Kun Noarin Ninda Iyan Binabasa Asin Kun Paano Sinda Nakikinabang
Amay na Aga:
An sarong mag-agom, na pareho nagtatrabaho sa luwas kan saindang harong, nagdesisyon na amayan sana nin dies minutos an saindang pagbangon kada aga asin gamiton an oras na iyan sa pagbasa kan Biblia na magkaibanan bago maghidaling lumuwas sa harong. An saindang binabasa nagtatao nin basihan para sa maogmang pag-oolay paghale ninda sa harong.
An sarong magurang sa kongregasyon sa Nigeria ginagamit an programang iiniskedyul para sa Teokratikong Paadalan sa Pagmiministro bilang basihan para sa pampamilyang pagbasa sa Biblia sa saiyang pamilya. Binabasa ninda an sarong kabtang kaiyan kada aldaw pakatapos nindang pag-olayan an teksto kan aldaw, na parate sa aga. Hinahagad sa mga aki na magpasarosaralida sa pagbasa kan iinasignar na kabtang. Dangan pinapahapot sinda dapit sa mga bersikulong binasa.
An sarong agom na babae sa Hapon nakakabasa kan bilog na Biblia sarong beses kada taon poon kan 1985. An saiyang programa magbasa sa laog nin 20 sagkod 30 minutos poon alas 5:00 n.a. kada aldaw. Mapadapit sa mga pakinabang, sia nagsabi: “Napakosog an sakong pagtubod. Tinatabangan ako kaiyan na lingawan an sakong helang asin magkonsentrar sa paglaom sa Paraiso.”
An sarong tugang na babae na 30 taon nang payunir pero an agom bakong Saksi minabangon nin alas singko kada aga tanganing magbasa sa Biblia. An saiyang programa naghahagad nin pagbasa nin mga apat na pahina sa Hebreong Kasuratan, sarong kapitulo sa Kristianong Griegong Kasuratan, asin sarong bersikulo sa Talinhaga. Nababasa nia an bilog na Biblia kada taon poon kan 1959. Sia nagsabi: “Bilang resulta kan sakong pagbasa, namamatean kong namomotan ako ni Jehova . . . Nag-aako ako nin pagpakosog, karangahan, asin pagtatanos.” Idinagdag nia: “An pagbasa kan Biblia garo rinoroskasan ni Jehova an sakong buhay kada aldaw.”
An sarong tugang na babae na nakanood kan katotoohan sa sarong nasyon kun saen ipinangangalad an aktibidad kan mga Saksi ni Jehova igwa man nin agom na kontra sa saiyang mga paniniwala. Nahihimo niang basahon an Biblia poon Lunes sagkod Biyernes, sa pag-oltanan nin alas 6:00 asin alas 7:00 n.a. Nagtao ini sa saiya nin panlaog na kosog. Sa paghorophorop kun paano nakaapektar sa saiya an saiyang pagbasa, sia nagsabi: “Nanonodan tang mamotan si Jehova asin si Jesus asin mamuhay na maogma, minsan may mga problema asin kadepisilan, sa pakaaram na an mga panuga ni Jehova dai nasusudya.”
An sarong tugang na babae na nag-atender sa Paadalan sa Paglilingkod Bilang Payunir determinado na kuyogon an itinaong hatol duman na ugaleon aroaldaw an pagbasa sa Biblia. Sa primero, nagibo nia iyan sa pag-oltanan nin alas 5:00 asin alas 6:00 n.a. Kan an pagliwat nin trabaho nakaolang kaiyan, buminalyo sia sa pag-oltanan nin alas 9:00 asin alas 10:00 n.b. Kan maglataw an iba pang depisil na mga situwasyon, sia nagsabi, “Danay kong liniliwat an sakong iskedyul sono sa mga kamugtakan.”
Sa Hapon:
An magtugang sa laman na babae na miembro kan pamilyang Bethel sa Brazil nakaugalean an pagbasa kan Biblia na magkaibanan sa laog nin mga 20 minutos kada aldaw pakapangodto. Mga 25 beses na nindang nabasa an bilog na Biblia; pero nagsurat sinda: “Permi kaming may bagong nakukua, kaya an pagbasa sa Biblia nungkang nagigin nakakauyam.”
An sarong dai pang agom na tugang na babae sa Hapon nakarealisar na minsan ngani pinadakula bilang Saksi, dai siang gayo tatao kan Kasuratan; kan sia magin payunir, nagdesisyon siang regular na basahon an Biblia. Ginigibo nia ngonyan an saiyang pagbasa para sa Teokratikong Paadalan sa Pagmiministro mantang nagbibiyahe pasiring sa ospital para sa pagpabolong sarong aldaw kada semana. Pakalihis kaini, sa harong, naggigibo sia nin dugang pang pagsiyasat. Sa paghinanapos kan semana, binabasa pa nia an Biblia, na nagpipili nin mga libro sono sa pagkasunodsunod kan pagkasurat kaiyan.
