Mga Lingkod nin Dios—Sarong Organisado Asin Maogmang Banwaan
“Maogma an banwaan na an Dios iyo si Jehova!”—SALMO 144:15.
1, 2. (a) Taano si Jehova ta igwa nin katanosan na ibugtak an mga pamantayan para sa saiyang mga lingkod? (b) Ano an duwa sa mga karakteristiko ni Jehova na nangorognang maninigo niatong booton na arogon?
SI Jehova an Unibersal na Soberano, an makakamhan sa gabos na Dios, an Kaglalang. (Genesis 1:1; Salmo 100:3) Bilang siring, igwa sia nin katanosan na ibugtak an mga pamantayan sa paggawe para sa saiyang mga lingkod, na nakakaaram kan pinakamarahay para sa sainda. (Salmo 143:8) Asin sia an saindang Pangenot na Arogan na an mga kuwalidad kaipuhan nindang arogon. “Magin kamong mga paraarog sa Dios, bilang namomotan na mga aki,” an isinurat nin sarong apostol.—Efeso 5:1.
2 An sarong karakteristiko nin Dios na kaipuhan niatong arogon may koneksion sa organisasyon. Sia ‘bakong Dios nin karibarawan.’ (1 Corinto 14:33) Kun satong maingat na minamasdan an mga linalang nin Dios, napapahiro kitang magkonklusyon na sia an pinakaorganisadong Personahe sa uniberso. Alagad, an saro pang karakteristiko nin Dios na boot niang arogon kan saiyang mga lingkod iyo an saiyang kaogmahan, huling sia an “maogmang Dios.” (1 Timoteo 1:11) Kun siring, an saiyang abilidad sa pag-organisar tinitimbangan nin kaogmahan. An saro dai ipinapaorog sa ikararaot kan saro.
3. Paano ipinaheheling kan mabitoon na kalangitan an abilidad nin Dios sa pag-organisar?
3 An gabos na ginibo ni Jehova, magpoon sa pinakadakula sagkod sa pinakasadit, nagtatao nin ebidensia na sia Dios nin organisasyon. Horophoropa, halimbawa, an naheheling na uniberso. Iyan igwa nin rinibong bilyon na bitoon. Pero an mga ini dai winararak nin patibasang. An astropisikong si George Greenstein nagkomento na igwa nin “arogan sa pagkaorganisar kan mga bitoon.” An mga iyan inorganisar sa mga grupo na inaapod galaksia, na an iba igwa nin ginatos na bilyon na bitoon. Asin kinakarkulo na igwa nin binilyon na galaksia! An mga galaksia inorganisar man, na an nagkapira sa mga iyan (magpoon sa dikit sagkod sa pirang ribo) pinaggrupogrupo sa sarong cluster nin mga galaksia. Asin an mga cluster nin mga galaksia pinaghohonang inorganisar sa mas darakula pa nganing grupo na inaapod mga supercluster.—Salmo 19:1; Isaias 40:25, 26.
4, 5. Magtao nin mga halimbawa nin pagkaorganisar sa tahaw kan nabubuhay na mga bagay digdi sa daga.
4 An pambihirang pagkaorganisar sa mga linalang nin Dios naheheling sa gabos na lugar, bako sanang sa naheheling na kalangitan kundi pati digdi sa daga, na igwa kan manriboribong nabubuhay na bagay dian. Manongod kaini gabos, si Paul Davies, sarong propesor sa pisiko, nagsurat na an mga paramasid “namumungnan” sa “magayonon asin komplikadong pagkaorganisar kan pisikal na kinaban.”—Salmo 104:24.
