? Si Jesus nagsimbag: “Paagi sa saindang mga bunga mamimidbid nindo sinda. Noarin man an mga tawo dai minaguno nin ubas sa mga tonok o nin mga higos sa mga binit, bako daw? Siring man an gabos na kahoy na marahay nagbubunga nin marahay, alagad an gabos na kahoy na raot nagbubunga nin daing data. Tunay, kun siring, paagi sa saindang mga bunga mamimidbid nindo an mga lalaking ini.”—Mateo 7:16, 17, 20.

Iyo, an tunay na relihiyon maninigong magin makosog na puwersa para sa ikararahay, na nagtatao nin kapakipakinabang na mga epekto sa mga nagsasamba. Halimbawa si Akinori, sarong Hapones na, sa sadiri niang tataramon, “nagin an personipikasyon nin makikompetensiang espiritu.” Naabot nia an saiyang mga pasohan na maggraduwar sa sarong pangenot na unibersidad asin makakua nin trabaho sa midbid na kompaniya. Mayo sia nin namamatean na dahelan na ibugtak an relihiyon sa saiyang buhay. ‘An relihiyon para sa mga maluya na nagkakaipo nin saklay sa buhay,’ an paghona nia.

Marahay an dalagan nin mga bagay sagkod na, bilang resulta nin tension asin kapagalan, nagkahelang sia nin magabat. An liog nia napiripit, asin an kuku nia “nanuog” sa wala niang abaga. An dakol na “amigo” sa kompaniya ni Akinori daing gayo nakatao nin panranga sa panahon kan saiyang kasakitan. (Ikomparar an Talinhaga 17:17.) Kaya nalunod sia sa hararom na bobon nin alkoholismo asin inisip pa nganing maghugot.

Pero pag-abot nin panahon an agom ni Akinori nagpoon na mag-adal kan Biblia kaiba kan mga Saksi ni Jehova. Sarong aldaw sa saindang pag-oolay, sinabi kan agom nia saiya an teksto sa Galacia 6:7, na nagsasabi: “An ano man na itinatanom nin tawo, iyan man sana an saiyang aanihon.” Naghanga sa mga tataramon na ini, si Akinori uminiba sa pag-adal, asin an nanodan nia nakaliwat sa saiyang punto-de-vista sa kahulogan nin buhay. Mantang nagigin maogma si Akinori, nagpoon na mawara an saiyang pagsakit na gikan sa tension! Arog kan sabi nin sarong talinhaga sa Biblia: “An trangkilong puso iyo an buhay sa laman.” (Talinhaga 14:30) Iyo, an tunay na relihiyon nagbubunga nin marahay!

Si Toshiro saro pang Hapones na nakaheling kun paano puwedeng magin puwersa para sa ikararahay an tunay na relihiyon. Minsan ngani sia nagtutubod na may halaga an pagkaigwa nin relihiyon, mayo siang ginibo dian. An interes nia nasa pagkaigwa nin sadiring harong. Pero an pagkaotob sa pasohan na iyan dai nagtao kan satispaksion na linalaoman nia. Saro pa, sa pangalagkalag nia sa saiyang pinagtatrabawohan, namasdan nia na uso an mga pandadaya asin na iyan nagbubunga nin maraot na personal na relasyon. Si Toshiro nababalde sa saiyang naheling.

Sarong aldaw inimbitaran kan agom nia an saro sa kamagurangan kan lokal na kongregasyon nin mga Saksi ni Jehova na songkoon sia. Narisa tolos ni Toshiro na napapalaen an magurang sa saiyang mga kairiba. An dahelan? Odok na iinaaplikar kan magurang an mga prinsipyo kan Biblia sa saiyang buhay. Naghanga digdi, inako ni Toshiro an imbitasyon na mag-adal sa Biblia asin nagpoon na gibohon na magin dalan nin buhay an relihiyon kan Biblia.

Iniimbitaran mi kamo na makipagmidbidan sa mga Saksi ni Jehova. An saindang “mga bunga” nagtatao nin ebidensia na sinda nagsasamba “sa espiritu asin katotoohan.” Sinda naghihingoang gayo na otobon sa saindang buhay an mga katokdoan kan Biblia. Asin minsan ngani bilang mga indibiduwal sinda harayo sa pagkasangkap, bilang sarong grupo ipinaheheling ninda kun gurano puwedeng magin makosog na espirituwal na puwersa para sa ikararahay an tunay na relihiyon.

An rinibo sa mga Saksi kaidto mamondo sa saindang pamumuhay. Alagad paagi sa pag-aplikar kan mga prinsipyo sa Biblia, an dakol sa sainda nakagibo nin pambihirang mga pagbakle. Paagi sa pagkultibar sa inaapod kan Biblia na “mga bunga kan espiritu,” arin na baga, an mga kuwalidad na pagkamoot, kagayagayahan, katoninongan, pakatios, kabootan, karahayan, pagtubod, kahoyoan, asin pagpopogol sa sadiri, nanompongan ninda an liyabe sa personal na kaogmahan.—Galacia 5:22, 23.

Daing Sagkod na mga Pakinabang sa Pag-otob kan Tunay na Relihiyon

Minsan siring, an tunay na relihiyon kaipuhan na bako sanang pagbakle sa mga personalidad o pagresolber sa personal na mga problema an gibohon. An panglobong mga problema arog baga nin polusyon, peligro nin guerra nuklear, asin pag-abuso sa palibot nag-uumang laglagon an satong magayon na planeta. An mga problema sa ekonomiya nakaoolang sa kaogmahan asin karahayan nin minilyon. Mayo nin relihiyon na puwedeng isaboot kun iyan dai nagtatao nin paglaom para sa pagresolber sa panglobong mga problemang ini.

An relihiyon kan Biblia nagtatao kan siring na paglaom. An Dios nanunuga na magtao nin matanos na bagong kinaban sakop nin sarong langitnon na gobyerno, o “kahadean.” (Mateo 6:9, 10; 2 Pedro 3:13; Kapahayagan 21:3, 4) An Kahadean na ini iyo an bolong sa gabos na helang kan katawohan. Asin manongod sa pagkapermanente kan lakop sa dagang mga pakinabang na iyan, an Biblia nanunuga sa sato: “An kinaban maagi sana asin an horot kaiyan, alagad an naggigibo kan kabotan nin Dios magdadanay sagkod lamang.” Iyo, an buhay na daing katapusan na may kaogmahan iyo an linalaoman nin kada tunay na Kristiano! (1 Juan 2:17) Alagad ta solamente an mga isinaboot an pag-otob sa tunay na relihiyon an makikinabang sa nagdadangadang na Kahadean na ini. Kun siring sinasadol mi kamo na ponan an seryosong pag-adal sa Biblia.c (Juan 17:3) Mantang pinoponan nindong pasirangon sa saindong buhay an liwanag kan Tataramon nin Dios, makakamate kamo nin dakulang kagayagayahan mantang tangga-tanggang napaninigoan an saindong “pangangaipo sa Dios.” Tunay nanggad, mapapasaindo an daing sagkod na mga bendisyon ta isinaboot nindo an relihiyon—an tunay na relihiyon.

[Mga Nota sa Ibaba]

[Ritrato sa pahina 5]

An pagkaigwa kan Biblia sa labing 1,900 na tataramon kaoyon kan paghihingako kaiyan na ipinasabong nin Dios

[Ritrato sa pahina 7]

An relihiyon kan Biblia nagtatao kan paglaom sa matoninong na mga kamugtakan sa bilog na kinaban sakop nin sarong langitnon na gobyerno