An sarong 13-anyos na tolong beses nang nabasa an bilog na Biblia nagbabasa ngonyan nin sarong kapitulo kada aldaw pagpuli nia sa harong hale sa eskuwelahan. Ini, sabi nia, nakatabang sa saiya “na makamate nin orog na pagkamoot ki Jehova.”
An sarong Saksi na sibot-sibot an iskedyul bilang trabahador, magurang sa kongregasyon, agom, asin ama naghihinanyog sa mga audiocassette sa Biblia mantang lunad sa tren pasiring sa trabaho. Dangan sa harong ginigibo nia an saiyang personal na pagbasa kan iyo man sanang materyal.
Apuwera kan saiyang personal na pagbasa, an sarong payunir sa Pransia naghihinanyog sa mga audiocassette sa Biblia kun nagluluto, kun nagmamaneho, kun nasa masakit na mga panahon, o para sana sa kaalingan.
Nagigirumdoman nin sarong 21-anyos na payunir sa Hapon na an saiyang ina nag-insister na may ilaog sia sa isip na espirituwal kada aldaw, asin aroaldaw siang nagbabasa kan Biblia, minsan ngani bakong perming sa parehong oras, poon kan sia tres anyos. Pakabasa nia kan kabtang na pinili nia para sa aldaw, sinisierto nia na basahon liwat an pangenot na mga bersikulo, dangan nagtatao sia nin nagkapirang minuto sa pagrepaso sa isip kan saiyang binasa.
An saro pang Saksi, sarong payunir, mga sampulong beses nang nabasa an bilog na Biblia sa nakaaging 12 taon. An saiyang agom na lalaki daing pagtubod, kaya iiniiskedyul nia an saiyang pagbasa pagkahapon.
Banggi:
An sarong magurang sa kongregasyon asin regular payunir sa Hapon na nagbabasa sa saiyang Biblia kada banggi bago magtorog walong taon nang ginigibo ini. Sia nagsabi: “Partikularmenteng nawiwili ako sa mga teksto na nagpaparisa kun paano si Jehova nag-iisip, kun ano an saiyang saboot manongod sa mga bagay, asin kun paano nia inaatubang an mga situwasyon. Paagi sa paghorophorop sa mga tekstong ini, natabangan ako na isapuso an kaisipan ni Jehova asin tabangan an sakong Kristianong mga tugang na lalaki asin babae patin an mga miembro kan sakong pamilya.”
An sarong magurang sa kongregasyon sa Pransia nagbabasa kan Biblia sa laog nin sarong oras kada banggi poon kan 1979. Parate na igwa sia nin lima o anom na traduksion sa atubangan nia para sa pagkomparar. Sinabi nia na an saiyang maingat na pagbasa nakatabang sa saiya na mamansayan “kun paano iaaplikar an kaaraman sa Biblia sa aroaldaw na mga situwasyon.” Nagpangyari man ini sa saiya na magin mas epektibo kun nagtatao nin hatol hale sa Kasuratan.
Sa laog kan nakaaging 28 taon, an sarong tugang na lalaki sa Nigeria ginibong ugale na basahon kun banggi an teksto sa Kasuratan na yaon sa Pagsiyasat sa Kasuratan Aroaldaw na pag-oolayan pagkaaga. Kadungan kaiyan, binabasa nia an bilog na kapitulo sa Biblia na kinuanan kan teksto. Kan makaagom na sia, ipinadagos nia an ugaleng ini, na binabasa asin ipinakikipag-olay an materyal sa saiyang agom.
An sarong tin-edyer na an mga magurang bakong Saksi ginibong ugale na magbasa sa laog nin lima sagkod sampulong minuto kada banggi bago magtorog. Mahalagang mga minuto iyan para sa saiya, asin namimibi sia bago asin pakatapos magbasa. Pasohan nia na aramon an mensahe na ipinasurat ni Jehova sa kada saro kan mga kagsurat kan Biblia.
An sarong may agom nang tugang na lalaki, na naglilingkod sa Bethel, nagsabi na nababasa nia an Biblia sarong beses kada taon sa laog kan nakaaging walong taon. Nagbabasa sia sa laog nin 20 sagkod 30 minutos bago magtorog. Dawa kun pagalon sia, nanompongan nia na kun matotorog sia na dai nagbasa, dai sia napapatorog. Kaipuhan siang magbuhat asin asikasohon an espirituwal na pangangaipong iyan.