5 Horophoropa an pirang halimbawa kan “komplikadong pagkaorganisar” na yaon sa nabubuhay na mga bagay. An seruhano sa sistema nin nerbiyos na si Joseph Evans nagsabi manongod sa hotok asin udog nin tawo: “An katunayan nin dakulang areglo haros nakalulunos.” Manongod sa mikroskopikong buhay na selula, an bakteriologong si H. J. Shaughnessy nagsabi: “An pagkakomplikado asin magayon na areglo kan mikrobiolohikong kinaban makangangalas an pagkahaman kaya iyan minalataw na kabtang kan sistemang itinalaga nin Dios.” Asin an biologo sa molekula na si Michael Denton nagsabi manongod sa henetikong kodigo (DNA) sa laog nin sarong selula: “Iyan mahusay na marhay kaya an gabos na impormasyon . . . na kaipuhan sa pagtalaan sa disenyo kan gabos na klase nin organismo na nag-eksister na kasuarin pa man sa planeta . . . ikakalaag sa sarong kutsarita asin igwa pa giraray nin lugar para sa gabos na impormasyon sa kada librong isinurat kasuarin pa man.”—Helingon an Salmo 139:16.
6, 7. Anong pagkaorganisar an ipinaheheling sa tahaw kan espiritung mga linalang, asin paano sinda nagpapahayag nin pag-apresyar sa saindang Kaggibo?
6 Bako sanang inoorganisar ni Jehova an saiyang materyal na mga linalang kundi inorganisar man nia an saiyang espiritung mga linalang sa langit. Ipinapaaram sato kan Daniel 7:10 na an mga anghel na may bilang na ‘manampulong ribo sa manampulong ribo padagos na nagtitirindog sa atubangan ni Jehova.’ Sanggatos na milyon na makapangyarihan na espiritung linalang an presente, na an lambang saro asignado sa angay na trabaho saiya! Makangangalas na isipon an abilidad na siertong kaipuhan sa pag-organisar kan siring kadakol na bilang. Angay nanggad, an Biblia nagsasabi: “Omawa nindo si Jehova, O kamong mga anghel nia, makosog, na nag-ootob kan saiyang tataramon, paagi sa paghinanyog sa tingog kan saiyang tataramon. Omawa nindo si Jehova, kamo gabos na hukbo [nin mga anghel] nia, kamong mga ministro nia, na naggigibo kan saiyang kabotan.”—Salmo 103:20, 21; Kapahayagan 5:11.
7 Kanigoan kagayon kan pagkaorganisar asin pagkahusay kan mga gibo kan Kaglalang! Bakong makangangalas na an makokosog na espiritung linalang sa langitnon na rona nagpapahayag sa makangingirhat asin mapagpasakop na paagi: “Angay ka, Jehova, na samong Dios, na mag-ako kan kamurawayan asin dangog patin kapangyarihan, huli ta linalang mo an gabos na bagay, asin huli sa saimong kabotan an mga iyan naglataw asin nalalang.”—Kapahayagan 4:11.
8. Anong mga halimbawa an nagpapaheling na inoorganisar ni Jehova an saiyang mga lingkod digdi sa daga?
8 Inoorganisar man ni Jehova an saiyang mga lingkod digdi sa daga. Kan ipaabot nia an Delubyo kan kaaldawan ni Noe kan 2370 B.C.E., si Noe asin an pitong iba pa nakaligtas sa Baha bilang sarong organisasyon nin pamilya. Sa Pagkaligtas kan 1513 B.C.E., ilinuwas ni Jehova an nagkapirang milyon kan saiyang banwaan sa kaoripnan sa Egipto asin tinawan sinda nin detalyadong kodigo nin mga pagboot tanganing organisaron an saindang pan-aroaldaw na mga aktibidad asin pagsamba. Asin kan huri, sa Dagang Panuga, manampulong ribo sa sainda an inorganisar para sa espesyal na paglilingkod sa templo. (1 Cronica 23:4, 5) Kan enot na siglo, an Kristianong mga kongregasyon inorganisar sa irarom kan paggiya nin Dios: “Itinao nia an nagkapira bilang mga apostol, an nagkapira bilang mga propeta, an nagkapira bilang mga paraebanghelyo, an nagkapira bilang mga pastor asin paratokdo, manongod sa paghusay liwat kan mga banal, manongod sa gibohon nin paglingkod.”—Efeso 4:11, 12.
Organisado Man an mga Lingkod sa Modernong Aldaw
9, 10. Paano inorganisar ni Jehova an saiyang banwaan sa satong panahon?
