Nagigirumdoman daw Nindo?

Naogma daw kamo sa pagbasa kan dai pa sana nahaloy na mga luwas kan An Torrengbantayan asin The Watchtower? Kun iyo, magigin interesante saindo na girumdomon an minasunod:

▫ Puede daw na makamtan an katotoohan dapit sa relihion?

Si Jesu-Cristo nagsabi: “Mamimidbid nindo an katotoohan, asin bubutasan kamo kan katotoohan.” (Juan 8:32) Bako sanang idinoon ni Jesus na an katotoohan puedeng makamtan kundi ipinaheling nia na kaipuhan an pakakua kaiyan sa satong pagsamba sa Dios. Sinabihan nia an sarong Samaritana: “An tunay na mga parasamba masamba sa Ama sa espiritu asin katotoohan.” (Juan 4:23)​—w-BI 4/15, pahina 5.

▫ Siisay si Robert Estienne, asin paano nia iwinalat an saiyang marka?

Si Robert Estienne sarong paraimprenta na nabuhay kan ika-16 na siglo. Idinusay nia an saiyang buhay sa pagpublikar kan Banal na Kasuratan asin nagmaigot na ihayag an mga tataramon kan Biblia sono sa orihinal na pagkasurat kaiyan. An saiyang sistema sa pagbanga kan teksto kan Biblia sa may numerong mga bersikulo iyo an sistema na ginagamit sa pankagabsan ngonyan.​—w-BI 4/15, pahina 10, 14.

▫ Paano kita nakikinabang sa aroaldaw na pagbasa kan Biblia?

An Kasuratan danay na nagkakaigwa nin bagong kahulogan para sa sato, asin an mga hula mapadapit sa huring mga aldaw nagigin orog na kahangahanga sa liwanag kan satong naheling, nadangog, asin personal na naeksperyensiahan. Mantang naghihiwas an satong sadiring eksperyensia sa buhay asin nakapanggagana kita sa mga problema, mas lubos niatong nasasabotan an hatol kan Biblia. (Talinhaga 4:18)​—w-BI 5/1, pahina 14.

▫ Paano magigirumdoman an mga teksto sa Biblia?

Mantang binabasa nindo an Biblia, markahan an piniling mga teksto na boot nindong girumdomon, o kopyahon iyan sa mga kard asin ibugtak an mga kard na ini sa lugar na maheheling nindo iyan aroaldaw. Mantang pinoprobaran nindong tuomon an mga bersikulo, maghorophorop dian asin gamiton iyan. Dai nindo pagprobaran na magtuom tolos nin kadakol, tibaad saro o duwa sana kada semana.​—w-BI 5/1, pahina 16, 17.

▫ Anong impormasyon an laog kan Ebanghelyo ni Lucas na dagdag pa sa itinao kan ibang kagsurat nin Ebanghelyo?

Minsan ngani an dakol na isinurat ni Lucas nakaaagid sa tala ni Mateo, an 59 porsiento laen man. Si Lucas nagsurat nin anom na milagro na sa saiya sanang libro makukua, asin nagbareta sia nin labing doble kan bilang na iyan sa mga ilustrasyon ni Jesus na dai isinaysay kan iba pang kagsurat nin Ebanghelyo.​—w-BI 5/15, pahina 12.

▫ Anong pambihirang kilyab kan liwanag nin katotoohan an ihinayag kan 1935?

Kan taon na iyan nasabotan kan banwaan ni Jehova na an dakulang kadaklan na nasambitan sa Kapahayagan 7:​9, 14 nanonongod, bakong sa sarong sekondaryong langitnon na grupo, kundi sa mga an paglaom digdi sa daga. (Juan 10:16)​—w-BI 5/15, pahina 20.

▫ Sa anong praktikal na paagi na mararanga niato an mga nagadanan?

Maghinanyog. Tumao nin pag-asegurar. Magin andam na tumabang. Magboluntaryo kun angay. Magpadara nin nakararangang surat o kard. Mamibi kaiba ninda. (Santiago 5:16) Padagos na tabangan sinda.​—w-BI 6/1, pahina 13, 14.

