Gurano an Ilalawig kan Pasensia nin Dios?
KAIDTONG mga 3,000 na taon na an nakaagi, an sarong madonong nagsurat: “An tawo nagsakop sa tawo sa saiyang ikararaot.” (Eclesiastes 8:9) Poon kan sabihon nia an obserbasyon na ini, dai nagrahay an mga kamugtakan. Sa bilog na kasaysayan, an mga indibiduwal o grupo nan-agaw nin kapangyarihan, sunod-sunod, na dinodominar asin inaaprobetsaran an ibang tawo. Ini mapasensiang tinagalan ni Jehova Dios.
Si Jehova nagpasensia mantang an mga gobyerno ipinagadan an minilyon sa guerra asin tinogotan an grabeng inhustisya sa ekonomiya. Ngonyan, sia nagpapasensia mantang linalaglag nin mga tawo an ozone layer asin rinaramogan an atmospera asin an dagat. Seguradong grabe an kakologan na namamatean nia sa pagheling sa pagraot sa mabungang daga asin sa daing pakundangan na paglaglag sa mga kadlagan asin sa mga hayop!
Taano ta Mapasensiang Marhay an Dios?
An sarong simpleng ilustrasyon tibaad makatabang sato na masimbag an hapot na ini. Horophoropa an epekto sa sarong negosyo kun an sarong empleyado perming nahuhuri. Ano an maninigong gibohon kan kagsadiri? Tibaad hagadon nin pundamental na hustisya na pahaleon nia tolos an empleyado. Pero tibaad magirumdoman nia an talinhaga sa Biblia: “An haloy na maanggot dakula sa pakamansay, alagad an saro na daing pasensia nag-oomaw sa kakablasan.” (Talinhaga 14:29) An pakamansay tibaad magpangyari saiya na maghalat bago gumibo nin aksion. Tibaad magdesisyon sia na tawan nin panahon an pagtokdo sa sarong kasalida tanganing dai na maistorbo pa an negosyo.
An pakikidamay tibaad magpangyari man saiya na maghalathalat. Ano kun patanidan an pabayang empleyado tanganing helingon kun mababakle sia? Taano ta dai sia kaolayon asin helingon kun baga an permi niang pagkahuri huli sa sarong problema na mareresolberan o nin dai nang remedyong maraot na ugale? Minsan ngani an kagsadiri kan negosyo tibaad magdesisyon na magpasensia, an saiyang pasensia bakong daing limite. An empleyado kaipuhan na magsalang magbakle o sa katapustapusi pahaleon sa trabaho. Iyan magigin sanang makatanosan para sa negosyo mismo asin sa mga empleyado na nagkukuyog sa mga reglamento.
Sa nakaaagid na paagi, si Jehova Dios nagpapasensia kun napapaatubang sa pagkakasala tanganing matawan nin panahon an pakagibo nin makatanosan na solusyon sa nagkapirang problema. Saro pa, an saiyang pagpasensia nagtatao nin oportunidad sa mga parakasala na magbakle asin magkamit nin daing sagkod na mga pakinabang. Kaya, sinasadol kita kan Biblia na dai ikamondo an pagpasensia nin Dios. Imbes, iyan nagsasabi: “Ibilang nindo an pagpapasensia kan satong Kagurangnan na kaligtasan.”—2 Pedro 3:15.
Sarong Halimbawa kan Pagpasensia nin Dios
Si Jehova Dios nagpasensia bago kan dakulang Baha kan aldaw ni Noe. An kinaban kan panahon na idto pano nin kadahasan asin maraot nanggad. Mababasa niato: “Naheling ni Jehova na an karatan nin tawo labi-labi na sa daga . . . Kaya si Jehova nagsabi: ‘Paparaon ko an mga tawo na linalang ko sa ibabaw nin daga.’” (Genesis 6:5, 7) Iyo, nasa isip ni Jehova an ultimong solusyon sa problema nin karatan kaidto: an pagpara sa maraot na mga tawo. Pero dai sia naghiro tolos. Taano ta dai?
Huli ta bakong gabos maraot. Si Noe asin an saiyang pamilya matanos sa pagheling nin Dios. Kaya para sa saindang kapakinabangan, si Jehova mapasensiang naghalat tanganing togotan na an pirang matanos na mga tawo makaandam para sa kaligtasan. Saro pa, an halawig na paghalat na idto nagtao ki Noe kan oportunidad na magin “parahulit nin katanosan,” na tinatawan nin oportunidad an mga maraot na idto na magbakle. Sabi kan Biblia: “An pasensia nin Dios naghahalat kan mga aldaw ni Noe, mantang hinahaman an dahong, na dian an nagkapira, an boot sabihon, walong kalag, dinarang ligtas sa tubig.”—2 Pedro 2:5; 1 Pedro 3:20.
