Ano an Kahulogan sa Saindo kan Navidad?
Ano an isisimbag nindo? An Navidad (1) panahon na makaibanan an saindong pamilya; (2) panahon para sa mga parti; (3) relihiyosong panahon; (4) panahon nin tension; (5) panahon nin paggirumdom kan mga nakaagi; (6) panahon nin hayag na komersialismo.
MINSAN ngani tibaad nakabibigla, sa labing 1,000 katawo na sinurbey sa Britania, 6 porsiento sana an ibinilang an Navidad na sa pangenot relihiyosong okasyon. Kabaliktaran, 48 porsiento an sa pangenot ibinilang an Navidad na panahon na makaibanan an saindang pamilya. An totoo, dakol an naniniwala na iyan espesyal na panahon para sa mga aki. Arog nin kadaklan, an sarong 11 anyos na aking babae, kan hapoton kun ano an pinakagusto nia manongod sa Navidad, nagsimbag: “An kaalingan, pakamate nin kaogmahan, [asin] pagregalo.” Minaoyon an The Making of the Modern Christmas na “an pinakamakosog na idinodoon nin . . . ‘tradisyonal’ na Navidad daing duwa-duwa na an harong, pamilya asin partikularmente an mga aki.”
Pero nangorogna sa Kakristianohan sa solnopan na an Navidad pampamilyang okasyon, na an magpaparyentes nagtitiripon tanganing magrinegalohan. Sa mga nasyon na dominado kan Iglesya Ortodokso sa Sirangan, orog na idinodoon nin mga tawo an Pasko; pero, an Navidad sa parate panahon nin bakasyon.
Sarong “Negosyo”
An Navidad “nag-agi sa proseso nin pambihirang . . . komersialisasyon,” sabi kan The New Encyclopædia Britannica. Tibaad ini pinakatotoo sa Hapon.
“An mga Hapones hinale na an gabos na pagsaginsagin nin relihiyon asin ginibo nang biyong negosyo an Navidad,” an bareta kan Daily Record sa Washington. An Navidad sa Hapon, idinugang kaiyan, “dakulang selebrasyon na idinodoon na marhay an komersialismo asin kadikiton an pagdodoon sa relihiyosong kabtang.”
Minsan sa dakol na Kristiano daang nasyon, an “relihiyosong kabtang” na ini parateng depisil na marisa. Kaidtong mga 40 taon na an nakaagi, an sarong pulyeto na kontra sa Navidad nag-agrangay: “An Navidad suportado kan kinaban nin komersio. Iyan an kadarudakulaing panahon nin pagkakuwarta sa taon. An mga negosyanteng naghihingakong Kristiano hinahalathalat an Navidad, bakong para ki Cristo, kundi para sa pinansial na ganansia.” Abaa katotoo kan mga tataramon na iyan ngonyan! Sa dakol na kadagaan, bihira niatong aboton an kapinonan kan ultimong tolong bulan kan taon na dai niato nadadangog an mga pagirumdom kun pira na sanang aldaw an natatada para sa pagbakal nin mga regalo para sa masunod na Navidad. Minakosog an negosyo sa paghinanapos kan taon, na sagkod sa un-kuwarto kan taonan na benta nin mga tindahan an minaabot sa panahon nin Navidad.
Ano man an kahulogan saindo ngonyan kan Navidad, tibaad iniisip nindo kun paano iyan nagpoon. An totoo, suportado daw kan Biblia an pagreregalo kun Navidad? Talaga daw na Kristiano an mga selebrasyon nin Navidad ngonyan? Helingon niato.
[Picture Credit Line sa pahina 2]
Tutob: Thomas Nast/Dover Publications, Inc., 1978