Manarig sa Nagliligtas na Takyag ni Jehova

“O . . . Jehova, magin ka samuyang takyag kada aga, iyo, an samuyang kaligtasan sa panahon nin kasakitan.”—ISAIAS 33:2.

1. Sa anong sentido na si Jehova may makosog na takyag?

SI Jehova may makosog na takyag. Siyempre, mantang “an Dios Espiritu,” iyan bakong takyag na laman. (Juan 4:24) Sa Biblia, an piguratibong takyag nagrerepresentar sa kakayahan na gumamit nin puwersa. Kaya, paagi sa saiyang takyag na iliniligtas nin Dios an saiyang banwaan. Tunay nanggad, ‘siring sa pastor, inaataman nin Dios an saiyang aripompon. Paagi sa saiyang takyag tinitipon nia an mga karnero, asin sa saiyang daghan dinadara nia sinda.’ (Isaias 40:11; Salmo 23:1-4) Gurano katiwasay kan banwaan ni Jehova sa saiyang mamomoton na takyag!—Ikomparar an Deuteronomio 3:24.

2. Anong mga hapot digdi an maninigo niatong horophoropon?

² Paano an takyag ni Jehova nagligtas sa saiyang banwaan, kan nakaagi asin sa presente? Anong tabang an itinao sainda nin Dios bilang sarong kongregasyon? Asin taano an saiyang banwaan ta makasasarig sa saiyang nagliligtas na takyag sa gabos nindang kasakitan?

An Nagliligtas na Takyag nin Dios Nasa Paghiro

3. Kiisay iinaatribuwir kan Kasuratan an pagkaligtas nin Israel sa Egipto?

³ Bago iligtas an mga Israelitas sa kaoripnan sa Egipto kaidtong 3,500 na taon na an nakaagi, sinabihan nin Dios an saiyang propetang si Moises: “Sabihan mo an mga aki ni Israel, ‘Ako si Jehova, asin kokoon ko kamo sa irarom kan mga pagabat kan mga Egipcio asin kakaldahon ko kamo sa pangongoripon ninda, asin tutuboson ko kamo paagi sa unat na takyag asin sa darakulang paghokom.’” (Exodo 6:6) Sono ki apostol Pablo, ilinuwas nin Dios an mga Israelitas sa Egipto “paagi sa nakaitaas na takyag.” (Gibo 13:17) An mga aki ni Core iinatribuwir sa Dios an pagkasakop sa Dagang Panuga, na sinasabi: “Bakong paagi sa saindang espada na nasadirihan ninda an daga, asin an saindang takyag bakong iyo an nagtao sainda nin kaligtasan. Kundi an saimong toong kamot asin an saimong takyag patin an liwanag kan saimong lalauogon, huli ta ikinaogma mo sinda.”—Salmo 44:3.

4. Paano binalosan an pagsarig sa nagliligtas na takyag ni Jehova kaidtong mga aldaw kan pananakop nin Asiria?

⁴ An takyag ni Jehova tuminabang man sa saiyang banwaan kan mga aldaw nin pananakop nin Asiria. Kan panahon na idto si propeta Isaias namibi: “O Jehova, kaheraki kami. Sa saimo kami naglaom. Magin ka samuyang takyag kada aga, iyo, an samuyang kaligtasan sa panahon nin kasakitan.” (Isaias 33:2) An pamibing iyan sinimbag kan gadanon kan anghel nin Dios an 185,000 sa kampo kan mga Asirio, na pinahale si Hadeng Senaquerib sa Jerusalem “na may kasopganan sa lalauogon.” (2 Cronica 32:21; Isaias 37:33-37) An pagsarig sa nagliligtas na takyag ni Jehova perming binabalosan.