Kun Taano ta Nagpapasensia Ngonyan an Dios
Ngonyan, nakaaagid an kamugtakan. An kinaban pano na naman nin kadahasan. Arog kan aldaw ni Noe, hinokoman na nin Dios an kinaban, na, sinasabi kan Biblia, “inaandam sa aldaw nin paghokom asin kalaglagan kan maraot na mga tawo.” (2 Pedro 3:7) Kun iyan mangyari, mawawara na an paglaglag sa palibot, pan-aapi sa mga maluya, o paslong pag-abuso sa kapangyarihan.
Kun siring, taano ta dai pa linalaglag nin Dios an maraot na mga tawo? Huli ta may mga isyung kaipuhan na husayon asin mahahalagang bagay na kaipuhan na areglaron. Tunay nanggad, si Jehova nag-aabante pasiring sa permanenteng solusyon sa problema nin karatan na dakol na bagay an kalabot, kaiba an pagliligtas kan mga may matanos na puso sa kaoripnan sa helang asin kagadanan.
Nasa isip an ibubungang ini, nagin katuyohan ni Jehova na magtao nin Paraligtas na madolot nin pantubos para sa satong mga kasalan. Manongod sa saiya, an Biblia nagsasabi: “An Dios namoot na gayo sa kinaban na itinao nia an saiyang Aking bugtong, tanganing an lambang maggibo nin pagtubod sa saiya dai mapahamak kundi magkaigwa nin buhay na daing katapusan.” (Juan 3:16) Rinibong taon an kinaipuhan sa pag-andam kan dalan na si Jesus pumadigdi asin iatang an saiyang buhay para sa katawohan. Sa laog kan mga taon na idto, an Dios may pagkamoot na nagpasensia. Alagad bako daw na bawi man an paghalat sa siring na probisyon?
Itinao ni Jesus an pantubos sa katawohan haros duwang ribong taon na an nakaagi. Kun siring, taano ta sagkod ngonyan nagpapasensia an Dios? Primero, an kagadanan ni Jesus nagtanda kan kapinonan nin kampanya nin pagtotokdo. An katawohan kaipuhan na makaaram manongod sa mamomoton na probisyon na ini asin tawan kan oportunidad na akoon o haboan iyan. Iyan mangangaipo nin panahon, pero kapakipakinabang man na panahon. An Biblia nagsasabi: “Si Jehova bakong maluway kun dapit sa saiyang panuga, siring sa paghona nin nagkapira sa kaluwayan, kundi sia mapasensia sa saindo huli ta habo nia na an siisay man malaglag kundi boot nia na an gabos makapagsolsol.”—2 Pedro 3:9.
An Isyu sa Gobyerno
An saro pang mahalagang bagay mangangaipo man nin panahon. Kaipuhan na resolberan an problema sa gobyerno nin katawohan. Kan enot, an tawo sakop nin banal na gobyerno. Alagad sa tatamnan nin Eden, iyan tinalikdan kan enot niatong mga magurang. Pinili nindang magin independiente sa Dios, na boot na maghade sa saindang sadiri. (Genesis 3:1-5) Alagad, sa katotoohan, an tawo dai linalang na maghade sa sadiri. Si propeta Jeremias nagsurat: “Aram kong marhay, O Jehova, na bakong sadiri nin tawo an saiyang dalan. Mayo sa tawong naglalakaw an kakayahan na giyahan an saiyang lakad.”—Jeremias 10:23; Talinhaga 20:24.
Minsan siring, poon kan palatawon an isyu sa gobyerno, si Jehova mapasensiang nagtao nin panahon na resolberan iyan. An totoo, matinao niang itinogot sa tawo an rinibong taon tanganing probaran an gabos na maiisip na klase nin gobyerno. Ano an resulta? Nahayag na mayo nin gobyerno nin tawo na kayang haleon an pan-aapi, inhustisya, o iba pang dahelan nin kamondoan.
An totoo, huli sa kasaysayan nin tawo, may makasasabi daw na an Dios bakong makatanosan sa pagpahayag nia kan saiyang intension na haleon an gabos na gobyerno nin tawo asin salidahan iyan kan sadiri niang gobyerno? Mayo nanggad! Gustong-gusto nanggad niato an kaotoban kan hulang ini sa Biblia: “Sa mga aldaw kan mga hadeng idto an Dios nin kalangitan mapatindog nin sarong kahadean na dai noarin man malalaglag. Asin an kahadean mismo dai itatao sa ibang banwaan. Iyan an maronot asin matapos kan gabos na ining kahadean, asin iyan magdadanay sagkod lamang.”—Daniel 2:44.
An langitnon na Hade sa Kahadean na iyan iyo an binuhay liwat na si Jesus. An pag-andam sa saiya para sa katongdan na iyan—saka pagpili sa mga tawo na magigin kairibang hade nia—nangaipo nin panahon. Sa laog kan bilog na panahon na iyan, an Dios nagpasensia.