9 Kaagid kaiyan, inorganisar ni Jehova an saiyang mga lingkod sa modernong aldaw tanganing epektibo nindang magibo an saiyang gibohon para sa satong aldaw—an paghuhulit kan maogmang bareta kan Kahadean bago nia tapuson an presenteng maraot na palakaw na ini nin mga bagay. (Mateo 24:14) Horophoropa an kalabot sa panglobong gibohon na ini asin kun gurano kaimportante an marahay na pag-organisar. Minilyon na lalaki, babae, asin aki an sinasanay sa pagtokdo sa iba kan mga katotoohan sa Biblia. Tanganing makatabang sa pagsasanay na ini, dakol na bilang nin Biblia asin basado sa Biblia na publikasyon an iniimprenta. Tara, an kada luwas ngonyan kan An Torrengbantayan igwa nin iniimprentang labing 16 milyones sa 118 tataramon, asin an Awake! nin mga 13 milyones sa 73 na tataramon. Haros gabos na luwas durungan na iniimprenta tanganing haros gabos na lingkod ni Jehova durungan na mag-ako nin pararehong impormasyon.
10 Dugang pa, an labing 73,000 na kongregasyon kan mga Saksi ni Jehova sa bilog na kinaban inorganisar tanganing regular na magtiripon para sa pagtotokdo sa Biblia. (Hebreo 10:24, 25) Igwa man nin rinibong mas darakulang pagtiripon—pansirkitong mga asamblea asin pandistritong mga kombension—kada taon. Igwa nin dakol na panglobong pagtogdok nin bago o pinakarhay na mga Kingdom Hall, Assembly Hall, erokan na Bethel, asin mga pasilidad para sa pag-imprenta nin literatura sa Biblia. Igwa nin mga paadalan para sa orog pang pagsasanay nin mga paratokdo sa Biblia, arog baga kan Paadalan sa Biblia kan Watchtower sa Gilead para sa mga misyonero asin an Paadalan sa Paglilingkod Bilang Payunir, na ginigibo sa mga kadagaan sa bilog na globo.
11. Anong pakinabang sa ngapit an makakamtan gikan sa pakanood nin marahay na pag-organisar ngonyan?
11 Inorganisar nanggad na marhay ni Jehova an saiyang banwaan digdi sa daga tanganing ‘lubos na maotob an saindang ministeryo,’ na tinatabangan kan naglilingkod na mga anghel nia! (2 Timoteo 4:5; Hebreo 1:13, 14; Kapahayagan 14:6) Paagi sa pagtotokdo ngonyan sa saiyang mga lingkod sa mga paagi nin marahay na pag-organisar, may iba pang ginigibo an Dios. An saiyang mga lingkod inaandam na marhay tanganing kun sinda makaligtas sa katapusan kan palakaw na ini nin mga bagay, sinda magigin organisado na sa pagpoon nin buhay sa bagong kinaban. Dangan, sa organisadong paagi sa irarom kan paggiya ni Jehova, poponan nindang itogdok an panglobong Paraiso. Sinda magigin man andam na marhay sa pagtokdo kan detalyadong mga kahagadan nin Dios para sa buhay sa binilyon na tawong bubuhayon liwat hale sa mga gadan.—Isaias 11:9; 54:13; Gibo 24:15; Kapahayagan 20:12, 13.
Organisado Pero Maogma
12, 13. Taano ta makasasabi kita na boot ni Jehova na magin maogma an saiyamg banwaan?
12 Minsan ngani si Jehova sarong pambihirang trabahador asin pinakamahusay na organisador, sia bakong daing simpatiya, estrikto, o dai isinasaboot an ginigibo. Imbes, sia sarong mainiton, maogmahon na Personahe na may pagmakolog sa satong kaogmahan. “Sia may pagmakolog sa saindo,” an ipinahahayag kan 1 Pedro 5:7. Maheheling niato an saiyang pagmakolog asin an saiyang pagmawot na magin maogma an saiyang mga lingkod sa saiyang ginibo para sa mga tawo. Halimbawa, kan lalangon nin Dios an sangkap na lalaki asin babae, ibinugtak nia sinda sa sarong paraiso na may kaogmahan. (Genesis 1:26-31; 2:8, 9) Tinawan nia sinda kan gabos na kaipuhan ninda tanganing gibohon sindang nangongorog kaogma. Pero nawara ninda iyan gabos paagi sa pagrebelde. Bilang resulta kan saindang kasalan, nagmana kita nin pagkabakong sangkap asin kagadanan.—Roma 3:23; 5:12.