5. Ano an ginibo kan makosog na takyag nin Dios para sa pinaglalamag na mga Kristiano sa katapusan kan Guerra Mundial I?

⁵ Ilinigtas kan makosog na takyag nin Dios an linahidan na mga Kristiano sa katapusan kan Guerra Mundial I. Kan 1918 an opisina prinsipal kan Namamahalang Grupo sinalakay kan saindang mga kaiwal, asin nabilanggo an bantog na mga tugang. Takot sa kinabanon na mga kapangyarihan, haros ipinondo kan linahidan an saindang pagpatotoo. Alagad ta ipinamibi ninda an pagkabuhay liwat kaiyan asin an pagkalinig sa kasalan nin inaktibidad asin ramog nin takot. An Dios nagsimbag paagi sa pagpangyari na an nabibilanggong mga tugang makaluwas, na dai nahaloy sinundan kan pagkapahayag sainda na daing kasalan. Bilang resulta nin mga katotoohan na ipinahayag sa saindang kombension kan 1919 asin kan pagbubo kan nagpapahirong espiritu nin Dios, an linahidan nabuhay liwat para sa daing takot na paglilingkod ki Jehova sa ultimong kaotoban kan Joel 2:28-32.—Kapahayagan 11:7-12.

Tabang sa Kongregasyon

6. Paano niato naaaraman na puwedeng tagalan an masakit na kamugtakan sa kongregasyon?

⁶ Mantang tinatabangan nin Dios an saiyang organisasyon sa pankagabsan, tinatabangan kan saiyang takyag an mga indibiduwal dian. Siyempre, an mga kamugtakan bakong sangkap sa arin man na kongregasyon ta an gabos na tawo bakong sangkap. (Roma 5:12) Kaya an ibang lingkod ni Jehova tibaad may beses na mag-agi sa masakit na kamugtakan sa kongregasyon. Halimbawa, minsan ngani si Gayo naggibo nin “maimbod na gibo” sa pag-istimar sa nagsosongkong mga tugang, dai sinda inistimar ni Diotrefes asin prinobaran pa nganing paluwason sa kongregasyon an mga mapagpasakat. (3 Juan 5, 9, 10) Minsan siring, tinabangan ni Jehova si Gayo asin an iba pa na magpadagos sa pagigin mapagpasakat bilang pagsuportar sa paghuhulit kan Kahadean. An mapagngayongayong pagsarig sa Dios maninigong makatabang sato na ipagpadagos an maimbod na mga gibo mantang hinahalat niato na itanos nia an sarong kamugtakan na tibaad nakababalo sa satong pagtubod.

7. Sa ibong nin anong mga kamugtakan sa kongregasyon sa Corinto na inotob nin maimbod na mga Kristiano duman an saindang pagdusay sa Dios?

⁷ Halimbawa asosyado kamo sa kongregasyon sa Corinto kan enot na siglo. May panahon na isinapeligro nin mga paggrupogrupo an pagkasararo kaiyan, asin isinapanganib nin pagkonsinte sa inmoralidad an espiritu kaiyan. (1 Corinto 1:10, 11; 5:1-5) An mga may pagtubod nag-arasuntuhan sa kinabanon na mga husgado, asin an iba pinag-iriwalan an laen-laen na bagay. (1 Corinto 6:1-8; 8:1-13) An buhay pinasakit nin iriwal, pag-imon, kaanggotan, asin kariribokan. An iba pinagdudahan pa ngani an autoridad ni Pablo asin minenus an saiyang abilidad sa pagdiskurso. (2 Corinto 10:10) Pero, an mga maimbod na kabilang sa kongregasyon na idto inotob an saindang pagdusay sa Dios sa masakit na mga panahon na idto.

8, 9. Ano an maninigo niatong gibohon kun mapaatubang sa sato an masakit na kamugtakan sa sarong kongregasyon?

⁸ Kun may lumataw na masakit na kamugtakan, kaipuhan na magdanay kita sa kaibanan kan banwaan nin Dios. (Ikomparar an Juan 6:66-69.) Pagpasensiahan niato an lambang saro, na minimidbid na an iba mas atrasado kisa iba sa pagsolog kan “bagong pagkatawo” asin pagsulot nin pagkaherak, kabootan, kapakumbabaan nin isip, kahoyoan, asin pakatios. Mantang an mga lingkod nin Dios magkakalaen man an pinaghalean, kita gabos kaipuhan na magpaheling nin pagkamoot asin magin mapagpatawad.—Colosas 3:10-14.