▫ Ano an magigibo nin espirituwal na mga tugang na lalaki asin babae na matabangan na makatagal an mga nag-iistar sa mga pamilyang nababanga sa relihion?

Regular na magtaram sa sainda nin nakapakokosog, positibo, asin nakararangang mga tataramon. (1 Tesalonica 5:14) Ini nagseserbing garo panrepresko sa saindang isip asin hawak. Kun praktikal asin angay, iiba sinda sa saindong teokratiko asin sosyal na mga aktibidad. Iiba sinda sa saindong mga pamibi. (Roma 1:9; Efeso 1:16)​—w-E 6/1, pahina 29.

▫ Anong mga balos an nakakamtan gikan sa pagpapasensia mantang nakikakabtang sa ministeryo sa langtad?

An pasensia nakatatabang sa parahayag kan Kahadean na tagalan an ano man na pagkaindiperente o pagkontra. Imbes na makidiskutiran sa anggot na mga kagharong, an mapasensiang mga ministro makatatao nin mahoyong simbag o toninong na mahale, sa siring an katoninongan asin kagayagayahan nareretener. (Mateo 10:​12, 13) Dagdag pa, an mga arog-karnero mapararani sa mensahe kan Kahadean.​—w-BI 6/15, pahina 12.

▫ Taano ta mahalagang marhay an pakaaram sa katotoohan sa Biblia?

An pakaaram sa katotoohan minakalda sa sato hale sa mga kaputikan, salang paniniwala, asin superstisyon. Kun namumuhay kita kaoyon kaiyan, an katotoohan nakapakokosog sato na tagalan an mga kasakitan asin minomotibar kita sa paglaom na nagpapangyari sa sato na magdanay na dai nahihiro sa irarom nin pagbalo.​—w-BI 7/1, pahina 8.

▫ Sa anong pangenot na paninimbagan sinalidahan kan linahidan na Kristianong kongregasyon an Israel sa laman?

Sa pribilehio na manaksi sa kadakulaan ni Jehova sa tahaw kan mga nasyon. (Isaias 43:21; 1 Pedro 2:9)​—w-BI 7/1, pahina 19.

▫ Ano an ipinaririsa kan mga tataramon ni apostol Pedro na an agom na lalaki maninigong ‘magtao nin onra’ sa saiyang agom? (1 Pedro 3:7)

An agom na lalaki na nagtatao nin onra sa saiyang agom dai sinosopog o minemenus an babae. Imbes, ipinaheheling nia paagi sa saiyang mga tataramon asin gibo​—sa pribado asin sa publiko—​na sia saiyang iginagalang. (Talinhaga 31:​10-31)​—w-BI 7/15, pahina 19.

▫ Taano ta masasabi na mamomoton na paluwason sa Kristianong kongregasyon an daing pagsolsol na parakasala?

An pagtitiwalag sarong kapahayagan nin pagkamoot ki Jehova asin sa saiyang mga dalan. (Salmo 97:10) Iyan nagpapaheling nin pagkamoot sa mga nagpapadagos sa matanos na dalan huli ta hinahale kaiyan sa tahaw ninda an saro na puedeng magin maraot na impluwensia sa sainda; pinoprotehiran man kaini an kadalisayan kan kongregasyon. (1 Corinto 5:​1-13)​—w-BI 7/15, pahina 26.

▫ Paano namimidbid ngonyan an “maimbod asin madonong na oripon” na nasambitan ni Jesus sa Mateo 24:​45-47?

Sinda partikularmenteng namimidbid paagi sa ginigibo ninda sa pagtao nin mga publikasyon na basado sa Biblia, sa pagtokdo asin paghuhulit kan ‘maogmang bareta kan kahadean,’ asin paagi sa saindang maingat na pagsunod sa Tataramon nin Dios, an Biblia. (Mateo 24:14; 28:​19, 20)​—w-BI 8/1, pahina 16.