13 Minsan ngani bakong sangkap ngonyan, kitang mga tawo puwede pa giraray na makanompong nin kaogmahan sa ginibo nin Dios. Kadakol kan bagay na nagtatao sato nin kaogmahan—darakulang bukid, magagayon na danaw, salog, kadagatan asin baybayon; makolor, mahamot na mga burak asin iba pang tinanom na daing sagkod an pagkalaenlaen; abundang masisiram na kakanon; magayon paghelingon na mga pagsolnop kan aldaw na dai kita napapagal na pagmasdan; an mabitoon na kalangitan na ikinaoogma niatong paghorophoropon kun banggi; an mga linalang na hayop na kadakol kan pagkalaenlaen asin an makawiwiling mga ogbon sa saindang nakaoogmang mga pagkawat; nakaiinspirar na musika; interesante asin kapakipakinabang na trabaho; marahay na mga katood. Malinaw na an Saro na nag-areglo kan siring na mga bagay sarong maogmang indibiduwal na ikinaoogma an pagpapaogma sa iba.
14. Anong pagkatimbang an hinahagad sato ni Jehova sa pag-arog sa saiya?
14 Kaya, an organisado sanang kahusayan bakong an boot ni Jehova. Boot man nia na magin maogma an saiyang mga lingkod, kun paanong sia maogma. Habo niang panatiko nindang inoorganisar an mga bagay sa ikararaot kan saindang kaogmahan. An mga lingkod nin Dios dapat na timbangan nin kaogmahan an mga abilidad sa pag-organisar, siring sa saiyang ginigibo, huli ta kun saen an saiyang makapangyarihan na banal na espiritu, igwa nin kaogmahan. Tunay nanggad, ipinaheheling kan Galacia 5:22 na an ikaduwang bunga kan banal na espiritu nin Dios na naghihiro sa saiyang banwaan iyo an “kagayagayahan.”
An Pagkamoot Nagpapaluwas nin Kaogmahan
15. Taano an pagkamoot ta mahalagang marhay sa satong kaogmahan?
15 Interesanteng gayo na mangnohon na an Biblia nagsasabi: “An Dios pagkamoot.” (1 Juan 4:8, 16) Nungka iyan na nagsasabing: “An Dios organisasyon.” An pagkamoot iyo an pangenot na kuwalidad nin Dios, asin kaipuhan na arogon iyan kan saiyang mga lingkod. Iyan an dahelan na an enot na bunga kan espiritu nin Dios na nalilista sa Galacia 5:22 iyo an “pagkamoot,” na “kagayagahayan” an sunod. An pagkamoot nagpapaluwas nin kagayagahayan. Kun inaarog niato an pagkamoot ni Jehova sa satong relasyon sa iba, masunod an kaogmahan, huli ta an mamomoton na mga tawo maogmang mga tawo.
16. Paano ipinaheling ni Jesus an kahalagahan nin pagkamoot?
16 An kahalagahan nin pag-arog sa diosnon na pagkamoot ginibong lataw sa mga katokdoan ni Jesus. Sia nagsabi: “Siring sa pagkatokdo sa sako kan Ama itinataram ko an mga bagay na ini.” (Juan 8:28) Ano, nangorogna, an itinokdo ki Jesus na itinokdo man nia sa iba? Na an duwang pinakadakulang togon iyo na kamotan an Dios asin kamotan an kataed. (Mateo 22:36-39) Ipinaheling ni Jesus sa halimbawa an pagkamoot na iyan. Sia nagsabi: “Ako namomoot sa Ama,” na pinatunayan iyan paagi sa paggibo kan kabotan nin Dios sagkod sa kagadanan. Asin ipinaheling nia an saiyang pagkamoot sa mga tawo paagi sa kagadanan para sa sainda. Sinabihan ni apostol Pablo an mga Kristiano sa Efeso: ‘Si Cristo namoot sa saindo asin itinao an saiyang sadiri para sa saindo.’ (Juan 14:31; Efeso 5:2) Kaya, sinabihan ni Jesus an saiyang mga parasunod: “Ini an sakong togon, na kamo magkaminorootmootan siring kan pagkamoot ko sa saindo.”—Juan 15:12, 13.