⁹ Pakalihis nin dakol na taon na paglilingkod ki Jehova, an sarong tugang nagsabi: “Kun may sarong bagay na nagin pinakamahalaga para sa sako, iyan an pagdanay na dayupot sa naheheling na organisasyon ni Jehova. An naenot kong eksperyensia nagtokdo sako kun gurano kamangmang na magsarig sa pangangatanosan nin tawo. Kan makadesisyon na an sakong isip sa puntong iyan, ako nagdesidir na magdanay sa maimbod na organisasyon. Ano pa an ibang paagi na makamtan nin saro an pag-oyon asin bendisyon ni Jehova?” Namomotan man daw nindo nin arog kaiyan an saindong pribilehiyo na maglingkod ki Jehova kaiba kan saiyang magayagayang banwaan? (Salmo 100:2) Kun iyo, dai nindo totogotan an ano man na irayo kamo sa organisasyon nin Dios o raoton an saindong relasyon sa Saro na an takyag nagliligtas sa gabos na namomoot sa saiya.

Tabang Kun Sinasalakay Kita nin mga Sugot

10. (a) Paano an pamibi nakatatabang sa banwaan nin Dios na atubangon an sugot? (b) Anong garantiya an itinao ni Pablo sa 1 Corinto 10:13?

¹⁰ Bilang maimbod na mga indibiduwal na asosyado sa organisasyon nin Dios, nasa sato an tabang nia sa panahon nin pagbalo. Halimbawa, tinatabangan nia kitang makapagdanay sa satong integridad kun kita nasusugotan. Siyempre, maninigo kitang mamibi kaoyon sa mga tataramon ni Jesus: “Dai mo kami darahon sa sugot, kundi iligtas mo kami sa maraot,” si Satanas na Diablo. (Mateo 6:9-13) Sa katotoohan hinahagad niato sa Dios na dai itogot na kita masudya kun kita nasusugotan na magmasumbikal sa saiya. Sinisimbag man nia an satong mga pamibi para sa kadonongan sa pagdaog sa mga pagbalo. (Santiago 1:5-8) Asin an mga lingkod ni Jehova makaseseguro sa saiyang tabang, ta si Pablo nagsabi: “Mayong sugot na maabot saindo kundi idto sanang dating namamatean nin tawo. Alagad an Dios maimbod, asin dai nia itotogot na kamo masugotan nin labi sa saindong makakaya, kundi kaibahan kan sugot matao man sia nin luluwasan tanganing iyan matagalan nindo.” (1 Corinto 10:13) Ano an ginigikanan kan siring na sugot, asin paano an Dios minatao nin luluwasan?

11, 12. Sa anong mga sugot napadara an mga Israelitas, asin paano kita makikinabang sa saindang mga eksperyensia?

¹¹ An sugot gikan sa mga kamugtakan na puwedeng makatentar sato na magtraydor sa Dios. Si Pablo nagsabi: “An mga bagay na ini nagin satong mga halimbawa, na kita dai magin mga tawo na nagmamawot sa mga bagay na nakararaot, kun paanong iyan pinagmawot [kan mga Israelitas]. Ni magin kamong mga parasamba sa ladawan, arog kan iba sa sainda; siring sa nasusurat: ‘An banwaan nagturukaw sa pagkakan asin pag-inom, asin nagburuhat sinda sa pag-oroogma.’ Ni makisaro man kita, arog sa nagkapira sa sainda na nakisaro, tangani sanang magadan, duwang polo may tolong ribo sa sainda sa sarong aldaw. Ni baloon man niato si Jehova, siring na an iba sa sainda binalo sia, tangani sanang mapara paagi sa mga halas. Ni magin kamong paragumodgumod, arog kan nagkapira sa sainda na naggumodgumod, tangani sanang mapara paagi sa paralaglag.”—1 Corinto 10:6-10.

