Taano ta Dapat na Magin Interesado sa Relihiyon?
SA GABOS na nasyon sa ibabaw kan daga, igwa nin interes sa relihiyon. Sa ibong na kampi, dakol man an prangkahan na gayong nagsasabi na mayo sinda nin interes sa relihiyon. Alagad siring daw kaiyan permi an saindang saboot?
Naturalesa na nin tawo na ini bako talagang kontento sa materyal na mga bagay sana. An mga tawo nangangaipo nin espirituwalidad. An pagkabuhay sa aroaldaw na nakasentro sa pakakua sana kan pisikal na mga pangangaipo, na may paminsanminsan na pag-aling-aling, dai lubos na nakakapanigo sa mga pangangaipo nin tawo sa kairairaromi kan saiyang boot. Bakong arog sa mga hayop, an mga tawo gustong maaraman kun, ‘Ano an katuyohan nin buhay?’ ‘An halipot na buhay na ini, na kabale an dakol na magayon pero siring man an dakol na makanos, iyo na sana daw ini?’ Dai daw nindo ihinahapot an mga siring kaini?
Alagad, an dakol na minilyon na tawo na buhay ngonyan nagdakula sa mga palibot na dinidisganar an ano man na makahulogan na interes sa relihiyon. An siring na impluwensia puwedeng gikan sa saindang mga magurang, sa mga maestro, sa mga kaedad, o patin sa gobyerno.
Si Skalabrino, sarong solterong taga-Albania, nagpaliwanag na sa irarom kan pamamahala nin Komunista an mga tawo tinokdoan na mayo daa nin Dios. Dugang pa, peligroso para sainda na mag-orolay dapit sa relihiyon; an paggibo kaiyan puwedeng magbunga nin pagkabilanggo. Alagad, kan 1991, kan nasa Switzerland bilang sarong dulag, natawan sia nin oportunidad na pag-adalan an Biblia. Saiyang inako. Taano?
Bueno, sa Albania nabaretaan nia na igwa nin sarong libro na inaapod Biblia, pero mayo talaga sia nin ano man na aram manongod kaiyan. Kaya, kan enot puwedeng bako man talagang pagmawot na masabotan an Biblia an nakapahiro saiya. Minsan ngani sinabihan sia na pag-aadalan nia an manongod sa katuyohan nin Dios para sa katawohan asin sa daga, ibinilang man nia iyan na oportunidad na mapaoswag an saiyang pagtaram sa lokal na lenguahe. Alagad, tolos-tolos na nanompongan nia na an saiyang nanonodan pinaninigoan an saiyang makosog na panlaog na espirituwal na pagmawot. Napaogma an saiyang puso kan panuga nin Dios dapit sa sarong bagong kinaban na dian magdadanay an katoninongan, sarong kinaban na an mga tawo puwedeng mabuhay sagkod lamang asin magkamit nin abundansia sa gabos na kinakaipuhan sa buhay. An saiyang interes nag-orog kan manodan nia na sia asin an saiyang pamilya puwedeng magin kabtang kan bagong kinaban na ini. Dai kayang sadirihon an maogmang bareta, nagtelepono sia sa saiyang pamilya sa Albania tanganing ihiras iyan sa sainda.
Si Aleksei, na nag-iistar sa Rusia, napangalas man sa puwedeng magin epekto sa buhay nin sarong tawo kan tamang kaaraman sa Biblia. Nadadaog na nin mga problema asin dai nakanonompong nin nakakokontentong paliwanag dapit sa katuyohan nin buhay, plinano niang maghugot. Pero, nagduman nguna sia sa Finlandia tanganing songkoon an sarong amigo. Kan nagbibiyahe lunad sa tren, iinestorya nia an saiyang mga problema sa nagkapirang kalunad. Kabale sa sainda an saro sa mga Saksi ni Jehova, na sinadol siang pag-adalan an Biblia huling iyan nagtatao nin mga solusyon sa siring na mga problema. Nagduda si Aleksei. Sa pagbiyahe papuli, iyo man giraray an saiyang naeksperyensiahan. Ngonyan iba naman na Saksi an nagtaram asin sinabihan sia na siring man kaiyan an mga problema nia kaidto alagad ta an Biblia nakatabang saiya na mapangganahan iyan. Dinagka man sia kan Saksi na pag-adalan nia an Biblia. Pakapuli nia sa harong, nagtanog an telepono. Idto saro pang amiga, na nakikipag-adal na sa mga Saksi asin naoogmang marhay. Si Aleksei nagpoon na makarealisar na posibleng an Biblia talagang puwedeng makatao kan kinakaipuhan nia, pero aram nia na kun mayong matabang dai nia iyan masasabotan. Uminoyon siang magkaigwa nin regular na pakipag-adal sa Biblia sa mga Saksi ni Jehova, asin nagpoon siang umatender sa saindang mga pagtiripon. Madali niang nasabotan kun taano ta maogmahon an mga minomolde an saindang buhay sono sa itinotokdo kan Biblia, minsan ngani sinda napapaatubang man sa mga problemang namamatean kan bilog na katawohan.
Namamansayan an naturalesa nin tawo, si Jesu-Cristo nagsabi: “An tawo dai mabubuhay sa tinapay sana.” (Mateo 4:4, The New English Bible) Saiya man na sinabi: “Maogma idtong mga nakamamate kan saindang espirituwal na pangangaipo.” (Mateo 5:3) Nakakamtan ninda an kaogmahan huli ta odok na namamatean ninda an saindang pangangaipo, ginigibo an tamang mga paagi na mapanigoan iyan, asin naeeksperyensiahan an pagbendisyon nin Dios. Alagad, an satong espirituwal na pangangaipo dai napaninigoan paagi sana sa pagbale sa sarong iglesya o pag-atender sa relihiyosong mga seremonya. An relihiyon na haros gabos na sana rituwal tibaad nakaaakit sa emosyon, alagad nagtatao daw iyan nin realistikong mga solusyon sa mga problema sa buhay? Minsan ngani an sarong relihiyon may sinusuportaran na marahay na pundamental na mga prinsipyo, kun dai kaiyan ikinatatao an tunay sa pakasabot manongod sa tunay na katuyohan nin buhay, mapaninigoan daw kaiyan an saindong espirituwal na pangangaipo? Orog pa nganing mahalaga, an paggibo daw kan siring na relihiyon magiya sa marahay na relasyon sa Dios? Kun mayo iyan, mayo an tunay na pagkakontento.
Manongod kaini dakol na tawo an naghahanap nin sarong bagay na dai pa ninda nanonompongan.
[Ritrato sa pahina 3]
An saindo daw na mga pangangaipo sa espirituwal talagang mapaninigoan paagi sa pagbale sa sarong iglesya?
[Ritrato sa pahina 4]
Dakol an nakanompong na kun nasasabotan ninda an Biblia, an buhay nagkakaigwa nin bagong kahulogan