17. Paano ipinaheling ni Pablo na mahalaga an pagpahayag nin pagkamoot sa iba?
17 Ipinahayag ni Pablo kun gurano kahalaga kan diosnon na pagkamoot na ini paagi sa pagsabi: “Kun ako magtaram sa dila nin mga tawo asin nin mga anghel alagad mayong pagkamoot, garo ako sarong metal na nagtatanog o simbalo na nagdadaging. Asin kun ako igwa kan balaog nin paghuhula asin aram ko an gabos na tagong hilom asin gabos na kaaraman, asin kun yaon sa sako an gabos na pagtubod tanganing mapabalyo an mga bukid, alagad mayo nin pagkamoot, ako dai nin halaga. Kun itao ko an gabos kong rogaring tanganing pakakanon an iba, asin kun idolot ko an sakong hawak, tanganing ako makapaghambog, alagad mayo ako nin pagkamoot, mayo man lamang ako nin pakinabang. . . . Nagdadanay an pagtubod, paglaom, pagkamoot, an tolong ini; alagad an nangongorog kaini iyo an pagkamoot.”—1 Corinto 13:1-3, 13.
18. Ano an satong malalaoman ki Jehova na nakakadagdag sa satong kaogmahan?
18 Kun satong inaarog an pagkamoot ni Jehova, masasarigan niato an saiyang pagkamoot sa sato, dawa kun kita nakakagibo nin mga sala, huli ta sia “Dios na maheherakon asin maugayon, maluway sa pagkaanggot asin mayaman sa mamomoton na kabootan asin katotoohan.” (Exodo 34:6) Kun kita sinserong nagsosolsol kun kita nakakagibo nin mga sala, an Dios dai naggigirumdom kaini kundi mamomoton na pinapatawad kita. (Salmo 103:1-3) Iyo, “si Jehova malomoy na gayo sa kapadangatan asin maheherakon.” (Santiago 5:11) An pakaaram kaini nakakokontribuwir sa satong kaogmahan.
Limitadong Kaogmahan Ngonyan
19, 20. (a) Taano ta bakong posible ngonyan an lubos na kaogmahan? (b) Paano ipinaheheling kan Biblia na puwede kitang magkaigwa nin limitadong kaogmahan sa panahon na ini?
19 Minsan siring, posible daw na magin maogma ngonyan, mantang kita nabubuhay sa huring mga aldaw kan pano nin krimen, madahas, inmoral na kinaban na ini na sakop ni Satanas, kun saen napapaatubang kita sa helang asin kagadanan? Siyempre, dai niato puwedeng laoman ngonyan an sokol nin kaogmahan na mag-eeksister sa bagong kinaban nin Dios, siring sa ihinuhula kan saiyang Tataramon: “Uya ako naglalalang nin bagong kalangitan asin sarong bagong daga; asin an dating mga bagay dai na magigirumdoman, ni masabong pa iyan sa puso. Alagad ta maggayagaya kamo, kamong banwaan, asin mag-orogma kamo sagkod lamang sa sakong linalalang.”—Isaias 65:17, 18.
20 An puwedeng kamtan ngonyan kan mga lingkod nin Dios iyo an limitadong kaogmahan huli ta aram ninda an saiyang kabotan asin igwa nin tamang kaaraman dapit sa makangangalas na mga bendisyon na madali nang dumatong sa saiyang paraisong bagong kinaban. (Juan 17:3; Kapahayagan 21:4) Iyan an dahelan na an Biblia makakasabi: “O Jehova kan mga hukbo, maogma an tawo na nananarig sa saimo,” “maogma an gabos na natatakot ki Jehova, na naglalakaw sa saiyang mga dalan,” “maogma an mga mahoyo, mantang mamanahon ninda an daga.” (Salmo 84:12; 128:1; Mateo 5:5) Kaya, sa ibong kan presenteng masakit na mga kamugtakan na kaipuhan niatong paglabanan, puwede kitang magkaigwa nin dakulang sokol nin kaogmahan. Dawa kun may mga maraot na mangyari sa sato, dai kita nagigin mamondo na arog kan pagmondo kan mga dai nakakamidbid ki Jehova asin mayo kan paglaom na buhay na daing sagkod.—1 Tesalonica 4:13.