¹² An mga Israelitas nagmawot nin mga bagay na nakararaot kan sinda padara sa sugot na magin paslo sa pagtipon asin pagkakan nin pugo na milagrosong itinao nin Dios. (Bilang 11:19, 20, 31-35) Bago kaidto, sinda nagin mga parasamba sa ladawan kan an paghale ni Moises magpalataw sa sugot na sumamba sa baka. (Exodo 32:1-6) Rinibo an napara ta napadara sinda sa sugot asin nakisaro sa mga babaeng Moabita. (Bilang 25:1-9) Kan an mga Israelitas napadara sa sugot asin naggumodgumod manongod sa paglaglag sa rebeldeng si Kore, Datan, Abiram, asin sa saindang kairiba, 14,700 an nagadan sa damat gikan sa Dios. (Bilang 16:41-49) Makikinabang kita sa siring na mga eksperyensia kun marerealisar niato na mayo ni saro sa mga sugot na ini na sobra kadakula na iyan dai kayang paglabanan kan mga Israelitas. Nagibo kutana iyan kun sinda nagtubod, nagtanaw nin utang na boot sa mamomoton na pangataman nin Dios, asin nasabotan an pagigin tama kan saiyang Pagboot. Sa siring ilinigtas kutana sinda kan takyag ni Jehova, kun paanong kita kayang iligtas kaiyan.

13, 14. Paano si Jehova nagtatao kan luluwasan kun an saiyang mga lingkod napapaatubang sa sugot?

¹³ Bilang mga Kristiano, kita napapaatubang sa mga sugot na uso sa katawohan. Pero, makapagdadanay kitang maimbod sa Dios paagi sa pag-arang kan saiyang tabang asin paghihingoa na paglabanan an sugot. An Dios maimbod, asin dai nia kita pababayaan na masugotan nin labi sa makakaya niato. Kun kita maimbod ki Jehova, nungka na magigin imposible sato an pag-otob sa saiyang kabotan. Itinatao nia an luluwasan paagi sa pagpakosog sato na mapaglabanan an sugot. Halimbawa, kun pinaglalamag, tibaad masugotan kita na makikompromiso sa paglaom na makalikay sa pasakit o kagadanan. Pero kun kita nananarig sa makosog na takyag ni Jehova, an sugot nungka na nakaaabot sa punto na dai na nia mapakokosog an satong pagtubod asin tawan kita nin igong kosog na magdanay sa integridad. Arog kan sabi ni apostol Pablo: “Kami nagigipit sa palibot, alagad dai man naiipit na dai na makahiro; kami nahahandal, alagad dai nahahalean nin paglaom; kami pinaglalamag, alagad dai pinababayaan; kami ilinalampog, alagad dai nalalaglag.”—2 Corinto 4:8, 9.

¹⁴ Tinatabangan man ni Jehova an saiyang banwaan paagi sa paggamit kan saiyang espiritu bilang parapagirumdom asin paratokdo. Ipinagigirumdom kaiyan an mga punto sa Kasuratan asin tinatabangan kitang mamansayan kun paano iyan ikaaaplikar tanganing mapaglabanan an sugot. (Juan 14:26) An maimbod na mga lingkod ni Jehova nasasabotan an mga isyung kalabot sa sugot asin dai nadadaya na lumakaw sa salang dalan. Itinao nin Dios an luluwasan paagi sa pagpangyari sainda na makatagal pati sagkod sa kagadanan na dai napadadaog sa sugot. (Kapahayagan 2:10) Apuwera sa pagtabang sa saiyang mga lingkod paagi sa saiyang espiritu, ginagamit ni Jehova an saiyang mga anghel para sa saiyang organisasyon.—Hebreo 1:14.

