Taano an Takot ta Lakop sa Kinaban?
SIISAY an gusto na mabuhay sa takot? An ordinaryong tawo nagmamawot nin seguridad, na mayo nin huma sa saiyang buhay o mga rogaring. Kaya, dakol an minahale sa pano-pano nin krimen na mga lugar. Minsan siring, an mga dahelan nin takot nag-eeksister sa gabos na lugar.
An mga peligro nin aksidente sa nuklear na mga armas asin reaktor pinupukaw an katawohan sa takot sa pagkalaglag. An marikas an pagdakol na kadahasan nagpapalakop nin takot. Dakol an natatakot na an AIDS magigin an pinakanakagagadan na epidemya kan siglo. An paglaglag sa satong palibot kaiba sa iba pang mga dahelan nin takot. An mga takot daw na ini espesyalmenteng makahulogan? Asin makakalaom pa daw kita na mabuhay sa sarong kinaban na mayo nin siring na takot?
An Pambilog na Kinaban na Takot Makahulogan
An lakop na takot ngonyan makahulogan huli sa ihinula sa Biblia. Sa saiyang hula dapit sa huring mga aldaw, si Jesu-Cristo nagsitar nin mga kamugtakan na magigin dahelan nin takot. Sia nagsabi: “An nasyon matindog tumang sa nasyon asin an kahadean tumang sa kahadean, asin magkakaigwa nin mga kakulangan nin kakanon asin mga linog sa surunod-sunod na lugar.” Nagtaram man si Jesus manongod sa “pag-orog nin katampalasanan.” Magpoon kan 1914, an daing kaagid na mga guerra, gutom, linog, asin katampalasanan nagresulta nin grabeng takot asin pagkawara nin buhay.—Mateo 24:7-14.
Pati an ugale nin mga tawo nakakadagdag sa takot ngonyan. Sa 2 Timoteo 3:1-4, mababasa niato an makahulang mga tataramon ni apostol Pablo: “Sa huring mga aldaw maabot an delikadong mga panahon na masakit pakibagayan. Huli ta an mga tawo magigin mamomoton sa sainda man sana, mamomoton sa pirak, maabhaw, mapalangkaw, mga paralanghad, masumbikal sa mga magurang, dai tataong magbalos, bakong maimbod, dai nin pagkamoot, dai maoyonan, mga parapakaraot, mayong pagpopogol sa sadiri, maringis, mayong pagkamoot sa karahayan, mga parapasaloib, mga matagas an payo, mga mahambog, mga mamomoton sa kasingawan kisa magin mamomoton sa Dios.” Mantang napapalibotan kita nin siring na mga tawo sa huring mga aldaw na ini, bakong makangangalas na igwa nin grabeng takot!
Kun Ano an Malalaoman kan Kinaban na Ini
Ikinomparar ni Jesus an peryodong ini sa huring mga aldaw kan kinaban kan panahon ni Noe. Daing duwa-duwa, grabe an takot kan panahon na iyan, huli ta an makasaysayan na rekord kan Biblia nagsasabi: “An daga nagin laglag sa pagheling kan tunay na Dios asin an daga napano nin kadahasan.” Kaya, “an Dios nagsabi ki Noe: ‘Nagdatong na para sa sako an katapusan kan gabos na laman, huli ta an daga pano nin kadahasan.’” (Genesis 6:11, 13) An maraot na kinaban na iyan madahas na gayo kaya tinapos iyan nin Dios paagi sa panglobong Baha. Pero, huli sa pagkamoot, ilinigtas ni Jehova Dios an matanos na si Noe asin an saiyang pamilya.—2 Pedro 2:5.
Kun siring ano an malalaoman kan presenteng madahas na kinaban? Bueno, ikinababalde nin Dios an madahas na pagbasangbasang sa kapakanan kan iba. Maririsa ini sa mga tataramon kan salmista: “Si Jehova mismo nagsisiyasat sa matanos patin sa maraot, asin an siisay man na namomoot sa kadahasan ikinaoongis nanggad kan Saiyang kalag.” (Salmo 11:5) Tinapos ni Jehova an madahas na kinaban kan aldaw ni Noe. Kaya, kun siring, dai ta daw maninigong laoman an Dios na tapuson an kinaban na ini na dinadamat nin makatatakot na kadahasan?