21. Paano an pagboluntaryo kan saindang sadiri nakakokontribuwir sa kaogmahan kan mga lingkod ni Jehova?
21 An kaogmahan nakakamtan man kan mga lingkod ni Jehova huli ta naggagamit sinda nin panahon, kosog, asin kayamanan sa pagtotokdo sa iba kan mga katotoohan sa Biblia, nangorogna sa mga tawo na ‘nag-aaragagha asin nag-aaragrangay huli sa gabos na kabaldean’ na ginibo sa kinaban ni Satanas. (Ezequiel 9:4) An Biblia nagsasabi: “Maogma an siisay man na minahirong may konsiderasyon sa dukha; sa aldaw nin kapahamakan si Jehova magtatao sa saiya nin dudulagan. Si Jehova mismo an magbabantay sa saiya asin magliligtas sa saiya. Sia ipahahayag na maogma sa daga.” (Salmo 41:1, 2) Siring kan sabi ni Jesus, “igwang orog na kaogmahan sa pagtao kisa pag-ako.”—Gibo 20:35.
22. (a) Kun manongod sa kaogmahan, ipaheling an kalaenan kan mga lingkod nin Dios duman sa mga dai naglilingkod sa saiya. (b) Huli sa anong espesyal na dahelan na maninigo niatong laoman na magin maogma?
22 Kaya minsan ngani an mga lingkod nin Dios dai makakalaom nin nangongorog na kaogmahan sa presenteng panahon na ini, puwede sindang magkamit nin kaogmahan na dai nakakamtan kan mga dai naglilingkod sa Dios. Si Jehova nagpahayag: “Uya! An sakong mga lingkod magkukurahaw sa kagayagayahan huli sa marahay na kamugtakan kan puso, alagad kamo mag-aaragrangay huli sa kakologan sa puso asin kamo mag-uurungal huli sa pagkalaglag kan espiritu.” (Isaias 65:14) Siring man, an mga naglilingkod sa Dios igwa nin espesyal na marhay na dahelan na maogma ngonyan—igwa sinda kan saiyang banal na espiritu na “itinao nin Dios sa mga nagkukuyog sa saiya bilang poon.” (Gibo 5:32) Asin girumdomon, kun saen an espiritu nin Dios, igwa nin kaogmahan.—Galacia 5:22.
23. Ano an satong pag-oolayan sa sunod na pag-aradal niato?
23 Sa organisasyon kan mga lingkod nin Dios ngonyan, may importanteng kabtang an “kamagurangan na lalaki,” an mga magurang, na nangengenot sa mga kongregasyon, na nakakokontribuwir sa kaogmahan kan banwaan ni Jehova. (Tito 1:5) Paano maninigong mansayon kan mga ini an saindang mga paninimbagan asin an saindang relasyon sa saindang espirituwal na mga tugang na lalaki asin babae? Ipapaliwanag ini kan satong masunod na artikulo.
Paano Nindo Sisimbagon?
◻ Paano nagpapatotoo an linalang sa pagigin organisado ni Jehova?
◻ Paano inorganisar ni Jehova an saiyang mga lingkod kan nakaagi asin sa presente?
◻ Anong pagkatimbang an boot ni Jehova na ipaheling niato?
◻ Gurano kahalaga kan pagkamoot sa satong kaogmahan?
◻ Anong klaseng kaogmahan an malalaoman niato sa satong panahon?
[Picture Credit Line sa pahina 10]
Itaas: Sa karahayan nin boot kan ROE/Anglo-Australian Observatory, retrato ni David Malin