Nagigirumdoman daw Nindo?

Pinahalagahan daw nindo an pagbasa kan bagong mga luwas kan An Torrengbantayan? Bueno, helinga kun masisimbag nindo an minasunod na mga hapot:

▫ Anong praktikal na tabang an puwedeng itao sa mga naghehelang asin gurang sa sarong kongregasyon ngonyan?

Sa enot na Kristianong kongregasyon, igwa nin listahan nin mga balo na nangangaipo nin materyal na pagsuportar. (1 Timoteo 5:​9, 10) Siring man ngonyan, an mga magurang puwedeng gumibo nin listahan nin mga naghehelang asin gurang na nangangaipo nin espesyal na atension. Minsan siring, dai maninigong iwalat sa mga magurang sana an pangengenot sa bagay na ini. An gabos sa kongregasyon kaipuhan na nakakaisi kan siring na mga pangangaipo. (1 Timoteo 5:​4-8)​—w-BI 8/15, pahina 24-5.

▫ An estorya daw kan Biblia manongod ki Jonas na hinalon kan hayop sa dagat dai mapaniniwalaan?

Dai, arin man sa sperm whale, great white shark, o whale shark makahahalon nin tawo. Dugang pa, si Jesus mismo pinatunayan na totoo an tala ni Jonas. (Mateo 12:​39, 40)​—w-BI 8/15, pahina 32.

▫ Anong peligro an nagreresulta sa paggamit nin mga agimat asin anting-anting?

An paggamit kaiyan aktuwalmenteng pinapaluya an boot nin mga tawo sa madonong na pag-atubang sa saindang mga problema asin pinakokosog sinda na dumolok sa kapaladan bilang remedyo sa gabos. Iyan nagtatao man sa naggagamit nin salang pakamate nin seguridad. Mas importante, an saro na nagtutubod sa kapangyarihan nin mga agimat sa mahiko asin anting-anting nin kapaladan puwedeng isinusuko an saiyang buhay sa dai naheheling na mga puwersa nin demonyo.​—w-BI 9/1, pahina 4.

▫ Ano an apat na elemento na makatatabang na magdanay an pag-aragoman?

Ini an pagigin gustong maghinanyog, an abilidad na humagad nin tawad, an kakayahan na tumao nin dayaday na emosyonal na pagsuportar, asin an pagmawot sa paghapiyap na may pagpadangat. (1 Corinto 13:​4-8; Efeso 5:​33; Santiago 1:19)​—w-BI 9/1, pahina 20.

▫ Ano an sarong paagi na itinatao ni Jehova an pakatagal sa mga napapaatubang sa mga pagbalo?

Ginigibo ini ni Jehova paagi sa mga halimbawa nin pakatagal na nasusurat sa saiyang Tataramon, an Biblia. (Roma 15:4) Mantang hinohorophorop niato an mga ini, kita napakokosog na magtagal, asin dakol man kitang nanonodan manongod sa kun paano magtatagal.​—w-BI 9/15, pahina 12.

▫ Ano an diosnon na debosyon?

An diosnon na debosyon nanonongod sa debosyon ki Jehova na nagpapahiro sato na gibohon an ikinaoogma nia, dawa sa atubangan nin masakit na mga pagbalo, huli ta namomotan ta an Dios gikan sa puso.​—w-BI 9/15, pahina 15.

▫ Paano niato maninigong mansayon an pagkaherak nin Dios?

Nungka niatong menuson an dakulang pagkaherak nin Dios. Maninigo kitang magin arog ni Pablo asin ipaheling an satong apresasyon paagi sa pakikilaban tumang sa satong sadiring mga pagkabakong sangkap. (1 Corinto 9:27) Sa paaging ini ikapaheheling niato, dawa sa atubangan nin mga kadepisilan, na igwa kita nin tunay na pagmawot na gibohon an tama.​—w-E 10/1, pahina 23.

▫ Taano ta angay na ilista ni Pablo an pakatios na enot na sangkap nin pagkamoot?

May mga nagsabi na dai puwedeng magkaigwa nin pag-iribaibang Kristiano kun mayo nin pakatios, o kun mayo nin mapasensiang pagtiniosan. Ini huli ta kita gabos bakong sangkap, asin nasasakitan an iba sa satong mga pagkabakong sangkap asin pagkukulang. Kun siring, an pakatios pundamental tanganing mag-eksister an pagkamoot sa pag-oltanan nin magturugang.​—w-BI 10/15, pahina 21.

▫ Ginamit daw kan enot na mga Kristiano an ngaran nin Dios?

Nagsasabi an ebidensia na iyo. Tinokdoan ni Jesus an saiyang mga parasunod na mamibi sa Dios: “Pakangbanalon logod an saimong ngaran.” (Mateo 6:9) Asin sa katapusan kan saiyang ministeryo, sia namibi: “Ipinahayag ko an saimong ngaran sa mga tawo na itinao mo sa sako hale sa kinaban.” (Juan 17:6) Apuwera kaiyan, an enot na mga kopya kan Septuagint naglalaman kan ngaran nin Dios sa porma kan Hebreong Tetragrammaton.​—w-BI 11/1, pahina 30.

▫ Anong mga halimbawa sa Biblia an nagpapaheling na an paagi nin pag-atubang niato sa satong mga sala puwedeng makaapektar sa satong buhay?

Si Hadeng Saul may katagasan an payong nagtumang sa hatol, asin duminakol an sala nia, na sa huri natapos sa pagkagadan nia na mayo sa pabor nin Dios. (1 Samuel 15:​17-29) Sa ibong na kampi, sa ibong kan mga sala asin kasalan nia, may pagsolsol na inako ni Hadeng David an pagtatanos asin nagdanay na maimbod ki Jehova. An mga halimbawang ini sa Biblia nagpapaheling na an pag-ako kan mga sala niato nakatatabang sato na pagdanayon an marahay na relasyon sa Dios asin sa siring magkaigwa nin paglaom na buhay na daing katapusan. (Salmo 32:​1-5)​—w-BI 11/15, pahina 30.

▫ Paano si Jehova minatabang sa saiyang banwaan kun sinda nasasakitan huli sa natural na mga kalamidad o ibang dahelan?

Si Jehova nagtatabang, bakong paagi sa milagrosong pagpasibog sa mga puwersa nin naturalesa o paagi sa iba pang akto na lihis sa natural, kundi paagi sa ibang puwersa na dai talaga nasasabotan kan kadaklan na tawo​—an pagkamoot. Iyo, tunay na namomotan ni Jehova an saiyang banwaan, asin pinatalubo nia sa tahaw ninda an marigon na gayong pagkamoot sa kada saro na nagigibo nia para sa sainda an garo baga milagroso. (1 Juan 4:​10-12, 21)​—w-BI 12/1, pahina 10.