Si apostol Pedro pinasabngan nin Dios na magtaram manongod sa presensia ni Cristo asin maghula nin kalamidad sa presenteng maraot na kinaban. Sia nagsurat: “Sa huring mga aldaw an mga paraolog-olog madatong na may pag-olog-olog, na maglalakaw sono sa saindang mga horot asin magsasarabi: ‘Haen man ining ipinanugang presensia nia? Tara, poon kan aldaw na an satong mga kag-anak magtorog sa kagadanan, an gabos na bagay pareho man sana poon kan kapinonan nin paglalang.’” Dangan ginamit ni Pedro an terminong “kalangitan” tanganing irepresentar an palakaw nin bakong sangkap na pamamahala sa katawohan asin an terminong “daga” para sa maraot na sosyedad nin tawo. “Huli ta,” nagsabi sia, “oyon sa saindang kabotan, an bagay na ini dai ninda namamangno, na igwa nin kalangitan kan suanoy asin daga na hinaman hale sa tubig asin sa tahaw nin tubig paagi sa tataramon nin Dios; asin sa paagi kaiyan an kinaban kan panahon na idto [aldaw ni Noe] nalaglag kan iyan nalantopan nin tubig. Alagad sa iyo man sanang tataramon an kalangitan asin daga ngonyan itinagama sa kalayo asin inaandam sa aldaw nin paghokom asin kalaglagan kan maraot na mga tawo.”—2 Pedro 3:3-7.
Sa kaparehong kaisipan, idinoon ni Pablo na si Cristo asin an saiyang makapangyarihan na mga anghel magpapaabot nin ‘pamamalos sa mga dai nakamimidbid sa Dios asin sa mga dai nagkukuyog kan maogmang bareta manongod sa satong Kagurangnan na si Jesus. An mga ini mismo magtitios kan silot nin daing sagkod na pagkalaglag.’ (2 Tesalonica 1:6-9) An ultimong libro kan Biblia nagtataram manongod sa pagtipon sa mga nasyon para sa “ralaban kan dakulang aldaw nin Dios na Makakamhan sa gabos” asin sinisierto sa sato na si Jehova ‘lalaglagon an mga naglalaglag kan daga.’—Kapahayagan 11:18; 16:14-16.
Sarong Panahon nin Kagayagayahan, Bako nin Takot
Imbes na matakot sa ihinuhula kan Biblia para sa kinaban na ini, an matanos na mga tawo igwa nin dahelan sa kagayagayahan. Dai mahahaloy tatapuson na ni Jehova an maraot na kinaban na ini, alagad gigibohon ini para sa ikakarahay kan mga namomoot sa katanosan. Ano an masunod sa pagtapos nin Dios sa presenteng palakaw nin mga bagay? Tara, an bagong palakaw sa irarom kan langitnon na Kahadean nin Dios, na iyan an itinokdo ni Jesus sa saiyang mga parasunod na ipamibi! Sia nagsabi: “Kaya mamibi kamo nin arog kaini: ‘Ama niamo na nasa langit, pakangbanalon logod an saimong ngaran. Dumatong logod an kahadean mo. Gibohon logod an boot mo, kun paano sa langit, siring man sa daga.’” (Mateo 6:9, 10) Anong mga pagliliwat an malalaoman kun gibohon na an kabotan nin Dios digdi sa daga?
An guerra asin an mga kahandalan kaiyan tatapuson na. An Salmo 46:9 nagsasabi: “Pinaoontok nia [ni Jehova Dios] an mga ralaban sagkod sa kaporoporohi kan daga. An arko saiyang binabari asin pinagpuputolputol an garod; an mga karro [de-guerra] saiyang sinosolo sa kalayo.” Dangan an mga tawo “magtutukaw, asin lambang saro sa sirong kan saiyang ubas asin sa sirong kan saiyang higuerra, asin mayo nin siisay man na magpapatakig sa sainda.”—Miqueas 4:4.
An nakakagadan na mga helang dai na magkacausa nin takot asin mangagadan. An panuga nin Dios iyo ini: “Mayo nin nag-eerok na masabi: ‘Naghehelang ako.’” (Isaias 33:24) Kanigoan na dahelan nin kagayagayahan!
An mga takot na konektado sa krimen asin kadahasan magigin man mga bagay na nakaagi na. An Salmo 37:10, 11 nanunuga: “Dai na mahahaloy, asin an takot mawawara na; asin hehelingon mo nanggad an saiyang namumugtakan, asin ta mayo na sia dian. Alagad an mga mahoyo mismo magmamana kan daga, asin sinda nanggad magkakararanga nin labi-labi sa nagsosopay na katoninongan.”