Makinabang Na Ngonyan sa Pagpasensia nin Dios
Ngonyan, an minilyon na tawo sa kisuerra 212 kadagaan nakikinabang sa pagpasensia nin Dios. Sinda nagkasararo sa saindang kamawotan na kumuyog sa Dios asin maglingkod sa saiyang langitnon na gobyerno. Kun sinda nagtitiripon sa saindang Kingdom Hall, nakakanood sinda kun gurano karahay nin orog na iaplikar an mga prinsipyo kan Biblia sa saindang buhay. Dai sinda nakikikabtang sa nakababangang politika kan kinaban na ini, minsan ngani sinda nagpapasakop sa mga gobyerno nin tawo sagkod na mapasensiang itinotogot nin Dios na an mga ini magpunsionar.—Mateo 22:21; Roma 13:1-5.
An siring na kooperasyon sa tahaw nin kadakol nagbibindikar ki Jehova bilang an Saro na kayang papagkaoroyonon an mga tawong may libreng kabotan na nakanood na kamotan sia asin boot na maglingkod sa saiya. Daing duwa-duwa na nakaolay na nindo sinda mantang ipinagpapadagos ninda an gibohon na pinonan mismo ni Jesus, an paghuhulit kan maogmang bareta kan Kahadean nin Dios. Ihinula ni Jesus an kulminasyon kan gibohon na ini kan sia magsabi: “An maogmang baretang ini kan kahadean ihuhulit sa bilog na ineerokan na daga para sa pagpatotoo sa gabos na nasyon; dangan madatong an katapusan.”—Mateo 24:14.
Dai Na Nanggad Mahahaloy!
Pinatutunayan nin naheheling na ebidensia na haros tapos na an mga areglo tanganing an matanos na gobyerno nin Dios iyo na an mamahala sa daga. Pakasaysayan kan teribleng mga resulta kan pagkasudya kan gobyerno nin tawo na naheling niato sa siglong ini, si Jesus nagsabi: “Kun maheling na nindong nangyayari an mga bagay na ini, aramon nindo na an kahadean nin Dios harani na.”—Lucas 21:10, 11, 31.
Dai na mahahaloy, hahaleon nin Dios sa daga an mga maraot. An mga tataramon kan salmista magkakaigwa nin literal na aplikasyon: “An mga maraot gagadanon . . . Dai na mahahaloy, asin ta an maraot mawawara na; asin hehelingon mo nanggad an saiyang namumugtakan, asin ta mayo na sia dian.” (Salmo 37:9, 10) Maiimahinar daw nindo an kinaban na mayo na nin karatan? Siisay na an mamamahala sa panahon na iyan? Sinasabi kan Biblia: “An sarong hade [si Cristo Jesus na natutukaw sa trono sa kalangitan] magsasakop para sa katanosan mismo; asin kun manongod sa mga prinsipe [an saiyang maimbod na mga ninombrahan digdi sa daga], magsasakop sinda bilang mga prinsipe para sa hustisya mismo. Asin an gibohon kan tunay na katanosan kaipuhan na magin katoninongan; asin an paglilingkod kan tunay na katanosan, katrangkilohan asin katiwasayan sagkod sa panahon na daing sagkod. Asin an sakuyang banwaan kaipuhan na mag-erok sa matoninong na mga erokan asin sa mga harong na may lubos na kompiansa patin sa trangkilong mga pahingaloan.”—Isaias 32:1, 17, 18.
Kaya, hahaleon kan langitnon na gobyerno nin Dios an maraot na mga epekto kan kasalan nin tawo asin oorganisaron an mga naglalaom sa Saiya sa sarong oroyon na sosyedad nin tawo. Sa paglaladawan kan pagkaoroyon na ini, sinasabi kan Biblia: “An lobo mag-eerok na kasaro kan kordero, asin an leopardo maghihigdang kadorog kan kanding, asin an bakang ogbon asin an leon saka an hayop na basog nag-iiriba; asin sarong aking sadang an mangengenot sa sainda . . . Dai sinda magibo nin maraot o manraraot sa bilog na sakuyang banal na bukid; huli ta an daga mapapano kan kaaraman dapit ki Jehova kun paanong an tubig nakatatahob sa mismong kadagatan.”—Isaias 11:6-9.
Kanigoan kamakangangalas na bunga kan pagpasensia nin Dios! Kun siring, imbes na magreklamo na an Dios nag-aatraso, taano ta dai aprobetsaran an saiyang pagpasensia na pumasakop sa saiyang Kahadean? Adalan sa Biblia kun ano an saiyang mga pamantayan asin ioyon dian an saindong buhay. Makiasosyar sa iba na oroyon na nagpapasakop sa saiya. Sa siring, an pagpasensia nin Dios magbubunga nin daing katapusan na mga bendisyon para sa saindo.