Tabang sa Personal na mga Bagay

15. Anong personal na tabang an manonompongan niato sa Awit ni Salomon?

¹⁵ An mga kaayon sa organisasyon ni Jehova nagkakamit kan saiyang tabang sa personal na mga bagay. Halimbawa, an iba tibaad naghihingoang makanompong nin Kristianong agom. (1 Corinto 7:39) Kun may pagkabigo, tibaad makatabang na horophoropon an hade sa Israel na si Salomon. Dai nia napakasalan an sarong daragang Sulamita ta ini namomoot sa sarong ordinaryong pastor. An tala kan hade manongod sa bagay na ini puwedeng apodon na An Awit sa Nabigong Pagkamoot ni Salomon. Tibaad maghibi kita kun dai nagkakabunga an satong romantikong mga paghihingoa, pero si Salomon nakasalbar man sa saiyang pagkabigo, asin iyo man kita. An espiritu nin Dios makatatabang sato na magpaheling nin pagpopogol sa sadiri asin iba pang diosnon na mga kuwalidad. An saiyang Tataramon nakatatabang sato na akoon an sa parate makolog na katotoohan na an saro dai puwedeng magkaigwa nin romantikong pagkamoot minsan kiisay na sana. (Awit ni Salomon 2:7; 3:5) Pero, ipinaheheling kan Awit ni Salomon na puwedeng makanompong nin kapagtubod na namomoot na gayo sa sato. Mas mahalaga, an “awit [na ini] na orog sa gabos” naootob sa pagkamoot kan Marahay na Pastor, si Jesu-Cristo, para sa saiyang “nobyang” 144,000 na linahidan na mga parasunod.—Awit ni Salomon 1:1; Kapahayagan 14:1-4; 21:2, 9; Juan 10:14.

16. Ano an tibaad kaiba sa “kahorasaan sa saindang laman” na naeeksperyensiahan nin mga Kristianong may agom?

¹⁶ Minsan an mga nag-agom nin may pagtubod may “kahorasaan sa saindang laman.” (1 Corinto 7:28) Magkakaigwa nin mga kapurisawan asin kahaditan mapadapit sa agom na lalaki asin agom na babae saka sa saindang mga aki. (1 Corinto 7:32-35) An helang puwedeng magtao nin mga pagabat asin tension. Huli sa paglamag o ekonomikong kadepisilan tibaad masakitan an sarong Kristianong ama na itagama an mga pangangaipo sa buhay para sa saiyang pamilya. An mga magurang asin aki tibaad pagsuruwayon nin pagkabilanggo, asin an iba tibaad pasakitan asin gadanon pa ngani. Alagad sa gabos na kamugtakan na iyan, mapaglalabanan niato an sugot na deharan an pagtubod kun talagang kita nananarig sa nagliligtas na takyag ni Jehova.—Salmo 145:14.

17. Anong problema sa pamilya an pinapangyari nin Dios na matagalan ni Isaac asin Rebeca?

¹⁷ Tibaad kaipuhan niatong tagalan an pirang pagbalo sa halawig na panahon. Halimbawa, an sarong aki tibaad magpasakit sa boot nin diosnon na mga magurang huli sa pag-agom nin daing pagtubod. Iyan nangyari sa pamilya kan patriarkang si Isaac asin kan saiyang agom na si Rebeca. An saindang 40 anyos na aking si Esau nag-agom nin duwang babaeng Heteo na “ginikanan nin kapaitan nin boot ni Isaac asin ni Rebeca.” Sa katunayan, “si Rebeca daing ontok na nagsasabi ki Isaac: ‘Ikinababalde ko na an buhay kong ini huli sa mga aking babae ni Het. Kun si Jacob [an saro pa nindang aki] maagom sa mga aking babae ni Het na arog kan mga ini sa mga aking babae kan daga, aanhon ko pa an buhay?’” (Genesis 26:34, 35; 27:46) Malinaw na an matanos na kalag ni Rebeca nasasakitan huli sa dai nahahaleng problemang ini. (Ikomparar an 2 Pedro 2:7, 8.) Pero, tinabangan kan takyag ni Jehova si Isaac asin Rebeca, na pinapangyari sinda na matagalan an pagbalong ini mantang napagdadanay an marigon na relasyon sa Saiya.