Paano sasalidahan nin tunay na katoninongan asin seguridad an mga takot sa presenteng aldaw? Paagi sa sarong matanos na gobyerno—an Kahadean nin Dios. Manongod sa satong panahon, nagsasabi an Daniel 2:44: “Sa mga aldaw kan mga hadeng idto an Dios nin kalangitan mapatindog nin sarong kahadean na dai noarin man malalaglag. Asin an kahadean mismo dai itatao sa ibang banwaan. Iyan an maronot asin matapos kan gabos na ining kahadean, asin iyan magdadanay sagkod lamang.” An ninombrahan na Hade ni Jehova, si Jesu-Cristo, ‘kaipuhan na mamahala sagkod na ibugtak nin Dios an gabos na kaiwal sa irarom kan saiyang mga bitis.’ (1 Corinto 15:25) An Sangribong Taon na Paghade ni Jesus ootobon an orihinal na katuyohan nin Dios na magkaigwa nin sarong paraisong daga na iistaran nin daing sagkod kan magayagayang mga tawo.—Lucas 23:43; Kapahayagan 20:6; 21:1-5.
Sa Paraisong daga na iyan, magkakaigwa nin sarong marahay na takot. Iyan an “pagkatakot ki Jehova.” (Talinhaga 1:7) Sa katunayan, maninigo na igwa kita kan takot na ini dawa ngonyan, huli ta iyan an hararom na paggalang asin pagtakig na may makuring takot na mapaanggot an Dios huli ta pinahahalagahan niato an saiyang mamomoton na kabootan asin karahayan. An takot na ini naghahagad nin daing pagdudang pagtitiwala ki Jehova asin nin maimbod na pagkuyog sa saiya.—Salmo 2:11; 115:11.
An makatatakot na mga pangyayari nagtatanda na huring mga aldaw na ini. Kun siring, kun mapatunayan niato an satong pagkamoot sa Dios, makakapaggayagaya kita imbes na magin matatakton. An mga hula sa Biblia nagpapaheling na an pagtapos nin Dios sa kinaban na ini harani na. Sasalidahan iyan kan ipinanugang bagong kinaban nin katanosan ni Jehova Dios. (2 Pedro 3:13) Tunay nanggad, sa irarom kan pamamahala kan Kahadean dai na mahahaloy magkakaigwa nin sarong kinaban na mayo na nin bakong marahay na takot.
[Kahon sa pahina 6]
AN PUWERSA NIN SASARONG KOPYA
SI Tomasz, solterong taga-Polandia, napasubo sa legal na problema na nagcausa saiya na dumulag sa nasyon. Sa laog nin anom na bulan nagparapakisakay sia sa bilog na Europa, na nagtotorog sa sarong tolda asin nagtatrabaho nin manlaenlaen. Mientras tanto, sarong hapot an parateng nasa isip nia: Ano an katuyohan nin buhay?
An hapot ni Tomasz nasimbag kan sia natawan nin sarong kopya nin An Torrengbantayan na Polaco. Binasa nia iyan nin nagkapirang beses asin minidbid nia na an magasin na ini igwa kan katotoohan na saiyang pinagpaparahanap. Nakisakay si Tomasz nin 200 kilometros pasiring sa sangang opisina kan Watch Tower sa Selters/Taunus, Alemania. Pag-abot kan Lunes na banggi, ilinuwas nia an saiyang magasin na Torrengbantayan asin nagsabi: “Boot ko na orog pang ipaliwanag nin saro an dapit sa kun ano an nasa magasin na ini. Ano an kaipuhan kong gibohon?”
Kan bangging idto, duwang Saksi ni Jehova an nakipag-olay ki Tomasz manongod sa katuyohan nin buhay, na ginagamit an Biblia bilang basihan sa saindang pag-orolay. Galagang makanood nin orog pa, nagburubuwelta si Tomasz sa sangang opisina aroaldaw kan semanang idto, na nag-aadal kan Biblia asin kan librong Puwede Kamong Mabuhay Sagkod Lamang sa Paraiso Digdi sa Daga.
Nagdesisyon si Tomasz na bumalik sa Polandia, dawa ngani puwede siang mapaatubang sa mga problema duman. Kaya, kan Biyernes, apat na aldaw pa sana pagkaabot sa sangang opisina sa Selters, nagbiyahe si Tomasz pasiring sa saiyang nasyon. Tolos-tolos na nagpoon siang mag-adal kaiba kan mga Saksi ni Jehova sa Polandia. Marikas na nag-oswag si Tomasz asin maigot na nagpoon na magtaram sa iba dapit sa saiyang nanonodan. Kan Oktubre 1993, apat na bulan pa sana pakatapos kan primero niang pagsongko sa Selters, nagpabautismo sia bilang saro sa mga Saksi ni Jehova.
An sasaro sanang kopya kan An Torrengbantayan nakatabang sa solterong ini na siyasaton an katuyohan nin buhay!
[Ritrato sa pahina 7]
Sa irarom kan pamamahala kan Kahadean ni Jesu-Cristo, an takot nungkang magigin lakop giraray sa kinaban