An Buhay Ko Dikit Nang Raoton nin Pag-imon

AN PAG-IMON talagang nagpoon na makadanyar sa sako kan magpakasal ako sa ikaduwa kong agom, si Mark.a Kinaipuhan na asikasohon ming duwa an nagkapirang aki sa agom asin pakiibanan an samong dating agom. Kun beses dai ko na makaya an situwasyon. Kun nagkakaigwa nin iriwal sa pamilya, garo baga dai ako kinakampihan ni Mark. Nagpoon akong maghona na namomotan pa nia an saiyang dating agom. Imbes na kontrolon an sakong pag-imon, pinabayaan ko iyan na iyo an magkontrol sa sakong buhay. Nakamamate akong namemeligro basta yaon an dating agom ni Mark.

Danay kong binabantayan si Mark, na binabantayan pa ngani an saiyang mga mata tanganing maheling kun saen sia nakaheling. Tinawan ko nin kahulogan an saiyang mga heling na dai man lamang ngani nia iniisip. Kun beses hayag na sinasahotan ko siang namomoot pa sa saiyang dating agom. Sa sarong pangyayari ikinamondo nia ining marhay sagkod na tuminindog sia asin huminale sa sarong Kristianong asamblea. Nakamate ako nin kasalan sa atubangan ni Jehova. Ginibo kong miserable an buhay kan sakong pamilya huli ta sa katapustapusi naapektaran pati an mga aki. Naongis ako sa sadiri ko huli sa ginigibo ko, alagad gurano man kaigot kan sakong paghihingoa, garo talagang dai ko kayang kontrolon an sakong pag-imon.

Imbes na tabangan ako, si Mark nagpoon na bumalos. Kun sinasahotan ko sia, kukurahawan nia ako, “Nag-iimon ka, nag-iimon ka sana.” Garo ngani tinutuyo pa niang papag-imonon ako. Tibaad an paghona nia mahahale kaini an sakong pag-imon, alagad pinagrabe sana kaiyan an mga bagay. Nagpoon siang magheling sa ibang babae, na nagkokomento kun gurano sinda kagayon. Ini nagpangyari sa sako na makamateng mas menus asin hinahaboan. Nakaabot iyan sa kamugtakan na luminataw an saro pang maraot na emosyon​—an pagkaongis. Sa kamugtakan na iyan, naribong na akong marhay kaya minawot ko nang sumiblag sa saiya asin sa saiyang pamilya.

Kun sinasabi kan Biblia na “an pag-imon kalapaan sa mga tolang,” totoo nanggad iyan. (Talinhaga 14:30) Nagpoon ngonyan na maapektaran an sakong salud. Nagkaulser ako sa tulak na haloy na naomayan. Padagos kong ginibong miserable an sakong buhay paagi sa pagigin mapagsuspetsa sa gabos na ginigibo ni Mark. Rinerekisa ko an saiyang mga bulsa, asin kun nakakukua ako nin mga numero sa telepono, nag-aapod ako sa telepono tanganing aramon kun siisay an masimbag. Sa kairairaromi kan boot ko ikinasosopog kong marhay an sakong sadiri, naghihibi ako huli sa kasopganan sa atubangan ni Jehova. Pero dai ko mapogolan an sakong sadiri. Ako an sakong pinakamaraot na kaiwal.

Nadanyaran an sakong espirituwalidad sagkod na dai na ako makapamibi. Namomotan ko si Jehova asin talagang boot kong gibohon an tama. Aram ko an gabos na teksto na napanonongod sa mga agom na lalaki asin babae, alagad dai ko ikinaaplikar iyan. Sa kaenot-enote sa sakong buhay, habo ko nang mabuhay, sa ibong kan katunayan na igwa ako nin mararahay na aki.

Dakulang pampakosog an kamagurangan sa Kristianong kongregasyon asin naghingoa sindang marhay na matabangan ako. Alagad kun binubuksan ninda an manongod sa sakong pag-imon, pigninigaran ko iyan huli sa pagkasopog, na habong admitiron na igwa ako nin siring na problema.

Kan huri, nagraot an sakong salud sagkod na kinaipuhan akong ilaog sa ospital tanganing operaran. Mantang yaon duman narealisar ko na an buhay dai puedeng magpadagos sa siring na kamugtakan. Nagdesisyon kami ni Mark na magbulagan sa laog nin tolong bulan tanganing siyasaton an samong situwasyon na daing gayo nagigin emosyonal. Durante kan panahon na ini may marahayon na nangyari. Sa magasin na Awake! nagluwas an artikulo na may temang “Help for Adult Children of Alcoholics.”b

Aram nindo, alkoholiko an sakong ina. Minsan ngani dai man ako kinologan sa pisikal, an sakong mga magurang dai noarin man nagpaheling nin pisikal na kapadangatan sa lambang saro o sa sako. Dai ko nagigirumdoman na an sakong ina kinugos man lamang ako o nagtaram man lamang sako na namomotan nia ako. Kaya sa totoo nagdakula ako na dai talaga tataong mamoot o, kapareho kaimportante, kamotan.

Parateng sinasabi sa sako kan sakong ina an manongod sa pambababae kan sakong ama asin na dai nia sia napagtitiwalaan. Kaya seguro nagdakula ako na sa pankagabsan dai nagtitiwala sa mga lalaki. Huli sa pagpadakula sako, permi akong nakamamateng menus kisa sa iba, orog na sa ibang babae. An pakabasa sa artikulong idto sa Awake! nakatabang sa sako na maintindihan an kahulogan kan mga bagay na ini. Sa kaenot-enote, nasabotan ko an mga pinakacausa kan sakong problema sa pag-imon.

Ipinaheling ko an artikulo sa Awake! sa sakong agom, si Mark, asin nakatabang man iyan sa saiya na masabotan ako nin orog. Dai nahaloy nahimo niamong sunodon an sadol kan Biblia sa mga mag-agom na nag-iisip na magbulag. Nagkainulian kami. (1 Corinto 7:​10, 11) Ngonyan mas marahay na an samong pag-inagoman kisa kan dati. Permi kaming nagtitinabangan, orog na kun kalabot an Kristianong mga aktibidad. Si Mark nagpapaheling nin orog na empatiya. Haros aroaldaw sinasabihan nia ako kun gurano an pagkamoot nia sa sako, asin ngonyan talagang naniniwala na ako dian.

Kun aram kong magkakahelingan kami kan dating agom ni Mark, namimibi ako ki Jehova na logod tawan ako nin kosog, na hinahagad sa saiya na tabangan akong gumawe sa maygurang na Kristianong paagi. Asin epektibo iyan. Pati an mga pagkaanggot ko sa saiya nawawara na. Dai ko na pigpaparaisip an negatibong mga bagay o tinotogotan na mawaran nin kontrol an sakong imahinasyon.

Nakamamate pa ako sagkod ngonyan nin salang pag-imon. Solamente an sangkap na buhay sa bagong kinaban nin Dios an biyong makahahale kaiyan sa sako. Mientras tanto, nanodan ko nang kontrolon an pag-imon, imbes na pabayaan iyan na ako an kontrolon. Iyo, dikit nang raoton nin pag-imon an buhay ko, alagad salamat ki Jehova asin sa saiyang organisasyon, ako ngonyan saro nang mas maogmang tawo, asin nagrahay na an sakong salud. Sa giraray makosog na an relasyon ko sa sakong Dios, si Jehova.​—Isinurat.

[Mga Nota sa Ibaba]