18. Anong personal na pagbalo an tinagalan ni C. T. Russell sa tabang nin Dios?

¹⁸ Makamomondo kun an sarong bautisadong miembro nin pamilya nanluluya sa paglilingkod sa Dios. (Ikomparar an 2 Timoteo 2:15.) Pero, an iba tinagalan pa ngani an pagkawara sa espirituwal na paagi kan saindang agom, arog ni Charles T. Russell, an enot na presidente kan Watch Tower Society. An saiyang agom pinutol an relasyon kaini sa Sosyedad asin binayaan sia kan 1897, pakalihis nin haros 18 taon nin pag-iba-iba. Naghagad ini nin separasyon legal kan 1903, asin idto itinao kan 1908. Hayag na marhay an saiyang kamondoan kan sabihan nia ini sa sarong surat pagkasiblag pa sana ninda: “Ako odok na namimibi sa Kagurangnan para sa saimo. . . . Dai taka pagagabatan nin mga estorya kan sakuyang kamondoan, ni poprobaran man na pukawon an saimong simpatiya paagi sa pagsaysay kan sakuyang mga saboot, mantang sa panapanahon nadudukayan ko an saimong mga bado asin iba pang kasangkapan na nagpapagirumdom sako kan dati mong pagkatawo—na pano nin pagkamoot asin simpatiya patin pagtabang—kan espiritu ni Cristo. . . . Ay, tabi horophoropon mo na may pagngayongayo an sasabihon ko. Asin maseseguro mo na an pinakamakolog sa boot ko, an may hararomon na epekto sa sakong boot, bakong an sakuyang kapungawan sa natatada ko pang buhay, kundi an saimong pagkaholog sa kasalan, sakuyang namomotan, an saimong daing sagkod na kapierdihan, sa naheheling ko.” Sa ibong kan siring na kakologan sa boot, nakamtan ni Russell an pagtabang nin Dios sagkod sa katapusan kan saiyang daganon na buhay. (Salmo 116:12-15) Perming tinatabangan ni Jehova an saiyang maimbod na mga lingkod.

Hale sa Gabos na Kasakitan

19. Ano an maninigo niatong girumdomon kun dai nahahale an masakit na mga problema?

¹⁹ An banwaan ni Jehova nakakamidbid sa saiya bilang “Dios nin mga pagliligtas,” Saro na “sa aroaldaw dinadara an pasan para sa sato.” (Salmo 68:19, 20) Kun siring, bilang mga nagdusay na kaayon sa saiyang daganon na organisasyon, nungka na kita padaog sa pagkadesesperar kun dai nahahale an masakit na mga problema. Girumdoma na “an Dios pailihan asin kakosogan para sa sato, sarong tabang na danay na makukua sa panahon nin mga kasakitan.” (Salmo 46:1) An pagsarig niato sa saiya perming binabalosan. “Ako naghapot ki Jehova, asin sinimbag nia ako,” sabi ni David, “asin ilinigtas nia ako sa gabos kong katakotan. . . . An nasasakitan na ini nag-apod, asin si Jehova mismo nagdangog. Asin sa gabos niang kasakitan sia ilinigtas Nia.”—Salmo 34:4-6.

20. Anong hapot an pag-oolayan pa?

²⁰ Iyo, an satong langitnon na Ama iliniligtas an saiyang banwaan sa gabos na kasakitan. Tinatabangan nia an saiyang daganon na organisasyon, na nagtatabang sa pankongregasyon asin personal na mga bagay. Tunay nanggad, “dai pababayaan ni Jehova an saiyang banwaan.” (Salmo 94:14) Alagad an sumunod niatong pag-olayan ibang mga paagi na tinatabangan ni Jehova an saiyang banwaan bilang indibiduwal. Paano pinakokosog kan satong langitnon na Ama an saiyang mga lingkod na may helang, may mental depresyon, may makuring kamondoan huling nagadanan, o isinasakit nin boot an saindang mga kasalan? Arog kan maheheling niato, digdi man sa mga bagay na ini, may dahelan kitang manarig sa makosog na takyag ni Jehova.

Ano an Isisimbag Nindo?

◻ Paano an takyag ni Jehova nagtao nin kaligtasan kan enot na mga panahon?

◻ Paano tinatabangan ni Jehova an saiyang banwaan sa kongregasyon ngonyan?

◻ Anong tabang an itinatao nin Dios sa personal na mga bagay?

◻ Ano an maninigo niatong gibohon kun dai nahahale an masakit na mga problema?

[Ritrato sa pahina 14, 15]

Ilinuwas nin Dios an mga Israelitas sa Egipto “paagi sa nakaitaas na kamot”